မြူနစ် (NSS) - ဩဂုတ် ၁၄

မြို့သိမ်းတိုက်ပွဲဖော်ဆောင်ခံရသည့် လွိုင်ကော်မြို့ပေါ်ရှိ ဌာနဆိုင်ရာရုံးအချို့တွင် ကွန်ပျူတာ နှင့်တန်ဖိုးကြီးပစ္စည်းများ ပျောက်ဆုံးနေသည့်အတွက် နိုင်ငံပိုင်ဘဏ္ဍာငွေများ ဆုံးရှုံးနစ်နာနေကြောင်း သိရှိရသည်။

KNDF နှင့်  PDF ပူးပေါင်းအဖွဲ့သည် ပြီးခဲ့သော (၂၀၂၃) ခုနှစ် နိုဝင်ဘာလ (၁၁) ရက်တွင် (၁.၁.၁.၁) စစ်ဆင်ရေးအမည်ဖြင့် လွိုင်ကော်မြို့ပေါ်တွင် မြို့သိမ်းတိုက်ပွဲကို ဖော်ဆောင်ခဲ့ကြသည်။

ယင်းကဲ့သို့ ဖော်ဆောင်သည့် တိုက်ပွဲများကြောင့် တပ်မတော်နှင့် KNDF ပူးပေါင်းအဖွဲ့တို့ကြား တိုက်ပွဲ အပြင်းအထန်ဖြစ်ပွားခဲ့သကဲ့သို့ ပြည်နယ်အစိုးရအဖွဲ့၏ ဌာနဆိုင်ရာရုံးများတွင် တာဝန် ထမ်းဆောင်နေသည့်ဝန်ထမ်းများသည်လည်း ဘေးလွတ်ရာသို့ ထွက်ပြေးတိမ်းရှောင်မှုများရှိခဲ့သည်။

ယင်းကဲ့သို့ တိုက်ပွဲဖြစ်ပွားပြီး လပိုင်းအကြာတွင် တပ်မတော်ဘက်က လွိုင်ကော်မြို့ကို ပြန်လည် ထိန်းချုပ်နိုင်ခဲ့ပြီး ကယားပြည် နယ်အစိုးရအဖွဲ့၏ အုပ်ချုပ်ရေးယန္တရားများသည်လည်း လက်ရှိတွင် ပြန်လည်လည်ပတ်နေလျက်ရှိကြောင်း သိရသည်။

သို့သော် လွိုင်ကော်မြို့ပေါ်ရှိ ဌာနဆိုင်ရာ ရုံးအချို့တွင် တန်ဖိုးကြီး ကွန်ပျူတာ၊ လက်ပ်တော့၊ မိတ္တူကူးစက်၊ ကား၊ ဆိုင်ကယ် အပါအဝင် ဌာနဆိုင်ရာပိုင်ရုံးပစ္စည်းများမှာ ပျောက်ဆုံးမှုများဖြစ်ပေါ်နေ ကြောင်း ကယားပြည်နယ်အစိုးရအဖွဲ့၏ ဌာနဆိုင်ရာ ရုံးများနှင့်နီးစပ်သူက NSS ကို ပြော သည်။

“ ပြည်နယ်အစိုးရအဖွဲ့ရုံးမှာလည်း ပစ္စည်းတွေ ပျောက်တယ်။ ဥပဒေချုပ်ရုံးတို့၊ ခရိုင်ထွေအုပ် ရုံးမှာလည်း ပစ္စည်းတွေပျောက်တာရှိတယ်။ ဝန်ထမ်းတွေက ပြီးစလွယ်ထွက်ပြေးကြတော့ အဲဒါတွေ လည်း ပါတာပေါ့။ အဲဒီရုံးတွေက တိုက်ပွဲကျသွားတဲ့အထဲမှာ မပါဘူးလေ။ ရုံးပစ္စည်းတွေ မိတ္တူကူးစက် တွေဆိုရင် သိန်း (၁၅၀)၊ (၂၀ဝ)တန်တဲ့ဟာတွေ၊ လက်ပ်တော့တွေ ပျောက်နေတာရှိတယ်။ နိုင်ငံတော်ပိုင် ပိုက်ဆံတွေ အလဟဿဆုံးရှုံးတာပေါ့။ ပျောက်ဆုံးနေတဲ့ ပစ္စည်းတွေ တော်တော်များများရှိတယ်။ အဓိကတော့ ကွန်ပျူတာတွေ၊ လက်ပ်တော့တွေ၊ ဆိုင်ကယ်တွေ၊ အဲဒီရုံးတွေမှာရှိတဲ့ ကားတွေပါ ပျောက် ကုန်တာ။ (၁.၁.၁.၁) ကာလအတွင်းမှာ ဖြစ်သွားတာ။ အဲဒီ ရုံးတွေကို သူပုန်မသိမ်းနိုင်လိုက်ဘူး။ သူပုန် မသိမ်းနိုင်တဲ့ နေရာတွေမှာပါ အဲဒီလိုတွေဖြစ်တာ။ သူပုန်သိမ်းသွားတဲ့ဟာတွေ ဆိုရင်တော့ ပြောမနေ နဲ့တော့။ ပြီးတော့ သူနာပြုကျောင်းထဲမှာရှိတဲ့ ကွန်ပျူတာတွေ အကုန် အခိုးခံရတယ်လို့ ကြားတယ်။ သတင်းကြားတာဆိုရင် ကွန်ပျူတာတက္ကသိုလ်ဆိုရင် အလုံးရေ (၅၀ဝ)ကျော် ပျောက်နေတယ်လို့ ကြားတယ်” ဟု လွိုင်ကော်မြို့ပေါ်ရှိ ဌာနဆိုင်ရာ ရုံးများနှင့်နီးစပ်သူက ပြောသည်။

လွိုင်ကော်တွင်အခြေစိုက်သော ပြန်ကြားရေး ဝန်ကြီးဌာနရုံး၌ ရုံးသုံးပစ္စည်းမျိုးစုံအပြင် အဆိုးရွား ဆုံးခိုးယူခံရမှုအဖြစ် ရွေ့လျားစာကြည့်တိုက်ကား၏ အင်ဂျင်တုံးကိုပါ စနစ်တကျဖြုတ်ယူခံရခြင်းမျိုး ဖြစ်သည်။ ဌာနအကြီးအကဲတစ်ဦးက ထုတ်ပြလာသော ဓာတ်ပုံမှတ်တမ်းအရ အများပြည်သူဝန်ဆောင်မှုပေး သော မိုဘိုင်းကား၏အင်ဂျင်ခန်းသည် မည်သည့်ပစ္စည်းမှ မရှိတော့သည့်အပြင် ပြန်လည်သုံးစွဲရသော ကားအစိတ်အပိုင်းကောင်းကောင်းတစ်ခုမှ ကျန်ရှိတော့ခြင်းမရှိသည်ကို တွေ့ရသည်။     

အလားတူ လွိုင်ကော်မြို့တောင်ဘက်ခြမ်း၊ အရပ်သားပြည်သူပိုင်နေအိမ်များရှိ အိမ်တွင်းပစ္စည်းများသည်လည်း ခိုးယူခံရမှုများရှိနေကြောင်း သိရသည်။ “လွိုင်ကော်တောင်ဘက်ခြမ်းက တိုက်ပွဲကျ မသွားဘူးလေ။ မကျသွားတဲ့ ကပ်လျက်ကအိမ်တွေ ကို သွားကြည့်လိုက် ဘာမှမရှိတော့ဘူးလေ။ မီးဖိုချောင် သုံးပစ္စည်းတွေ၊ အဝတ်အစားတွေ၊ ကားတွေ၊ ဆိုင်ကယ်တွေဆိုရင် အရင်ဆုံးခိုး၊ ရေခဲသေတ္တာတွေ၊ တီဗီတွေကိုပါ ခိုးတာ။ နောက်ပိုင်းကျ ခိုးစရာမရှိရင် အိမ်ထဲမှာရှိတဲ့ ပရိဘောဂတွေကိုပါ ခိုးပြီးရောင်းတာ။ အဲဒီအိမ်တွေထဲမှာလည်း ပစ္စည်းတွေက ဘာမှကို မကျန်တော့ဘူး။ ပြည်သူလူထုက ပြန်လာရင် ငိုမှာ”ဟု ၎င်း က ဆက်လက်ပြောသည်။

လွိုင်ကော်မြို့တွင် KNDF ပူးပေါင်းအဖွဲ့ ဖော်ဆောင်သည့် မြို့သိမ်းတိုက်ပွဲကြောင့် အရပ်သား ပြည်သူလူထု၏ နေအိမ်များစွာအပါအဝင် ဌာနဆိုင်ရာရုံးအချို့သည်လည်း ထိခိုက်ပျက်စီးမှုများ ဖြစ်ပေါ်ခဲ့ရသည်။ (၁.၁.၁.၁)စစ်ဆင်ရေးကာလအတွင်း လွိုင်ကော်မြို့၏ (၇၀)ရာခိုင်နှုန်းခန့်သည် တိုက်ပွဲများ ကြောင့် ပျက်စီးထိခိုက်ခဲ့ရပြီး ဒေသခံစစ်ဘေးရှောင် ပြည်သူလူထုသည်လည်း လက်ရှိအချိန်အထိ နေရပ်သို့ အလုံးစုံပြန်လည်အခြေချနိုင်ခြင်းမရှိသေးကြောင်း သိရှိရသည်။