မျိုးကြီး (NSS) - ဇွန် ၂၅

ဗိုလ်ချုပ်မှူးကြီးမင်းအောင်လှိုင် ဦးဆောင်သော နစကအစိုးရလက်ထက်အတွင်း အမေရိကန်ဒေါ်လာ (၁)ဘီလျံကျော်တန်ဖိုးရှိ မူးယစ်ဆေးဝါးမျိုးစုံကို ဖမ်းဆီးရရှိခဲ့ကြောင်း သိရသည်။

နိုင်ငံတော်အာဏာကို တပ်မတော်က စတင်ရယူသည့် ၂ဝ၂၁ ခုနှစ်အတွင်း၌ မြန်မာငွေကျပ် ဘီလျံ(၉၇ဝ) ကျော် (အမေရိကန်ဒေါ်လာသန်း ၄၆ဝ ကျော်)တန်ဖိုးရှိ ဘိန်း၊ စိတ်ကြွရူးသွပ်ဆေးပြား၊ အိုက်စ်၊ ဆေး ခြောက်အပါအဝင် မူးယစ်ဆေးဝါးမျိုးစုံကို ဖမ်းဆီးရရှိခဲ့ကြောင်း နစက၏ သတင်းအချက်အလက်များတွင် ဖော်ပြထားသည်။

ထို့နောက် ပြီးခဲ့သော ၂ဝ၂၂ ခုနှစ်အတွင်း၌ ငွေကျပ်ဘီလျံ (၁၁၂ဝ)ကျော် (အမေရိကန်ဒေါ်လာ ၅၃၃ သန်းကျော်) တန်ဖိုးရှိ မူးယစ်ဆေးဝါးမျိုးစုံကိုလည်း ဖမ်းဆီးရမိခဲ့ကြောင်း သိရသည်။

ထို့ပြင် ၂ဝ၂၃ ခုနှစ် မေလကာလအထိ ငွေကျပ် (၃၇၇)ဘီလျံကျော်(အမေရိကန်ဒေါ်လာ ၁၇၉ သန်းကျော်) တန်ဖိုးရှိ မူးယစ်ဆေးဝါးမျိုးစုံကိုလည်း ဖမ်းဆီးရရှိခဲ့ကြောင်း နစက၏ သတင်းအချက်အလက်များက ဆိုထားသည်။

ထို့ကြောင့် နစကအစိုးရလက်ထက်အတွင်း မြန်မာငွေကျပ် (၂၄၆၇)ဘီလျံကျော်(အမေရိကန်ဒေါ်လာ (၁)ဘီလျံကျော်)တန်ဖိုးရှိ မူးယစ်ဆေးဝါးမျိုးစုံကို ဖမ်းဆီးရမိခဲ့ခြင်းလည်းဖြစ်သည်။

၎င်းကဲ့သို့ ဖမ်းဆီးရမိခဲ့သည့် မူးယစ်ဆေးဝါးမျိုးစုံအနက် ဘိန်းဖြူ၊ စိတ်ကြွရူးသွပ်ဆေးပြားနှင့် အိုက်စ် ဖမ်းဆီးရမိမှုသည် အများဆုံးဖြစ်ကြောင်း သိရသည်။

“နစကလက်ထက်မှာ မူးယစ်ဆေးဝါးဖမ်းမိတာက အတော်လေးများတယ်လို့ ပြောရမယ်။ ဘာဖြစ်လို့လဲဆိုရင် ဖမ်းမိတဲ့ ဖြစ်စဉ်တွေက အများကြီးရှိသလို မိလိုက်ရင်လည်း နည်းနည်းပါးပါးပဲ မိတာမျိုးမဟုတ်ဘူး။ ကုန်ကားတွေနဲ့ သယ်ယူပို့ဆောင်နေတာတွေကိုပါ မိနေတာ။ ရန်ကုန်မှာဆိုရင်လည်း club တွေ၊ bar တွေမှာ မူးယစ်ဆေးဝါးက တော်တော်များများရတယ်လို့ သတင်းတွေကလည်း ထွက်နေတယ်။ ဒါတွေကိုပါ ထိထိရောက်ရောက် စစ်ဆေးမှုတွေ၊ အရေးယူမှုတွေ လုပ်စေချင်တယ်။ မူးယစ်ဆေးဝါးကြောင့် ဘာကောင်းကျိုးမှ မရဘူးလေ” ဟု ရန်ကုန်မြို့ခံတစ်ဦးက NP News ကို မှတ်ချက်ပြုပြောဆိုထားသည်။

မြန်မာနိုင်ငံအတွင်း ဖမ်းဆီးရမိသည့် စိတ်ကြွရူးသွပ်ဆေးများသည် ပြည်ပနိုင်ငံများမှ ရောက်ရှိလာသည့် ပရီကာဆာဓာတုပစ္စည်းများကြောင့် စိတ်ကြွရူးသွပ်ဆေးများ ဖြစ်ပေါ်လာခြင်းဖြစ်ပြီး ၎င်းဓါတုပစ္စည်းများကို တားဆီးဖမ်းဆီးနိုင်ရေးမှာ အထူးလိုအပ်ကြောင်း သိရသည်။

ထို့ပြင် နိုင်ငံအတွင်း၌ ဘိန်းစိုက်ပျိုးထုတ်လုပ်မှုကို တိုင်းရင်းသားလက်နက်ကိုင်အဖွဲ့အစည်းများရှိရာ နယ်မြေများတွင် အဓိက လုပ်ဆောင်နေမှုများရှိကြောင်းလည်း ကြားသိရသည်။