Pika (NSS) - ‌ဇွန် ၂

အင်ဒိုနီးရှားအစိုးရသည် နိုင်ငံ၏ မြို့တော်အသစ်ဖြစ်လာမည့် နူဆန်တာရာမြို့ကို ဘော်နီယို ကျွန်းအရှေ့ဘက်ကမ်းရိုးတန်းရှိ အရှေ့ကာလီမန်တန် ပြည်နယ်တွင်တည်ဆောက်နေကြောင်းသိရသည်။ နူဆန်တာရာမြို့တော်သည် အင်ဒိုနီးရှား နိုင်ငံ၏ အနာဂတ်မြို့တော်သစ် ဖြစ်လာမည်ဖြစ်ပြီး ၂၀၂၄ ခုနှစ် ဩဂုတ်လ(၁၇)ရက်နေ့တွင် ဖွင့်ပွဲကျင်းပရန် စီစဉ်ထားကြောင်းသိရသည်။နူဆန်တာရာမြို့ကို အင်ဒိုနီးရှားနိုင်ငံ၏ မြို့တော်အဖြစ် ဂျာကာတာမြို့နေရာတွင်အစားထိုးသွားမည်ဖြစ်ပြီး လွတ်လပ်ရေး ရခဲ့သည့် ၁၉၄၅ ခုနှစ်နောက်ပိုင်း ပထမဆုံးအကြိမ် မြို့တော်အသစ် ပြောင်းလဲခြင်းဖြစ်ကြောင်းလည်း သိရသည်။

နူဆန်တာရာမြို့သည် ဧရိယာအကျယ်အဝန်း (၂၅၆၀) စတုရန်းကီလိုမီတာရှိမည်ဖြစ်ပြီး တောင် ကုန်းရှုခင်းများ၊ သစ်တော၊ သဘာဝပင်လယ်အော်တို့ဖြင့် ဝန်းရံထားမည်လည်းဖြစ်သည်။ နူဆန်တာရာ မြို့တော်အတွက် မြေရာရှင်းလင်းခြင်း၊ လမ်းများဖောက်လုပ်ခြင်းတို့နှင့်အတူ တည်ဆောက်မှုများကို ၂၀၂၂ ခုနှစ် ဇူလိုင်လတွင် စတင်ခဲ့ကြောင်းသိရသည်။

"Government Central Area zone" ဟု လူသိများသော အစောပိုင်းအဆင့်တွင် အစိုးရရုံးများ ၊ ကျောင်းများနှင့်ဆေးရုံများကို တည်ဆောက်မှုများပါဝင်မည်ဖြစ်သည်။ အဆိုပါ စီမံကိန်းသည် စုစုပေါင်း ကုန်ကျစရိတ် အမေရိကန် ဒေါ်လာ (၃၅)ဘီလျံခန့်ရှိမည်ဟု ခန့်မှန်းထားကြပြီး တည်ဆောက်မှုများတွင် အဆင့်(၅)ဆင့်ပါဝင်မည်ဖြစ်ကြောင်းလည်းသိရသည်။ 

နူဆန်တာရာမြို့တော်အတွက် အဆင့် (၁)ကို ၂၀၂၂ ခုနှစ် ဩဂုတ်လတွင်စတင်ခဲ့ပြီး အင်ဒိုနီး ရှားနိုင်ငံတစ်ဝန်းမှ အလုပ်သမားဦးရေ(၁၅၀ဝဝဝ)မှ (၂)သိန်းဝန်းကျင်ထိ ပါဝင်ခဲ့ကြောင်းသိရ သည်။ထို့ ပြင် နူဆန်တာရာမြို့တော် စီမံကိန်းကို ၂၀၄၅ခု နှစ်တွင် အပြီးသတ်နိုင်မည်ဟု မျှော်လင့်ထားကြ ကြောင်းလည်းသိရသည်။ အင်ဒိုနီးရှားရွေးကောက်ခံသမ္မတ ပရာဘိုဝိုစူဘီယန်တို ၏ ကျမ်းသစ္စာ ကျိန်ဆိုပွဲအတွက် အချိန် မီ ၂၀၂၄ခုနှစ် အောက်တိုဘာလတွင် နူဆန်တာရာမြို့တော်သို့ နိုင်ငံ့ဝန်ထမ်း ပေါင်း(၆)ထောင်ခန့် ပြောင်းရွှေ့သွားနိုင်ဖွယ်ရှိနေကြောင်းလည်းသိရသည်။

၂၀၂၄ ခုနှစ်အကုန်တွင် နူဆန်တာရာမြို့တော်သို့ နိုင်ငံ့ဝန်ထမ်းပေါင်း(၁၂၀ဝဝ)ခန့် ပြောင်း ရွှေ့နိုင်မည်ဟု အာဏာပိုင်များက မျှော်လင့်ထားကြသည်။ ထို့ပြင် အင်ဒိုနီးရှားသမ္မတရုံးပြီးလျှင် မြို့ပြ နှင့်အိမ်ရာဖွံ့ဖြိုးရေးဝန်ကြီးဌာနသည် ၂၀၂၄ခုနှစ် ဇူလိုင်လတွင် နူဆန်တာရာမြို့တော်သို့ ပြောင်းရွှေ့ သွားမည့် ပထမဆုံးသောဝန်ကြီးဌာန ဖြစ်လာမည်ဖြစ်ကြောင်းလည်းသိရသည်။

၂၀၁၇ ခုနှစ် ဧပြီလတွင် အင်ဒိုနီးရှားသမ္မတ ဂျိုကိုဝီဒိုဒို၏အစိုးရသည် ဂျာကာတာမြို့တော်ကို အစားထိုးရန် လှုပ်ရှားမှုကို ပြန်လည်စတင်ခဲ့ပြီး အဆိုပါ နှစ်အကုန်တွင် နိုင်ငံ၏မြို့တော်အသစ်အတွက် အလားအလာရှိသော အစားထိုးနေရာများကို အကဲဖြတ်သွားမည်ဟု ကတိပြုခဲ့ကြောင်း သိရသည်။ အင်ဒိုနီးရှားအစိုးရသည် မြို့တော်အသစ် အတွက်နေရာကို ဂျာဗားကျွန်းအပြင်ဘက်တွင် တည် ဆောက်ရန်ဆုံးဖြတ်ခဲ့ကြောင်း နိုင်ငံဖွံ့ဖြိုးတိုးတက်ရေး စီမံကိန်းဝန်ကြီးဌာန၏ အရာရှိများက ပြောကြား ခဲ့သည်။ အဆိုပါအစီအစဉ်ကို ထုတ်ပြန်ကြေညာပြီးနောက် မကြာမီ သမ္မတဂျိုကိုဝီဒိုဒိုသည် အရှေ့ ကာလီမန်တန်ပြည်နယ်ရှိ  Bukit Soeharto ဒေသနှင့်Palangka Raya မြို့အနီးရှိ တြိဂံဒေသသို့ သွားရောက် လည်ပတ်ခဲ့ကြောင်းသိရသည်။

ထို့နောက် အင်ဒိုနီးရှားအစိုးရသည် မြို့တော်အသစ်သို့ အစိုးရရုံးများအားလုံးကို ပြောင်းရွှေ့ မည့်(၁၀)နှစ်စီမံကိန်းကို ၂၀၁၉ခုနှစ် ဧပြီလတွင် ထုတ်ပြန်ကြေညာခဲ့သည်။ နိုင်ငံဖွံ့ဖြိုးတိုးတက်ရေး စီမံကိန်းဝန်ကြီးဌာနသည် ဂျိုကိုဝီဒိုဒိုသွားရောက် လည်ပတ်ခဲ့သည့် တောင်၊အလယ်ပိုင်းနှင့် အရှေ့ကာလီ မန်တန် ပြည်နယ်သုံးခုကို အကြံပြုခဲ့ပြီး ပြည်နယ်တစ်ခုချင်းစီသည်မြို့တော် အသစ်တစ်ခု၏ လိုအပ်ချက်များနှင့်ကိုက်ညီကြောင်းပြောဆိုခဲ့သည်။ နူဆန်တာရာမြို့အတွက် ပြောင်းရွှေ့မှု များကို ၁၉၆၀ ခုနှစ်တွင် မြို့တော်အသစ်ဖြစ်သော Brasilia မြို့ကို ရီယိုဒီဂျနေးရီးယိုးမြို့နေရာတွင် အစားထိုးခဲ့သော ဘရာဇီးနိုင်ငံထံမှ သင်ခန်းစာယူထား ခြင်းဖြစ်ကြောင်းသိရသည်။ မြို့ပြနှင့်အိမ်ရာဖွံ့ဖြိုးရေး ဝန်ကြီးဌာနသည် နူဆန်တာရာမြို့အတွက် ဒီဇိုင်းပြိုင်ပွဲကို ၂၀၁၉ ခုနှစ်နှောင်းပိုင်းတွင် ကျင်းပခဲ့ပြီး အနိုင်ရရှိသူမှာ Nagara Rimba Nusa ဟု ခေါ်သော အင်ဒိုနီးရှားဗိသုကာကုမ္ပဏီ Urban+ ဖြစ်ကြောင်း ၂၀၁၉ ခုနှစ် ဒီဇင်ဘာလ(၂၃)ရက်နေ့တွင် တရားဝင် ကြေညာခဲ့သည်။ ထို့ပြင် နူဆန်တာရာမြို့ ဒီဇိုင်းတွင် ပါဝင်ရန်အတွက် တရုတ်၊အမေရိကန်နှင့် ဂျပန်တို့မှ ဒီဇိုင်နာများကို အင်ဒိုနီးရှားအစိုးရက ကမ်းလှမ်းခဲ့ကြောင်းလည်း သိရသည်။

နူဆန်တာရာမြို့သည် ၎င်း၏ပတ်ဝန်းကျင်ရှိ ကာလီမန်တန်သစ်တောများကို ရေရှည်တည်တံ့ ခိုင်မာစေရန်နှင့် ကာကွယ်ရန်အတွက် ဒီဇိုင်း ဆွဲထားကြောင်းလည်းသိရသည်။

ထို့ပြင် နူဆန်တာရာမြို့၏ (၈၀)ရာခိုင်နှုန်းကို အများပြည်သူသယ်ယူပို့ဆောင်ရေး၊ စက်ဘီး စီးခြင်း သို့မဟုတ် လမ်းလျှောက်ခြင်းနှင့် အသုံးပြုမည့် စွမ်းအင်အားလုံးကို ပြန်လည်ပြည့်ဖြိုးမြဲ အရင်း အမြစ်များမှ ထုတ်ယူရန်အတွက် အသုံးပြုသွားမည်ဖြစ်ပြီး ဧရိယာ၏(၁၀)ရာခိုင်နှုန်းကို အစားအသောက် ထုတ်လုပ်ရန်အတွက် အသုံးပြုသွားမည်ဖြစ်သည်။

၂၀၂၂ ခုနှစ်တွင် မြို့ပြနှင့်အိမ်ရာဖွံ့ဖြိုးရေး ဝန်ကြီးဌာနသည် ဒုသမ္မတရုံး၊ ဥပဒေပြုလွှတ်တော်ရုံး အဆောက်အအုံ၊ တရားစီရင်ရေးရုံး အဆောက်အအုံနှင့် Pancasila ရေကန်ဘေးရှိ အများပြည်သူဝတ်ပြု ဆုတောင်းနိုင်မည့် အဆောက်အအုံအတွက် ဒီဇိုင်း ပြိုင်ပွဲကို ထပ်မံကျင်းပခဲ့ကြောင်းသိရသည်။

၂၀၂၂ ခုနှစ် ဇူလိုင်လတွင် အင်ဒိုနီးရှား အစိုးရသည် နိုင်ငံတစ်ဝန်းမှ အလုပ်သမား(၁)သိန်း ကို နူဆန်တာရာမြို့တည်ဆောက်မည့်နေရာသို့ စေလွှတ်ခဲ့ကြောင်းသိရသည်။ သို့သော်လည်း ဒေသခံအ လုပ်သမားများ လုံလောက်စွာပါဝင်ခြင်းမရှိသည့်အတွက် အဆိုပါဆုံးဖြတ်ချက်အပေါ် ပြစ်တင်ဝေဖန်မှု များ ထွက်ပေါ်လာခဲ့ကြောင်းသိရသည်။ အဆိုပါ ပြစ်တင်ဝေဖန်မှုများကို တုံ့ပြန်သည့်အနေဖြင့် သမ္မတဂျိုကိုဝီဒိုဒိုသည် နူဆန်တာရာမြို့တော် တည်ဆောက်မည့်နေရာတွင် ဒေသခံအလုပ်သမားများ ပါဝင်ကြောင်းသေချာစေရန်အတွက် အလုပ်သမားအင်အားကို (၁၅၀ဝဝဝ)မှ (၂)သိန်းကြားထိ တိုးမြှင့်ရန် နူဆန်တာရာမြို့ အာဏာပိုင်များကို ညွှန်ကြားခဲ့ကြောင်း သိရသည်။ သို့သော်လည်း ကိုဗစ်(၁၉)ကပ် ရောဂါ ကာကွယ်ဆေးထိုးနှံမှု မပြီးဆုံးခင်အချိန် ၂၀၂၂ ခုနှစ် မတ်လအထိ ဆောက်လုပ်ရေးလုပ်ငန်းများ နှောင့်နှေးခဲ့ရကြောင်းလည်းသိရသည်။ ထို့ပြင် ငွေကြေး မလုံလောက်မှုများကြောင့် ၂၀၂၂ခုနှစ် မတ်လ တွင် ဂျပန် SoftBank Group ကုမ္ပဏီသည် အဆိုပါ စီမံကိန်းမှ နုတ်ထွက်ခဲ့ကြောင်းသိရသည်။ အင်ဒိုနီးရှားအစိုးရသည် အဆိုပါစီမံကိန်း ရန်ပုံငွေ၏ (၁၉ဒသမ၂)ရာခိုင်နှုန်းကိုသာ ထောက်ပံ့ ပေးမည်ဖြစ်ပြီး အခြားရန်ပုံငွေများမှာ ပြည်တွင်းနှင့် ပြည်ပ ရင်းနှီးမြှုပ်နှံသူများထံမှ ရရှိရန်စီစဉ်ထား ခြင်းဖြစ်ကြောင်းသိရသည်။ တောင်ကုန်းရှုခင်းပါဝင်သော နူဆန်တာရာမြို့သည် ကမ္ဘာပေါ်တွင် တတိယ မြောက် အကြီးဆုံးကျွန်းတစ်ခုဖြစ်သော ဘော်နီယိုကျွန်းအရှေ့ဘက်ကမ်းရိုးတန်းတွင် တည်ရှိမည် ဖြစ်သည်။အဆိုပါမြို့တော်သည် အရှေ့ကာလီမန်တန်ပြည်နယ်နှင့် နယ်နိမိတ်ချင်းထိစပ်နေပြီး အရှေ့ ဘက်တွင် Makassar ရေလက်ကြားနှင့် တောင်ဘက်တွင် Balikpapan ပင်လယ်အော်အထိရှည်သော ကမ်းရိုးတန်းလည်း ပါရှိမည်ဖြစ်သည်။