မျိုးကြီး (NSS) - ဇွန် ၂၈

အင်္ဂလန်နိုင်ငံက ရယူထားသော ပတ္တမြားငမောက်ကျောက်နှင့် မြန်မာ့အမွေပစ္စည်း (၇၉)မျိုးသည် ယနေ့ထိ ပြန်လည်မရရှိသေးကြောင်း သမိုင်းသုတေသနနှင့် အမျိုးသားစာကြည့်တိုက်ဦးစီးဌာနက ဆိုသည်။

သာသနာရေးနှင့်ယဉ်ကျေးမှုဝန်ကြီးဌာန လက်အောက်ရှိ သမိုင်းသုတေသနနှင့် အမျိုးသားစာကြည့်တိုက်ဦးစီးဌာနက ယနေ့ (ဇွန်လ ၂၈ ရက်)တွင် အထက်ပါကဲ့သို့ အသိပေးပြောဆိုထားခြင်းဖြစ်သည်။

အင်္ဂလိပ်တို့သည် မြန်မာနိုင်ငံအား ကျူးကျော်စစ် (၃)ကြိမ် ဆင်နွှဲပြီးနောက် ၁၈၈၅ ခုနှစ် နိုဝင်ဘာလ ၂၉ ရက်တွင် မြန်မာနိုင်ငံ၏ အချုပ်အခြာအာဏာသည် လုံးဝလက်လွှတ်ဆုံးရှုံးသွားခဲ့ရသည်။

ထိုသို့ အင်္ဂလိပ်တို့သည် မြန်မာ့မြေကို ကျူးကျော်သိမ်းပိုက်ခဲ့ပြီးနောက် မြန်မာလူမျိုးတို့၏ ရတနာအမွေ အနှစ်ပစ္စည်းများကိုလည်း တစ်ပါတည်းသိမ်းယူသွားခဲ့ကြောင်း အထက်ပါဦးစီးဌာနက ဆိုထားသည်။

ထို့နောက် ၁၉၄၈ ခုနှစ်၊ ဇန်နဝါရီလ ၄ ရက်တွင် လွတ်လပ်ရေးရရှိခဲ့ကာ မြန်မာနိုင်ငံ၏ အချုပ်အခြာ အာဏာကို ပြန်လည်ရရှိခဲ့ပြီး ၁၉၆၄ ခုနှစ် တော်လှန်ရေးကောင်စီလက်ထက်၌ အင်္ဂလန်နိုင်ငံ ဒုတိယမြောက် အဲလီဇဘက်ဘုရင်မကြီးက မြန်မာနိုင်ငံကုန်းဘောင်မင်းဆက်များ၏ မင်းခမ်းတော်ပစ္စည်းများအပါအဝင် ပစ္စည်းအရေးအတွက် (၁၄၁)ခုကို ပြန်လည်ပေးအပ်ခဲ့ကြောင်း ဦးစီးဌာနက အသိပေးထားသည်။

အင်္ဂလိပ်တို့ သိမ်းယူခဲ့သော မြန်မာ့အမွေပစ္စည်းအချို့သည် မြန်မာနိုင်ငံသို့ ပြန်လည်ရောက်ရှိလာခဲ့သော်လည်း ပတ္တမြားငမောက်ကျောက်အပါအဝင် မြန်မာ့အမွေပစ္စည်း (၇၉)မျိုးသည် ယနေ့တိုင် ပြန် လည်ရရှိရန် ကျန်နေဆဲဖြစ်ကြောင်း သမိုင်းသုတေသနနှင့် အမျိုးသားစာကြည့်တိုက်ဦးစီးဌာနက ဆို သည်။

ယနေ့အထိ အင်္ဂလန်နိုင်ငံထံမှ ပြန်လည်ရရှိရန် ကျန်နေဆဲဖြစ်သော မြန်မာ့အမွေပစ္စည်းများမှာ ပတ္တမြားငမောက်ကျောက်၊ လှော်ကားတင်လေးကျောက်(ရတီ ၂ဝ)၊ လှော်ကားတင်ကြီးကျောက်(ရတီ ၄ဝ ကျော်)၊ ဆက်မတော်ကျောက်(ရတီ ၄ဝ ကျော်)တို့ ပါဝင်နေကြောင်း ဦးစီးဌာနက ဆက်လက်အသိပေးထားသည်။

ထို့ပြင် စိန်၊ မြ၊ ပတ္တမြားနားတောင်းတောင် (၁၂)ရန်၊ ပတ္တမြားစလွယ် (ခ)ခု၊ စိန်ခါးစည်း၊ စိန်ပန်းခွေ၊ စိန် ပန်းခိုင်၊ စိန်လက် ကောက်၊ စိန်လက်စွပ်၊ ပတ္တမြားလက်စွပ်တို့အပါအဝင် မြန်မာ့အမွေပစ္စည်း (၇၉)မျိုးသည် ယနေ့တိုင် အင်္ဂလန်နိုင်ငံထံမှ ရရှိရန် ကျန်နေဆဲဖြစ်ကြောင်း ဦးစီးဌာနက ဆိုထားသည်။

ထို့ကြောင့် ဆုံးရှုံးသွားပြီး ပြန်လည်ရရှိရန် ကျန်နေဆဲဖြစ်သော စာရင်းဝင်/ စာရင်းမဝင် မြန်မာ့အမွေ နန်းစဉ်ပစ္စည်းများကို ပြန်လည်ရရှိရန် ကြိုးစားကြရမည်ဟု သမိုင်းသုတေသနနှင့် အမျိုးသားစာကြည့် တိုက်ဦးစီးဌာနက တိုက်တွန်းထားသည်။

“သူ့ပစ္စည်းကို သူ့ဆီ ပြန်ပေးတာက တရားနည်းလမ်းကျပါတယ်။ ပြန်ပေးသင့်တာပေါ့။ လွတ်လပ်ရေးလည်း ပေးပြီးပြီလေ။ အဲဒီတော့ ကိုလိုနီနယ်ချဲ့ခဲ့တဲ့ နယ်မြေအားလုံးနီးပါးလောက်က အမွေအနှစ်တွေကို ပြန်ပေးဖို့ တာဝန်က လက်ရှိ ဗြိတိန်ဘုရင်နဲ့ သူ့ရဲ့အစိုးရအဖွဲ့မှာ တာဝန်ရှိတာပေါ့။ အဲဒီတော့ အမွေအနှစ်တွေက သူ့ရဲ့ မူရင်းနေရာမှာ ရှိမှပဲ တန်ဖိုးက ပိုပိုတက်လာတာပေါ့။ အဲဒါကြောင့်လည်း နိုင်ငံပေါင်းစုံက ယူသွားတဲ့ သူတို့ရဲ့ အမွေအနှစ်တွေကို ပြန်တောင်းကြတာပေါ့။ အဲဒီတော့ တောင်းဆိုသင့်ပါတယ်။ တစ် ဖက်ကလည်း အတင်းအဓမ္မသိမ်းယူခဲ့တာမို့ ပြန်ပေးသင့်ပါတယ်”ဟု ရခိုင့်ဦးဆောင်ပါတီဥက္ကဋ္ဌဒေါက်တာအေးမောင်က NP News ကို မှတ်ချက်ပြုပြောဆိုထားသည်။

အင်္ဂလန်နိုင်ငံအနေဖြင့် မြန်မာ့အမွေအနှစ်ပစ္စည်းများကို မူလပိုင်ရှင်မြန်မာထံသို့ ပြန်လည်ပေးပို့ရန် တာဝန်ရှိကြောင်းလည်း ဒေါက်တာအေးမောင်က ဆိုထားသည်။

“ဒီဘက်ကလည်း နောင်လာနောက်သားတွေရဲ့ အမွေအနှစ်ဖြစ်တာမိုလို့ အရကို တောင်းသင့်တာပေါ့။ လုပ်ထုံးလုပ်နည်းအတိုင်းပဲ တောင်းရမှာပေါ့” ဟု ၎င်းက ဆက်လက်ပြောဆိုထားသည်။

မြန်မာ့အမွေအနှစ်ပစ္စည်းများ ပြန်လည်ရရှိရေးအတွက် သက်ဆိုင်ရာဝန်ကြီးဌာနများ၊ အရပ်ဖက်အဖွဲ့အစည်းများ၊ နိုင်ငံရေး ပါတီများအပါအဝင် ပြည်သူလူထုတစ်ရပ်လုံးမှ ပူးပေါင်းတောင်းဆိုသင့်ကြောင်းလည်း အကြံပြုထားသည်။