စော (NSS) - ဧပြီ ၉

မန္တလေးတိုင်း၊ အောင်မြေသာစံမြို့နယ်ရှိ လင်းလက်ဝါ‌ရွှေပန်းတိမ်ဆိုင်ကို ရဲယူနီဖောင်းဝတ်ဆင်ကာ ဓားပြတိုက် လုယက်သူ (၇)ဦးကို ဖမ်းဆီးရမိခဲ့ကြောင်း နစက၏ ထုတ်ပြန်ချက်များအရ သိရသည်။

ပြီးခဲ့သည့် မတ်လ ၂၈ ရက်နေ့၊ ညနေ (၅)နာရီဝန်းကျင်အချိန်တွင် အောင်မြေသာစံမြို့နယ်၊ ၂၂လမ်း နှင့် ၈၉လမ်းထောင့်ရှိ ရွှေပန်းတိမ်ဆိုင်ကို လုံခြုံရေးတပ်ဖွဲ့ဝင်များ ပုံသဏ္ဌာန်အသွင် ယူဝတ်ဆင်ထားသည့် အမျိုးသားလေးဦးသည် အဖြူရောင်ယာဉ်တစ်စီးနှင့်အတူရောက်ရှိလာပြီး နေအိမ်အတွင်းသို့ ဝင်ရောက်လာခဲ့ကြောင်း သိရသည်။

အဆိုပါနေအိမ်အတွင်းသို့ ဧည့်စာရင်းစစ်ရန်နှင့် လူများစစ်ဆေးရန်ရှိသည်ဟု ပြောဆို၍ အိမ်ရှင်များအား တွန်းထိုးရိုက်နှက်ပြီး နေအိမ်အပေါ်ထပ်ရှိ အခန်းများကို ပြသခိုင်းကာ တတိယထပ်ရှိ ရွှေထည်ပစ္စည်းများထားသည့် မီးခံသေတ္တာကို ဖွင့်ခိုင်း၍ မီးခံသေတ္တာအတွင်းမှ ငွေကျပ်သိန်း (၁)သောင်း‌ကျော်တန်ဖိုးရှိသော ရွှေထည်ပစ္စည်းမျိုးစုံ အလေးချိန် (၂)ပိဿာခွဲခန့် လုယက်ယူဆောင်သွားခဲ့ကြောင်း သိရသည်။

ကျူးလွန်သူများကို ဖမ်းဆီးရမိနိုင်ရေးအတွက် အောင်မြေသာစံမြို့နယ်၊ အမှတ်(၅)မြို့မရဲ စခန်းတွင် ရာဇသတ်ကြီး ပုဒ်မ ၃၉၄/၁၁၄ ဖြင့် အမှုရေးဖွင့်ခဲ့ရာ ပြစ်မှုကျူးလွန်သူ အမျိုး သား(၄)ဦးအနက် ပုသိမ်ကြီးမြို့နယ်၊ အောင်သုခရပ်ကွက်နေ မြတ်သူအောင် (၂၄)နှစ်ကို ပြီးခဲ့သည့် ဧပြီလ ၇ ရက်နေ့၊ ည၁၂နာရီခွဲအချိန်တွင် ၎င်း၏နေအိမ်၌ ဖမ်းဆီးရမိခဲ့ကြောင်း သိရသည်။

မြတ်သူအောင်၏ထွက်ဆိုချက်အရ ပြစ်မှုကျူးလွန်ရာတွင်ပါဝင်သူ ပုသိမ်ကြီးမြို့နယ်၊ နတ် စိမ်းကျေးရွာနေ ပန်တိမ်လုပ်ငန်းလုပ်ကိုင်သူ စိုးမိုးဦး (၂၄)နှစ်၊ တစ်ရွာတည်းနေ ကျဘမ်းလုပ်ကိုင်သူ ညီထူးအောင်(ခ)ညီညီ (၂၃)နှစ်၊ ကံကွဲကျေးရွာနေ ပန်းတိမ်လုပ်ငန်းလုပ်ကိုင်သူ မျိုးကို(ခ)မျိုးကိုကို(ခ)အား‌ကွေ့ (၂၅)နှစ်အား ယမန်နေ့ ဧပြီလ ၈ ရက်နေ့က ၎င်းတို့၏ နေ အိမ်အသီးသီးတွင် ဖမ်းဆီးရမိခဲ့ကြောင်း သိရသည်။

ဖမ်းဆီးရမိသူများ၏ ထွက်ဆိုချက်များအရ “လင်းလက်ဝါ” ရွှေပန်းထိမ်ဆိုင်အား လုယက်ဓားပြတိုက်ရန် သတင်းပေးခဲ့သူ အောင်မြေသာစံမြို့နယ်၊ ဌာနေအရှေ့ရပ်ကွက်၊ အကွက် (၂၁)၊ ဘုရားငါးဆူဝန်းနေ ရွှေပန်းထိမ်လုပ်ငန်းလုပ်ကိုင်သူ ကိုကိုနိုင်(ခ)ကိုနိုင် (၄၂)နှစ်ကို ၎င်း၏ နေအိမ်၌ ဖမ်းဆီးရမိခဲ့ကြောင်း သိရသည်။

ထို့ပြင် ရွှေထည်ပစ္စည်းများအား ကော်ခွာခြင်း၊ ရွှေအရည်ကျိုခြင်းများ ကူညီလုပ်ကိုင်ပေးသူ ပုသိမ်ကြီးမြို့နယ်၊ နတ်စိမ်းကျေးရွာနေ လက်သမားလုပ်ကိုင်သူ မင်းမင်းစိုး(ခ)တုတ်ကြီး (၂၃)နှစ် နှင့် ဓားပြတိုက်ရန်အတွက် ကိုကိုနိုင်(ခ)ကိုနိုင်ကို မြတ်သူအောင်နှင့် ချိတ်ဆက်တွေ့ဆုံပေးပြီး လိုင်စင်မဲ့မော်တော်ယာဉ် နှင့် သေနတ်ဝယ်ယူပေးသူ ချမ်းမြသာစည်မြို့နယ်၊ ထွန်တုံးရပ်ကွက်နေ ကားအရောင်းအဝယ်လုပ်ငန်းလုပ်ကိုင်သူ ထက်လှိုင်(ခ)ကိုလှိုင်ကြီးတို့ကို ၎င်းတို့၏နေအိမ်အသီးသီး၌ ထပ်မံဖော်ထုတ်ဖမ်းဆီးရမိခဲ့ကြောင်း သိရသည်။

ပြစ်မှုကျူးလွန်သူ မြတ်သူအောင်၊ စိုးမိုးဦး၊ ညီထူးအောင်(ခ)ညီညီ၊ မျိုးကို(ခ)မျိုးကိုကို(ခ)အားကွေ့၊ မင်းမင်းစိုး(ခ)တုတ်ကြီး၊ ကိုကိုနိုင်(ခ)ကိုနိုင်နှင့် ထက်လှိုင်(ခ)ကိုလှိုင်ကြီးတို့(၇)ဦးတို့ကို (၁၂) ရက်အတွင်း ဖော်ထုတ်ဖမ်းဆီးရမိခဲ့ပြီး ၎င်းတို့ထံမှ ရွှေထည်ပစ္စည်းများ နှင့် Mark II 99 အဖြူရောင်မော်တော်ယာဉ်တစ်စီး၊ ပစ္စတိုသေနတ်တစ်လက်တို့အား သိမ်းဆည်းရမိခဲ့ကြောင်း သိရသည်။ ပြစ်မှုကျူးလွန်သူများအား ဥပဒေနှင့်အညီ ထိရောက်စွာအရေးယူဆောင်ရွက်နိုင်ရေး ဆောင်ရွက်လျက်ရှိကြောင်း သိရသည်။