Pika (NP News) - ဇွန် ၈ 

ပြင်သစ်တိုက်စစ်မှူး ဘန်ဇီးမားက ၎င်းသည် ဆော်ဒီကလပ်တစ်ခုဖြစ်သော  Al Ittihad သို့ သုံးနှစ်သက်တမ်းရှိ စာချုပ်ဖြင့် ပြောင်းရွှေ့ခွင့်ရသည့်အတွက် စိတ်လှုပ်ရှားမိကြောင်း ထုတ်ဖော်ပြောဆိုခဲ့သည်။

ဘန်ဇီးမားသည် ဇွန်လ(၆)ရက်တွင်  Al Ittihad အသင်းနှင့် သဘောတူစာချုပ်ချုပ်ဆိုခဲ့ပြီး စီရော်နယ်ဒိုပြီးလျှင် ဆော်ဒီအာရေးဗျနိုင်ငံသို့ ပြောင်းရွှေ့သော ဒုတိယမြောက်ကစားသမားဖြစ်လာခဲ့သည်။  ဘန်ဇီးမားသည် လက်ရှိ အချိန်တွင် မက်ဒရစ်မြို့တွင် ဆေးစစ်မှုများလုပ်ဆောင်နေပြီး Jeddah အခြေစိုက် Al Ittihad အသင်းသို့ သွားရောက်ရန် စီစဉ်နေပြီဖြစ်ကြောင်း သိရသည်။

 ဘန်ဇီးမား က "အခြားနိုင်ငံတစ်နိုင်ငံက ဘောလုံးလိဂ်အသစ်တစ်ခုမှာ တွေ့ကြုံရမယ့် အတွေ့အကြုံတွေအတွက် ကျွန်တော် စိတ်လှုပ်ရှားမိပါတယ်။ Al-Ittihad အသင်းမှာ အံ့ဩစရာကောင်းတဲ့သမိုင်းကြောင်းရှိပြီး စိတ်အားထက်သန်တဲ့ပရိသတ်တွေရှိပါတယ်။ လိဂ်ဖလားကို ရယူနိုင်အောင် အကောင်းဆုံးကစားပေးပြီးတော့ အာရှမှာ ပိုမိုနာမည်ကြီးလာစေဖို့ ကြီးမားတဲ့ရည်မှန်းချက်တွေ ကျွန်တော့်မှာ ရှိပါတယ်။ ကျွန်တော့်ရဲ့ကစားသမားဘဝမှာ အံ့ဩစရာကောင်းတဲ့အရာတွေကို အောင်မြင်ခဲ့ပြီး စပိန်နဲ့ ဥရောပမှာ အောင်မြင်ခဲ့တာပဲဖြစ်ပါတယ်။ စိန်ခေါ်မှုအသစ်တွေအတွက် ဒီအချိန်က အသင့်တော်ဆုံးအချိန်လို့ ထင်မိပါတယ်။ ဆော်ဒီအာရေးဗျကို လာရောက် လည်ပတ်ခဲ့တဲ့အကြိမ်တိုင်း ပရိသတ်တွေရဲ့နွေးထွေးမှုနဲ့ ချစ်ခြင်းမေတ္တာတွေကို အမြဲခံစားခဲ့ရပါတယ်။ ကျွန်တော့် ရဲ့အသင်းဖော်အသစ်တွေနဲ့ အကောင်းဆုံးလက်တွဲသွားပြီး Al-Ittihad အသင်းကို ဆော်ဒီအာရေးဗျမှာ အဆင့်သစ် တွေဆီကို ခေါ်ဆောင်သွားနိုင်မယ်လို့ ယုံကြည်ပါတယ်" ဟု ပြောဆိုခဲ့သည်။

ရီးရဲမက်ဒရစ်အသင်းတွင် (၁၄)နှစ်ကြာရှိနေခဲ့ပြီး ပြိုင်ပွဲစုံပွဲပေါင်း (၆၄၈)ပွဲ ကစားပြီးနောက် အသင်းမှ ထွက်ခွာလာသော  ဘန်ဇီးမားသည် ဇန်နဝါရီလတွင် အယ်လ်နာဆာအသင်းသို့ပြောင်းရွှေ့ခဲ့သော ၎င်း၏ ရီးရဲလ်မက်ဒရစ်အသင်း ဖော်ဟောင်း စီရော်နယ်ဒို နှင့် ဆော်ဒီလိဂ်တွင် ယှဉ်ပြိုင်ကစားရမည်ဖြစ်သည်။