စော (NSS) - ဇွန် ၂၈

လာမည့် ဇူလိုင်လအတွင်းပေါ်ပေါက်လာနိုင်သည့် အားအတင့်အသင့်ရှိသည့် အယ်လ်နီညိုကြောင့် အပူချိန်မြင့်မားမှုများ ဖြစ်ပွားလာနိုင်ကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာနမှ ယနေ့ (ဇွန်လ ၂၈ ရက်)တွင် အသိပေးထုတ်ပြန်ထားကြောင်း သိရသည်။

အီကွေတာအနီးရှိ အပူပိုင်းပစိဖိတ်သမုဒ္ဒရာ (Tropical Pacific Ocean)၏ ပင်လယ်ရေ မျက်နှာပြင်အပူချိန်နှင့် လေထုများသည် အားအနည်းငယ်ရှိသည့် အယ်လ်နီညိုအခြေအနေ၌ရှိနေကြောင်း မိုးဇလမှ ထုတ်ပြန်ထားသည်။

ထို့ပြင် နိုင်ငံတကာ မိုးလေဝသဌာနများရှိ သင်္ချာပုံစံပြု ‌မော်ဒယ်များ၏ ခန်းမှန်းချက်များအရ  ဇူလိုင်လအတွင်း အားအသင့်အတင့်ရှိသော အယ်လ်နီညို အခြေအနေသို့ ရောက်ရှိနိုင်ကြောင်း သိရသည်။

အဆိုပါအယ်လ်နီညိုသည် အပူပိုင်းပစိဖိတ်သမုဒ္ဒရာ၌ ဖြစ်ပေါ်နေသည့် အယ်လ်နီညိုဖြစ်သော်လည်း အကျိုးသက်ရောက်မှုများကြုံတွေ့နိုင်ကြောင်း မိုးဇလမှ ထုတ်ပြန်ထားသည်။

၎င်း၏ အကျိုးသက်ရောက်မှုသည် မိုးရွာသွန်းမှု ပုံစံမူမမှန်ခြင်း၊ အပူချိန် မြင့်မားခြင်း၊ မုန်တိုင်းဖြစ်ပေါ်မှု မူမမှန်ခြင်း စသည့် ရာသီဥတုအပြောင်းအလဲများ ဖြစ်ပေါ်လေ့ရှိကြောင်း ထုတ်ပြန်ချက်အရသိရသည်။

အယ်လ်နီညိုဖြစ်စဉ်အရ အပူချိန်မြင့်မားခြင်း၊ နေရာကွက်ကျားမိုးသည်းထန်စွာရွာသွန်းခြင်း ၊ ပူပြင်းခြောက်သွေ့ခြင်းစသည့် ဖြစ်စဉ်များနှင့် ပတ်သက်သည့်အခြေအနေများအား အချိန်နှင့်တစ်ပြေးညီ ဆက်လက်ထုတ်ပြန်ပေးသွားမည်ဖြစ်ကြောင်း မိုးဇလမှ အသိပေးထုတ်ပြန်ထားသည်။

လတ်တလောမိုးလေဝသအခြေအနေများအရ ကပ္ပလီပင်လယ်ပြင်နှင့် ဘင်္ဂလားပင်လယ်အော်တို့တွင် မုတ်သုံလေအားအသင့်အတင့်ရှိပြီး တိုင်းဒေသကြီးနှင့် ပြည်နယ်များတွင် နေရာအနှံအပြား မိုးထစ်ချုန်းရွာကာ နေရာကွက်၍ မိုးကြီးနိုင်ကြောင်း သိရသည်။