NSS - ဇူလိုင် ၁၄

မကွေးတိုင်း၊ ပခုက္ကူမြို့နယ်၊ တန့်ကြည့်တောင်ဘုရားအနီးရှိ ကျေးရွာ၌ PDF ပူးပေါင်းအဖွဲ့များနှင့် ပြည်သူ့စစ်၊ တပ်မတော် ပူးပေါင်းအဖွဲ့တို့အကြား တိုက်ပွဲဖြစ်ပွားခဲ့ကြောင်း ဒေသခံများထံမှ သတင်းရရှိသည်။

ဆိက္ခဝကျေးရွာအုပ်စု၊ တန့်ကြည့်တောင်ဘုရားအနီးရှိ တောင်ရွာယာကျေးရွာတွင် ယမန်နေ့(ဇူလိုင် ၁၃ ရက်) နံနက် ၅ နာ ရီခွဲအချိန်ခန့်တွင် နှစ်ဖက်အကြား (၁)နာရီကျော်ကြာ အပြန်အလှန်ပစ်ခတ်မှုဖြစ်ပွားခဲ့ကြောင်း သိရသည်။

PDF ပူးပေါင်းအဖွဲ့များသည် တောင်ရွာယာကျေးရွာကို နံနက်အစောပိုင်းတွင် လာရောက်ချဉ်းကပ်ကာ လူနေအိမ်(၁)လုံးကို မီးရှို့ဖျက်ဆီးခဲ့ကြောင်း ဒေသခံများက ဆိုသည်။

“တောင်ရွာယာကျေးရွာအနားကို အင်အား(၂ဝ)ခန့် လာကပ်တယ်။ ရွာရဲ့မီတာ (၂၅ဝ)လောက်အကွာမှာ အင်အားက (၄ဝ) ကျန်ခဲ့တယ်။ နောက်ချန်အင်အားပေါ့။ အဲဒီလို ကပ်ပြီးတော့ ရွာထဲမှာရှိတဲ့ အိမ်တစ်အိမ်ကို မီးရှို့တယ်။ ပြီးတော့ စတင်ပစ်ခတ်တယ်။ အဲဒီမှာ ပြည်သူ့စစ်အဖွဲ့နဲ့ တပ်မတော်တို့ရှိတယ်။ အဲဒီတော့ ပြည်သူ့စစ်နဲ့တပ်မတော်အဖွဲ့တွေက လည်း PDF တွေရှိတဲ့နေရာကို သွားပြီးတော့ တိုက်တယ်ပေါ့။ အဲဒီတော့ မနက် ၅ နာရီ ၂ဝ လောက်မှာ အပြန်အလှန်ပစ် ခတ်မှုတွေ ဖြစ်တာပေါ့” ဟု တောင်ရွာယာကျေးရွာဒေသခံတစ်ဦးက NP News ကို ပြောသည်။

ထိုသို့ အပြန်အလှန်ပစ်ခတ်မှုဖြစ်စဉ်အတွင်း ကုန်စိမ်းလိုက်လံရောင်းချသည့် အသက်(၁၉)နှစ်အရွယ် ဒေသခံ ကိုမင်းသူအောင် ဆိုသူမှာ ကျည်ဖောက်ဝင်ဒဏ်ရာရရှိခဲ့ကာ ဆေးရုံ၌ သေဆုံးခဲ့ပြီး နောက်ထပ် ရွာခံတစ်ဦးမှာလည်း ထိခိုက်ဒဏ်ရာ များရရှိသွားခဲ့ကြောင်း သိရသည်။

ထို့ပြင် PDF ပူးပေါင်းအဖွဲ့သည် တောင်ရွာယာကျေးရွာသို့ လာရောက်ချဉ်းကပ်တိုက်ခိုက်မှုနှင့် တစ်ပြိုင်နက် ၎င်းကျေးရွာနှင့် မီတာ (၂ဝဝဝ)ခန့်ဝေးသော ရေနံချက်ကျေးရွာသို့ ဝင်ရောက်စီးနင်းမှုများ ပြုလုပ်ခဲ့ကြောင်းလည်း ဒေသခံများက ထပ်မံ ပြောထားသည်။

“အဲဒီရွာနဲ့ တစ်ချိန်တည်းတစ်ပြိုက်နက်တည်းမှာ ရေနံချက်ကျေးရွာကို ဝင်စီးတယ်။ ပြည်သူ့စစ်ရဲ့ မိဘအိမ်ကို ဝင်စီးတယ်။ ပြည်သူ့စစ် က စခန်းမှာနေတာဆိုတော့ ပြည်သူ့စစ်ကို မတွေ့ရဘူး။ ထိတွေ့မှု မဖြစ်ခဲ့ဘူးပေါ့။ အဲဒီလို မတွေ့တဲ့အခါကြတော့ ဖုန်းတွေ၊ ဘာတွေ သိမ်းသွားတယ်။ ပိုက်ဆံတွေယူသွားတယ်။ လူသတ်တာတို့၊ ဘာတို့တော့ လုပ်မသွားဘူးပေါ့” ဟု ရေနံချက်ကျေးရွာဒေသခံတစ်ဦးက NP News ကို ပြောသည်။

လက်ရှိတွင် နှစ်ဖက်တိုက်ပွဲများကြောင့် တောင်ရွာယာကျေးရွာ၊ ရေနံချက်ကျေးရွာနှင့် ရွာသစ်ကျေးရွာတို့ ဒေသခံပြည်သူများသည် လတ်တလော၌ နေရပ်စွန့်ခွာ စစ်ဘေးရှောင်နေရကြောင်း သိရသည်။

ထို့ပြင် ကျောင်းသား၊ ကျောင်းသူ (၁ဝဝဝ)နီးပါး ပညာသင်ယူနေသည့် အထကခွဲ(တောင်ရွာယာ)၊ အလက(ရေနံချက်)နှင့် အမက(ရွာသစ်)ကျောင်းတို့ကို ပိတ်ထာရကြောင်း ဒေသခံများက ဆိုထားသည်။

“အခုတော့ စာသင်ကျောင်းတွေရော၊ ရွာသူ၊ရွာသားတွေရော ဧရာဝတီမြစ်တစ်ဖက်ကမ်းမှာ ရှောင်ရှားနေကြရတယ်။ အခု လက်ရှိမှာတော့ စာသင်ကျောင်းတွေကို မနေ့ကရော၊ တစ်နေ့ကရော ပိတ်ထားတယ်။ အထကခွဲရှိတဲ့ တောင်ရွာယာမှာဆို ရင် ကျောင်းသား (၅ဝ)ကျော်ရှိတယ်။ အခုတော့ ပိတ်ထားရတယ်။ နောက် ရေနံချက်ရွာမှာရှိတဲ့ အလကကျောင်းကို လည်း ပိတ်ထားရတယ်။ အဲဒီကျောင်းမှာက ကျောင်းသားဦးရေ (၂၃ဝ)ကျော်ရှိတယ်” ဟု ဒေသခံတစ်ဦးက ပြောဆိုထားသည်။

လက်ရှိအချိန်တွင်လည်း PDF ပူးပေါင်းအဖွဲ့များနှင့် ပြည်သူ့စစ်၊ တပ်မတော်လုံခြုံရေးအဖွဲ့တို့အကြား နှစ်ဖက်စစ်ရေးတင်း မာနေမှုများ ရှိနေကြောင်းလည်း ဒေသခံများက အသိပေးပြောဆိုထားသည်။