ယွန်း (NSS) - မတ် ၂၁

ပုပ္ပါးတောင်အား အမျိုးသားအဆင့်ဘူမိဥယျာဥ်မှတစ်ဆင့် ကမ္ဘာ့အဆင့်ဘူမိဥယျာဥ်အဖြစ် သတ်မှတ်နိုင်ရေး ဆက်လက်အကောင်အထည်ဖော်ရန် ဆောင်ရွက်သွားမည်ဖြစ်ကြောင်း သိရသည်။

သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန ဒုတိယဝန်ကြီး ဦးမင်းသူက မတ်လ(၂၀)ရက်က ကျင်းပခဲ့သည့် ပုပ္ပါးတောင်အမျိုးသားဘူမိ ဥယျာဥ်ဖွင့်ပွဲအခမ်းအနားတွင် အထက်ပါကဲ့သို့ ပြောကြားခဲ့ခြင်းဖြစ်သည်။

ပုပ္ပါးတောင်အား အမျိုးသားဘူမိဥယျာဥ်အဖြစ် စတင်ဖွင့်လှစ်ခဲ့ပြီး ဘူမိအမွေ အနှစ်များ အပါအဝင် ဇီဝမျိုးစုံမျိုးကွဲများ၊ ယဥ်ကျေးမှု နှင့် ရှေးဟောင်းအမွေ အနှစ်များ၊ လူနေမှုဓလေ့ထုံတမ်းများကို စနစ်တကျထိန်းသိမ်းထားပြီး ပညာပေးရေး၊ သုတေသနဖွံ့ဖြိုးရေးနှင့် ဒေသခံပြည်သူများ စဥ်ဆက်မပြတ် ဖွံ့ဖြိုး တိုးတက်ရေးအတွက် စနစ်တကျအုပ်ချုပ်ထားသည့် နိုင်ငံအဆင့်အရေးပါသော နေရာတစ်ခုဖြစ်ကြောင်း သိရသည်။

ပုပ္ပါးတောင်အမျိုးသားဘူမိဥယျာဥ်ကို ဘူမိနယ်မြေ (၁၅)ခုနှင့် ဖွဲ့စည်းထားပြီး သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနအနေဖြင့် သဘာဝသယံဇာအမွေအနှစ်များကို ရေရှည်တည်တံ့စေရန် ဇီဝမျိုးစုံမျိုးကွဲများ၊ ဂေဟစနစ်နှင့် ထူးခြားသောဘူမိသွင်ပြင်များကို သဘာဝထိန်းသိမ်းရေး နယ်မြေအဖြစ် သတ်မှတ်ပြီး ကာကွယ်ထိန်းသိမ်းလျက်ရှိကြောင်း ဒုဝန်ကြီးက ဆိုသည်။

ဝန်ကြီးဌာနအနေဖြင့် နိုင်ငံဧရိယာ၏(၁၀)ရာခိုင်နှုန်းကို သဘာဝထိန်းသိမ်းရေးနယ်မြေများအဖြစ် ဖွဲ့စည်းနိုင်ရေးဆောင်ရွက်လျက်ရှိပြီး သဘာဝထိန်း သိမ်းရေးနယ်မြေ(၅၉)ခု၊ နိုင်ငံဧရိယာ၏ ၆ ဒသမ ၄၂ ရာခိုင်နှုန်းကို ဖွဲ့စည်းသတ်မှတ်ပြီးဖြစ်ကြောင်း သိရသည်။ ပုပ္ပါးတောင်သည် ကမ္ဘာ့အဆင့် ဘူမိအမွေအနှစ်၊ သမိုင်းကြောင်း ယဥ်ကျေးမှုနှင့် ထူးခြားရှားပါးသည့် ဇီမျိုးစုံမျိုးကွဲများ ပေါကြွယ်ဝသည့်အတွက် အားလုံး ပူးပေါင်းဆောင်ရွက်မှသာ အမျိုးသားအဆင့်ဘူမိဥယျာဥ်မှဆစ်ဆင့် ကမ္ဘာ့အဆင့်ဘူမိဥယျာဥ်သတ်မှတ်ခံရရေးကို အကောင်အထည်ဖော်နိုင်မည်ဖြစ်ကြောင်း ဒုဝန်ကြီးက ဆက် လက်ပြောသည်။

UNESCO ၏ ကမ္ဘာ့ဘူမိဥယျာဉ် အစီအစဉ်ကို ၂ဝဝ၁ ခုနှစ်တွင်စတင်ခဲ့ပြီး လက်ရှိနိုင်ငံပေါင်း ၄၆ နိုင်ငံတွင် ကမ္ဘာ့ဘူမိဥယျာဉ် ၁၇၇ ခု သတ်မှတ်ထားပြီး ဖြစ်ကြောင်းနှင့် တရုတ်နိုင်ငံတွင် ကမ္ဘာ့ဘူမိဥယျာဉ် (၃၉)ခု၊ ထိုင်း၊ အင်ဒိုနီးရှား၊ ဗီယက်နမ်နှင့် မလေးရှားနိုင်ငံတို့တွင်လည်း ကမ္ဘာ့ဘူမိဥယျာဉ်များရှိကြောင်း သိရသည်။