Pearl (NP News) - ဧပြီ ၁၉

မကွေးတိုင်း၊ မြိုင်မြို့နယ်တွင် PDF များ သိုဝှက်သိမ်းဆည်းထားသည့် ခဲယမ်း၊ ဗုံးသီးများနှင့် ဆက်စပ်ပစ္စည်းများ သိမ်းဆည်းရမိခဲ့ကြောင်း နစကထံမှ သိရသည်။ 

ယမန်နေ့ (ဧပြီလ ၁၈ ရက်)၊ နံနက်ပိုင်းတွင် လုံခြုံရေးတပ်ဖွဲ့ဝင်များက မြိုင်မြို့နယ်၊ မကြီးကန်ကျေးရွာအားဝင်ရောက်၍ စုံစမ်းစစ်ဆေးခြင်းများဆောင်ရွက်ခဲ့ကြောင်း သိရသည်။ 

ထိုသို့ဆောင်ရွက်ခဲ့ရာ PDF များနှင့်ပတ်သက်ဆက်နွယ်သူများဟု ယူဆရသူအမျိုးသား (၁ဝ)ဦး နှင့် အမျိုးသမီး (၂ဝ)ဦးတို့ကိုလိုအပ်သည့် စစ်ဆေးမှုများဆောင်ရွက်နိုင်ရန် ခေတ္တထိန်းသိမ်းခဲ့ကြောင်း သိရသည်။ 

ထို့နောက် မကြီးကန်ကျေးရွာရှိ ကျေးလက်ဆေးပေးခန်းအတွင်းမှ ကျည်အိမ်မျိုးစုံ (၁ဝ)ခု၊ လက်ပစ်ဗုံးမျိုးစုံ ၁၈ လုံး၊ ၆ဝ မမ ဗုံးသီး (၂)လုံး၊ လက်လုပ်လက်ပစ်ဗုံးနှင့် Drop ဗုံးသီး (၃)လုံး၊ ကျည်မျိုးစုံ (၇၈ဝ) တောင့်၊ ဆက်သွယ်ရေးစက်နှင့် ဆက်စပ်ပစ္စည်းများ၊ People Defence Force (Myaing) စာတန်းပါ ယူနီဖောင်းများအပါအဝင် ယူနီဖောင်းမျိုးစုံ (၅၃)စုံ၊ ကျည်ကာအင်္ကျီ (၂)ထည်၊ Myaing PDF စာတန်းပါ လက်မောင်းဘက်တံဆိပ်များ၊ ဗုံးခိုကျင်း (၁)ခု၊ မော်တော်ယာဉ်မျိုးစုံ (၃)စီးနှင့် မော်တော်ဆိုင်ကယ်မျိုးစုံ (၅)စီးတို့ကို သိမ်းဆည်းရမိခဲ့ကြောင်း နစက၏ ထုတ်ပြန်ချက်အရ သိရသည်။

အလားတူ မြိုင်မြို့နယ်၊ ကန်ကြီးကျေးရွာအတွင်းသို့ဝင်ရောက်၍ ရှာဖွေဖော်ထုတ်ခြင်းများဆောင်ရွက်ခဲ့ကြောင်းသိရသည်။

ထိုသို့ ဆောင်ရွက်ခဲ့ရာ အဆိုပါကျေးရွာအခြေခံပညာမူလတန်းကျောင်းအတွင်းမှ လက်လုပ်လက်ပစ်ဗုံး (၁)လုံး၊ Nissan အမျိုးအစားမော်တော်ယာဉ် (၁)စီးနှင့် မော်တော်ဆိုင်ကယ်မျိုးစုံ (၁၅)စီးတို့ကို ဖော် ထုတ်သိမ်းဆည်းရမိခဲ့ကြောင်း သိရသည်။ 

လက်ရှိတွင် လုံခြုံရေးတပ်ဖွဲ့ဝင်များအနေဖြင့် မြိုင်မြို့နယ်အတွင်း PDF အမည်ခံအကြမ်းဖက်သမားများခိုအောင်းနေထိုင်မှုမရှိစေရေးနှင့် တရားဥပဒေစိုးမိုးရေးအတွက် လိုအပ်သည့် လုံခြုံရေးလုပ်ငန်းများကို ဆက်လက်ဆောင်ရွက်သွားမည်ဖြစ်ကြောင်း နစကမှ ထုတ်ပြန်ထားသည်။

zawgyi version