Pika (NSS) - ဖေဖော်ဝါရီ ၂၄ 

ရုရှားထောက်လှမ်းရေးလေယာဉ် A-50 ကို Azov ပင်လယ်ပြင်တွင် ပစ်ချခဲ့ကြောင်း ယူကရိန်းတပ်ဖွဲ့များက ဖေဖော်ဝါရီလ(၂၃)ရက်တွင် ထုတ်ဖော်ပြောခဲ့သည်။

ထို့အပြင် A-50 ထောက်လှမ်းရေးလေယာဉ် ရုရှားနိုင်ငံတောင်ပိုင်းတွင် ပျက်ကျခဲ့သည်ကို ပြသသည့်မြေပုံတစ်ခုကို ယူကရိန်းတပ်ဖွဲ့များက အွန်လိုင်းပေါ်တွင် မျှဝေခဲ့ကြောင်းလည်း သိရသည်။ အဆိုပါသတင်းနှင့်ပတ်သက်ပြီး ရုရှား ဖက်က တရားဝင် မှတ်ချက်ပြုပြောဆိုခြင်းမျိုးမရှိသေးကြောင်း သိရသည်။ 

သို့သော်လည်း ရုရှားနိုင်ငံတောင်ပိုင်း Krasnodar ဒေသရှိ အာဏာပိုင်များက ထောက်လှမ်းရေးလေယာဉ် ပျက်ကျသည့်နေရာတွင် မီးသတ်သမားများရောက်ရှိနေပြီဖြစ်ကြောင်း ပြောဆိုခဲ့သော်လည်း နောက်ထပ် အသေးစိတ်အချက်အလက်များကို ထုတ်ဖော်ပြောဆိုခဲ့ခြင်းမျိုး မရှိကြောင်း သိရသည်။

ယူကရိန်းစစ်ထောက်လှမ်းရေးက "ယူကရိန်းတပ်ဖွဲ့တွေဟာ ရုရှားရဲ့ အဖိုးတန် A-50 ထောက်လှမ်းရေးလေယာဉ်ကို Azov ပင်လယ်ပြင်မှာ ပစ်ချခဲ့ပါတယ်။ A-50 ထောက်လှမ်းရေးလေယာဉ်ကို ပစ်ချနိုင်ခဲ့တာဟာ ရုရှားနိုင်ငံရဲ့ စွမ်းဆောင်ရည်အတွက် ပြင်းထန်တဲ့ထိုးနှက်ချက်တစ်ခုပါပဲ" ဟု ပြောခဲ့သည်။

A-50 လေယာဉ်သည် နေတိုးအဖွဲ့က အသုံးပြုသော AWACS လေယာဉ်နှင့်ညီမျှသည့် ရုရှားထောက်လှမ်းရေး လေယာဉ်ဖြစ်ကြောင်း သိရသည်။ ဆိုရှယ်မီဒီယာပေါ်တွင် တင်ထားသော ဗီဒီယိုဖိုင်တွင် ညကောင်းကင်ယံမှာ အလင်းရောင်များစွာကို ပြသခဲ့ပြီး အခြားဗီဒီယိုဖိုင်တစ်ခုတွင် ကျေးလက်ဒေသတစ်ခုမှာ ကြီးမားသောမီးတောက် များကို တွေ့မြင်ခဲ့ရသည်။ 

ထို့အပြင် စတုရန်းမီတာ(၂၅ဝ)ခန့်ရှိသော မီးလောင်ကျွမ်းမှုကို မီးသတ်တပ်ဖွဲ့များက ငြိမ်းသတ်နိုင်ရန် ကြိုးပမ်းနေ ပြီး ဒေသခံနေအိမ်များ အန္တရာယ်မရှိကြောင်း  Krasnodar ဒေသ အာဏာပိုင်များက ပြောကြားခဲ့သည်။ 

အဆိုပါဖြစ်ရပ်တွင် လေယာဉ်နှစ်စင်းပါဝင်ကြောင်း အာဏာပိုင်များက ပြောဆိုခဲ့သော်လည်း မည်သည့်လေယာဉ် အမျိုးအစားဖြစ်သည်ဆိုသည့်အချက်ကို ထုတ်ဖော်ပြောဆိုခဲ့ခြင်းမျိုး မရှိခဲ့ကြောင်းလည်း သိရသည်။ အာဏာပိုင်များ က "လက်ရှိမှာတော့ မီးငြိမ်းသတ်မှုတွေကို ဆက်လက်လုပ်ဆောင်နေပါတယ်။ တရားဥပဒေ စိုးမိုးရေးနဲ့ အထူးဝန်ဆောင်မှုအဖွဲ့တွေလည်း အခင်းဖြစ်ပွားရာနေရာကို ရောက်ရှိနေပါပြီ" ဟု ပြောခဲ့သည်။