ဂျန်ဇက် (NSS) - ဩဂုတ် ၃ဝ

ကမ္ဘာတဝန်း၌ ကြီးမားသောအပြောင်းအလဲများဖြစ်ပေါ်နေသော်လည်း တရုတ်နိုင်ငံအနေဖြင့် အမေရိကန်နိုင်ငံ နှင့် ကောင်းမွန်သော ဆက်ဆံရေးတည်ဆောက်မှုများကို ဆက်လက်ထိန်းသိမ်းသွားမည်ဖြစ်ကြောင်း တရုတ်သမ္မတ ရှီကျင့်ဖျင်က ကတိပြုပြောဆိုလိုက်သည်။ 

တရုတ်သမ္မတသည် ဘေးဂျင်းမြို့ကို ၂၀၁၆ ခုနှစ်နောက်ပိုင်း ပထမဆုံးအကြိမ်လာရောက်လည်ပတ်ခဲ့သော အမေရိကန်အစိုးရ၏အမျိုးသားလုံခြုံ ရေးအကြံပေးပုဂ္ဂိုလ် ဂျိတ်ဆူလီဗန် နှင့်တွေ့ဆုံဆွေးနွေးချိန်အတွင်းပြောဆိုခဲ့ခြင်းဖြစ်ကြောင်းသိရသည်။ ဂျိတ်ဆူလီဗန်သည် တရုတ်နိုင်ငံသို့ သုံးရက်ကြာသွားရောက်လည်ပတ်ခဲ့ပြီး တရုတ်သမ္မတရှီကျင့်ဖျင့်၊ တရုတ်နိုင်ငံခြားရေးဝန်ကြီး ဝမ်ယိအပြင် တရုတ်အစိုးရအဖွဲ့ အဆင့်မြင့်အရာရှိကြီးများနှင့်တွေ့ဆုံဆွေးနွေးခဲ့ကြောင်းသိရသည်။

တရုတ်နိုင်ငံနှင့် အမေရိကန်နိုင်ငံ၏ မဟာမိတ်များဖြစ်သော ဂျပန်၊ ဖိလစ်ပိုင်နိုင်ငံတို့ နှင့် လုံခြုံရေးကိစ္စများအငြင်းပွားမှုများရှိနေချိန်တွင် ဂျိတ်ဆူလီဗန်သည် တရုတ်နိုင်ငံသို့ သွားရောက်ခဲ့ခြင်းဖြစ်သည်။ တရုတ်သမ္မတက" ကမ္ဘာကြီးမှာ အခြေနေတွေနဲ့ စိတ်ဓါတ်ပိုင်းဆိုင်ရာအကြီးအကျယ်ပြောင်းလဲနေပေမယ့် တရုတ်နဲ့ အမေရိကန်နိုင်ငံကြား ဆက်ဆံရေး ကောင်းမွန်အောင်လုပ်ဆောင်သွားမယ်။ တရုတ်နဲ့အမေရိကန်နိုင်ငံကြား ဆက်ဆံရေးကောင်းမွန်စေဖို့၊ တည်ငြိမ်စေဖို့ အပြောင်းအလဲတွေလုပ်ဆာင်မှာမဟုတ်ဘူး၊ အမေရိကန်နိုင်ငံအနေနဲ့လည်း တစ်နိုင်ငံရဲ့အကျိုးစီးပွားကို ကာကွယ်နိုင်အောင် တရုတ်နိုင်ငံနဲ့ ပူးပေါင်းဆောင်ရွက်မယ်လို့မျှော်လင့်ထားတယ်" ဟုပြောသည်။

ဂျိတ်ဆူလီဗန်သည် တရုတ်နိုင်ငံခရီးစဉ်အတွင်း တရုတ်ကာကွယ်ရေး ဦးစီးချုပ်နှင့်လည်းတွေ့ဆုံဆွေးနွေးခဲ့ကြောင်းသိရသည်။ ဂျိတ်ဆူလီဗန်က အမေရိကန်သမ္မတ ဂျိုးဘိုင်ဒန်သည် လာမည့်သီတင်းပတ်များအတွင်း တရုတ်သမ္မတရှီကျင့်ဖျင့် နှင့်တွေ့ဆုံဆွေနွေးခွင့်ရရှိရန် မျှော်လင့်နေကြောင်းပြောသည်။တရုတ်-အမေရိကန်ဆက်ဆံရေး တည်ငြိမ်၊ ခိုင်မာ၊ ရေရှည်တည်တံ့ရေး ပန်းတိုင်မှာမူ ပြောင်းလဲမှုမရှိကြောင်း၊အပြန်အလှန်လေးစားမှု၊ ငြိမ်းချမ်းစွာ အတူယှဉ်တွဲနေထိုင်မှုနှင့် အပြန်အလှန် အကျိုးဖြစ်ထွန်းသော ပူးပေါင်းဆောင်ရွက်မှုအပေါ် အခြေခံထားသည့် ဆက်ဆံရေးမူကြီးမှာလည်း ပြောင်းလဲမှုမရှိကြောင်း၊ နိုင်ငံ၏အချုပ်အခြာအာဏာ၊ လုံခြုံရေးနှင့် ဖွံ့ဖြိုးတိုးတက်မှု အကျိုးစီးပွားများကို အခိုင်အမာကာကွယ်ထိန်းသိမ်းမည့် တရုတ်နိုင်ငံ၏ ရပ်တည်ချက်မှာလည်း ပြောင်းလဲမှုမရှိကြောင်း၊ တရုတ်သမ္မတက ထည့်သွင်းပြောဆိုခဲ့သည်။ တရုတ်ပြည်သူများနှင့် အမေရိကန်ပြည်သူများကြား အစဉ်အလာရှိသော ချစ်ကြည်ရင်းနှီးမှုကို ရှေ့ဆက်ရေးကြိုးပမ်းအားထုတ်မှုမှာလည်း ပြောင်းလဲမှုမရှိကြောင်း သမ္မတ ရှီက ပြောကြားခဲ့သည်။အမေရိကန်နိုင်ငံအနေဖြင့် တရုတ်နိုင်ငံနှင့်ရည်မှန်းချက်တူညီစွာ လုပ်ဆောင်မည်၊ အပြုသဘောဆောင်၍ ကျိုးကြောင်းဆီလျော်မှုဖြင့် တရုတ်နိုင်ငံနှင့် နိုင်ငံ၏ ဖွံ့ဖြိုးတိုးတက်မှုကို ရှုမြင်သုံးသပ်မည်၊ဖြစ်သလို စိန်ခေါ်မှုထက် အခွင့်အလမ်းအဖြစ် တစ်နိုင်ငံ၏ တိုးတက်မှုကို တစ်နိုင်ငံက ရှုမြင်သုံးသပ်ပြီးအင်အားကြီးနှစ်နိုင်ငံအနေဖြင့် မှန်ကန်သောလမ်းကြောင်းကို ရှာဖွေရေးအတွက် တရုတ်နိုင်ငံနှင့်အတူ ဆောင်ရွက်မည်ဟု မျှော်လင့်ကြောင်း သမ္မတ ရှီကျင့်ဖျင့်ကထပ်မံပြောဆိုခဲ့သည်။ ဂျိတ်ဆူလီဗန်သည် အဆိုပါ ခရီးစဉ်အတွင်း တောင်တရုတ်ပင်လယ်အရေး၊ ဖိလစ်ပိုင်အရေး၊ထိုင်ဝမ်အရေး ကိစ္စများကိုလည်းထည့်သွင်းဆွေးနွေးခဲ့ကြောင်းသိရသည်။