Pearl (NSS) - ဇွန် ၁၇

လယ်ဝေးမြို့မရဲစခန်း နှင့် MICC-II ဂိတ်(၂)ဝင်ပေါက်အား  လက်ပစ်ဗုံးဖြင့် ပစ်ပေါက်ဖောက်ခွဲခဲ့သည့် အမျိုးသား (၄)ဦးအား (၁ဝ) နာရီအတွင်း ဖမ်းဆီးရမိကြောင်း နစကမှထုတ်ပြန်ထားသည်။ 

ပြီးခဲ့သည့် ဇွန်လ ၁၂ ရက် ညနေပိုင်းတွင် နေပြည်တော်ရှိ လယ်ဝေးမြို့မရဲစခန်းအား အမျိုးသား (၂) ဦးက လက်ပစ်ဗုံးဖြင့် ပစ်ခတ်ခဲ့ပြီး  ဇမ္ဗူသီရိမြို့နယ်၊ ဘောဂသိဒ္ဓိရပ်ကွက်၊ ဉာဏအောင်မြေလမ်း၊ MICC-II ဂိတ်(၂)ဝင်ပေါက်ကိုလည်း အမျိုးသား (၃)ဦးတို့က လက်ပစ်ဗုံးဖြင့် ပစ်ပေါက်ဖောက်ခွဲခဲ့သည့် ဖြစ်စဉ်များဖြစ်ပွားခဲ့သည်။ 

ထို့ကြောင့်  လုံခြုံရေးတပ်ဖွဲ့ဝင်များမှ စုံစမ်းစစ်ဆေးမှုများပြုလုပ်ရာ ဇွန်လ ၁၃ ရက်၊ နံနက်ပိုင်းတွင် လယ်ဝေးမြို့မရဲစခန်းနှင့် MICC-II ဂိတ်(၂)ဝင်ပေါက်တို့အား လက်ပစ်ဗုံးဖြင့်ပစ်ခတ်သွားသည့် သက်နိုင်နှင့် အငှားယာဉ်မောင်း ရန်နိုင်ထွန်းတို့အား ပျဉ်းမနားမြို့နယ်၊ အာဟာရသုခဈေးအနီးရှိ “ရွက်သစ်” လက်ဖက်ရည်ဆိုင်၌ ဖော်ထုတ်ဖမ်းဆီးရမိခဲ့ကြောင်း သိရသည်။ 

ဖမ်းဆီးရမိသူ သက်နိုင်၏ ထွက်ဆိုချက်အရ အဆိုပါနေ့ နေ့လည်ပိုင်းတွင် ရဲနိုင် နှင့် အငှားယာဉ်မောင်း အိုင်ဖော့(ခ)ရန်နိုင်ဦးတို့အား လိပ်သိုမြို့အဝင် စစ်ဆေးရေးဂိတ်၌ ထပ်မံဖမ်းဆီးရမိခဲ့ပြီး အကြမ်း ဖက်အမျိုးသား (၄)ဦးအား ဖြစ်စဉ်ဖြစ်ပွားပြီး (၁ဝ)နာရီအတွင်း ဖော်ထုတ်ဖမ်းဆီးရမိခဲ့ကြောင်း နစကမှ ဆိုသည်။ 

ဖမ်းဆီးရမိသူများ၏ ထွက်ဆိုချက်အရ  ဇွန်လ ၁ဝ ရက်တွင် ဖမ်းဆီးရန်ကျန်သူ ဇင်ယော်(ခ)ငှက်ဖြူ(ခ) နေလင်း မှ MICC-II နှင့် လယ်ဝေးမြို့မရဲစခန်းတို့အား ပစ်ခတ်ဖောက်ခွဲရန် လက်ပစ်ဗုံး (၂)လုံးအား ပေးခဲ့သဖြင့် သက်နိုင်၊ ရဲနိုင် နှင့် ဖမ်းဆီးရန်ကျန် အသေးလေးတို့မှ ကယားပြည်နယ်၊ ပဆေးလာကျေးရွာသို့ သွားရောက်ယူဆောင်ခဲ့ပြီး ဇွန်လ ၁၁ ရက်တွင် လယ်ဝေးမြို့မရဲစခန်းနှင့် MICC-II ဂိတ်(၂)ဝင်ပေါက်တို့အား သွားရောက်၍အခြေအနေကြည့်ရှုခဲ့ကြောင်း သိရသည်။ 

ထို့နောက် ဇွန်လ ၁၂ ရက် ညနေပိုင်းတွင် လက်ပစ်ဗုံး ၂ လုံးအားယူဆောင်၍ ဆိုင်ကယ် ၂ စီးဖြင့် လယ်ဝေးမြို့မရဲစခန်းသို့ သွားရောက်ခဲ့ပြီး အသေးလေးမှ လုံခြုံရေးတပ်ဖွဲ့ဝင်များ၏ အခြေအနေအားစောင့်ကြည့်၍ သက်နိုင်နှင့် ရဲနိုင်တို့ ၂ ဦးမှ လက်ပစ်ဗုံး ၁ လုံးဖြင့် ပစ်ပေါက်ထွက်ပြေးခဲ့ကြောင်း ဖော်ထုတ်သိရှိရသည်ဟု နစကမှ ဆိုသည်။ 

အလားတူ အဆိုပါနေ့ညပိုင်းတွင် ၎င်းတို့ ၃ ဦးသည် ဆိုင်ကယ် ၂ စီးဖြင့် MICC-II သို့ သွားရောက်ခဲ့ပြီး ရဲနိုင်မှ အခြေအနေကြည့်ရှုပေးကာ အသေးလေး နှင့် သက်နိုင်တို့ ၂ ဦးမှ MICC-II ဂိတ်(၂) ဝင်ပေါက်အား လက်ပစ်ဗုံး ၁ လုံးဖြင့် ပစ်ပေါက်ထွက်ပြေးခဲ့ကြောင်း သိရှိရသည်။

ထွက်ဆိုချက်အရ အဆိုပါအကြမ်းဖက်ဖောက်ခွဲမှုများအတွက် ဇင်ယော်မှ တစ်ဦးလျှင် ငွေကျပ် ၃ သိန်း ထောက်ပံ့ပေးခဲ့ပြီး ကယားပြည်နယ်အတွင်းသို့ ထွက်ပြေးတိမ်းရှောင်ရန်လုပ်ဆောင်နေစဉ် ဖမ်းဆီးခံခဲ့ရခြင်းဖြစ်ကြောင်း သိရသည်။ 

လက်ရှိတွင် ဖမ်းဆီးရမိသူများအားဥပဒေအရ ထိရောက်စွာအရေးယူနိုင်ရေး ဆက်လက်ဆောင်ရွက်သွားမည်ဖြစ်ကြောင်း နစကမှ ထုတ်ပြန်ထားသည်။