Pika (NSS) - စက်တင်ဘာ ၁ဝ

မြောက်ကိုရီးယားနိုင်ငံဟာ နျူကလီးယားလက်နက်အရေအတွက်ကို လျင်လျင်မြန်မြန်တိုးမြှင့်ဖို့အတွက် နျူကလီးယားအင်အားတည်ဆောက်ရေးမူဝါဒကို ကျင့်သုံးနေတယ်လို့ မြောက်ကိုရီးယားခေါင်းဆောင် ကင်ဂျုံအန်းက ထုတ်ဖော်ပြောဆိုခဲ့ပါတယ်။

မြောက်ကိုရီးယားနိုင်ငံ တည်ထောင်တဲ့နှစ်ပတ်လည်နေ့ စက်တင်ဘာလ (၉)ရက်နေ့မှာ ကင်ဂျုံအန်းက ယခုလိုမိန့်ခွန်းပြောကြားခဲ့တာဖြစ်တယ်လို့ နိုင်ငံပိုင်မီဒီယာ KCNA က ရေးသားဖော်ပြခဲ့ပါတယ်။ ကင်ဂျုံအန်းက 'မြောက်ကိုရီးယားနိုင်ငံဟာ ၎င်းရဲ့လုံခြုံရေးအခွင့်အရေးတွေကို အာမခံနိုင်ဖို့အတွက် နျူကလီးယားစွမ်းရည်တွေနဲ့ အဆင့်သင့်ဖြစ်မှုတွေကို အချိန်မရွေးမှန်ကန်စွာအသုံးပြုဖို့ ပြင်ဆင်မှုတွေကို ပိုမိုလုပ်ဆောင်ရပါမယ်”လို့ ပြောဆိုခဲ့ပါတယ်။

ဒါ့ပြင် အမေရိကန်နဲ့၎င်းရဲ့မိတ်ဖက်နိုင်ငံတွေရဲ့  အမျိုးမျိုးသောခြိမ်းခြောက်မှုတွေကို ရင်ဆိုင်ဖို့အတွက် အားကောင်းတဲ့စစ်တပ်တည်ရှိမှုကို လိုအပ်တယ်လို့လည်း ကင်ဂျုံအန်းက ပြောကြားခဲ့ပါတယ်။ ကင်ဂျုံအန်းဟာ  ခေတ်မီရေတပ်အခြေစိုက်စခန်းအသစ်တစ်ခု တည်ဆောက်ရာနေရာကို သွားရောက်လည်ပတ်ခဲ့ပြီး နိုင်ငံရေကြောင်းတပ်ဖွဲ့တွေကို ပိုမိုဖွံ့ဖြိုးတိုး တက်လာအောင်လုပ်ဆောင်ဖို့ ကတိပြုခဲ့ပြီးနောက် တစ်ရက်အကြာမှာ ယခုလိုပြောဆိုမှုတွေ ထွက်ပေါ်လာတာဖြစ်ပါတယ်။ မြောက်ကိုရီးယားနိုင်ငံဟာ အရှေ့ဘက်နဲ့အနောက်ဘက်ခြမ်းတို့မှာ ပင်လယ်ပြင်ရှိတာကြောင့် ယခုတည်ဆောက်နေတဲ့ ရေတပ်အခြေစိုက်စခန်းအသစ်ဟာ နိုင်ငံအတွက် အရေးပါတယ်လို့လည်း ကင်ဂျုံအန်းကပြောကြားခဲ့ပါတယ်။ ပြီးတော့ နိုင်ငံရေတပ်အတွက် အခြေစိုက်စခန်းအဖြစ်ဆောင်ရွက်မယ့် ခေတ်မီဆိပ်ကမ်းမြို့ကို တည်ဆောက်မယ့် အစီ အစဉ်တွေရှိတယ်လို့လည်း ကင်ဂျုံအန်းက ပြီးခဲ့တဲ့ရက်ပိုင်းမှာ ထုတ်ပြန်ပြောကြားခဲ့ပါတယ်။