ALynn (NSS) - ဇူလိုင် ၃၁

ဘီလာရုစ်သမ္မတ အလက်ဇန်းဒါးလူကာရှန်ကိုသည် အကြမ်းဖက်မှုနှင့် အခြားစွဲချက်များဖြင့် သေဒဏ်ချမှတ်ခံထားရသည့် ဂျာမန်နိုင်ငံသား Rico Krieger အား လွတ်ငြိမ်းချမ်းသာခွင့် ပေးလိုက်ကြောင်း BelTA နိုင်ငံပိုင် သတင်းအေဂျင်စီက အင်္ဂါနေ့ (ဇူလိုင်လ ၃၀ ရက်) တွင် ဖော်ပြခဲ့သည်။ မီဒီယာများ၏ဖော်ပြချက်အရ Minsk တရားရုံးသည် အသက် ၂၉ နှစ်အရွယ် Krieger အား ရာဇ၀တ်ကျင့်ထုံးဥပဒေပုဒ်မ ၆ အရ အပြစ်ရှိကြောင်း တွေ့ရှိခဲ့သည်။ ၎င်းသည် ပြီးခဲ့သည့် ဆောင်းဦးရာသီတွင် ယူကရိန်းလုံခြုံရေးဝန်ဆောင်မှု (SBU) ၏အမိန့အရ ရထားလမ်းပေါ်တွင် အကြမ်းဖက်တိုက်ခိုက်ရန် ရည်ရွယ်ချက်ဖြင့် ဘီလာရုစ်နိုင်ငံသို့ သွားရောက်ခဲ့ကြောင်း သိရသည်။

“သူစွဲချက်တင်ခံထားရတဲ့ ရာဇ၀တ်မှုတွေကို ကျူးလွန်ခြင်းကြောင့် Krieger ကို အပြည့်အဝ စီရင်ချက်ချမှတ်ထားပါတယ်” ဟု KGB စုံစမ်းစစ်ဆေးရေးဌာန၏ လက်ထောက်အကြီးအကဲ Aleksandr Grib က အင်္ဂါနေ့တွင် Lukashenko နှင့် တွေ့ဆုံပြီးနောက် သတင်းထောက်များအား ဖော်ပြခဲ့သည်။ ဂျာမန်အမျိုးသားသည် “လူထုခေါင်းဆောင်လုပ်ဆောင်မှု၊ အေးဂျင့်လုပ်ဆောင်မှု၊ အကြမ်းဖက်မှုလုပ်ရပ်၊ အစွန်းရောက်ဖွဲ့စည်းမှုဖန်တီးမှု၊ ယာဉ် သို့မဟုတ် ဆက်သွယ်ရေးလိုင်းများကို ရည်ရွယ်ချက်ရှိရှိ ဖျက်ဆီးမှု၊ လက်နက်ခဲယမ်း၊ ဖောက်ခွဲရေးပစ္စည်းတွေနဲ့ ဆက်စပ်ပြီး တရားမ၀င် ဆောင်ရွက်မှု”အစရှိသော ရာဇဝတ်မှုများကို ကျူးလွန်ခဲ့ကြောင်းသိရသည်။

Belarus-1 နိုင်ငံပိုင်မီဒီယာနှင့် အင်တာဗျူးတွင် Krieger က SBU သည် Belarus ရှိ စစ်ဘက်ဆိုင်ရာ နေရာများကို ဓာတ်ပုံရိုက်ရန်နှင့် မြို့တော် Minsk အနီးရှိ ရထားလမ်းပေါ်တွင် ဖောက်ခွဲရေး ပစ္စည်းများ ထားရှိရန် အမိန့်ပေးခဲ့သည်ဟု Krieger က ပြောကြားခဲ့သည်။ ဖောက်ခွဲရေးပစ္စည်းများ ပေါက်ကွဲသွားသော်လည်း ထိခိုက်ဒဏ်ရာရရှိမှုမရှိကြောင်း သိရသည်။ 

ပေါက်ကွဲမှုအပြီးတွင် Krieger သည် အဇာဘိုင်ဂျန်နိုင်ငံ Baku သို့ ပျံသန်းရန် စီစဉ်ခဲ့သော်လည်း ဘယ်လာရုစ် အထူးတပ်ဖွဲ့များက ထိန်းသိမ်းခဲ့သည်။ ဂျာမန်နိုင်ငံသားက သူ့လုပ်ရပ်အတွက် နောင်တရပြီး Lukashenko ထံမှ လွတ်ငြိမ်းချမ်းသာခွင့် ရမည်ဟု မျှော်လင့်ကြောင်း ပြောကြားခဲ့သည်။ Krieger သည် အဆိုပါ စီရင်ချက်ကို ချက်ခြင်း အယူခံဝင်ခြင်းမရှိကြောင်း သိရသည်။ ဇူလိုင်လ ၃၀ ရက်နေ့တွင်၎င်းသည် ဘယ်လာရုစ်သမ္မတထံ တရားဝင်လွတ်ငြိမ်းချမ်းသာခွင့်တောင်းဆိုခဲ့သည်။

"အခြေအနေအားလုံးကိုထည့်သွင်းစဉ်းစားပြီး Krieger ၏ တောင်းဆိုချက်ကို ခွင့်ပြုရန် နိုင်ငံတော် အကြီးအကဲသည်ဆုံးဖြတ်ချက်ချခဲ့သည်" ဟု BelTA ကရေးသားခဲ့သည်။ Krieger ၏ LinkedIn ပရိုဖိုင်ကို ကိုးကား၍ မီဒီယာအစီရင်ခံချက်များအရ ၎င်းသည် ယခင်က ဂျာမန်ကြက်ခြေနီအတွက် ဆေးဘက်ဆိုင်ရာဝန်ထမ်းအဖြစ်နှင့် ဘာလင်မြို့ရှိ အမေရိကန်သံရုံးတွင် လုံခြုံရေးအရာရှိအဖြစ် ယခင်က လုပ်ဆောင်ခဲ့ဖူးကြောင်းသိရသည်။