NP News - မတ် ၂၆

မြဝတီကုန်သွယ်ရေးဇုန်တွင် အမြန်ဆုံးတည်ငြိမ်အေးချမ်းရေးကို ဆောင်ရွက်လျက်ရှိပြီး ပြည်သူ့အသက် အိုးအိမ်စည်းစိမ်များ၊ လမ်းပန်းဆက်သွယ်မှုလုံခြုံ ချောမွေ့စေရေးကို ထိခိုက်အောင်လုပ်ဆောင်ခဲ့သူ အားလုံးကို ပြတ်ပြတ်သားသား ပြန်လည်ချေမှုန်းသွားမည်ဖြစ်ကြောင်း နစက ပြောခွင့်ရ ဗိုလ်ချုပ်ဇော်မင်းထွန်းက တုံ့ပြန်ပြောကြားလိုက်သည်။ 

နစက ပြောခွင့်ရက ယနေ့ (မတ်လ ၂၆ ရက်)တွင် မြဝတီကုန်သွယ်ရေးဇုန် ပစ်ခတ်တိုက်ခိုက်ခံရမှုဖြစ်စဉ်နှင့် ပတ်သက်ပြီး မီဒီယာများကို အထက်ပါကဲ့သို့ ဖြေကြားခဲ့ခြင်းဖြစ်သည်။

ကရင်ပြည်နယ် မြဝတီမြို့ရှိ မြဝတီကုန်သွယ်ရေးဇုန်ကို  ယမန်နေ့ (မတ်လ ၂၅ ရက်) နံနက် ၆ နာရီကျော်အချိန်တွင် KKO အဖွဲ့နှင့် PDF အကြမ်းဖက်အဖွဲ့များက ပစ်ခတ်တိုက်ခိုက် မီးရှို့ဖျက်ဆီးမှုပြုလုပ်ခဲ့သည်။

“ဒီဖြစ်စဉ်က မိုက်မဲတဲ့လုပ်ရက်လို့ပဲ ကျွန်တော်ပြောချင်ပါတယ်။ ကရင်ပြည်နယ်ဖွံ့ဖြိုးတိုးတက်ရေးအတွက်၊ ကရင်ပြည်နယ်မှာရှိတဲ့ ကရင်ပြည်သူလူထုနဲ့  အဲဒီဒေသမှာရှိတဲ့ ဒေသခံတွေ ပြီးရင် မှီခိုနေသူတွေရှိတာပေါ့။ စီးပွား ရေးဖွံ့ဖြိုးတိုးတက်မှု ဒေသဖွံ့ဖြိုးတိုးတက်ဖို့ အဓိက မှီခိုနေတာသည် မြဝတီကုန်သွယ်ရေး စခန်းဖြစ်တယ်၊ မြဝတီ ကုန်သွယ်ရေးစခန်းသည် လုပ်ငန်းများစွာလည်း ဖန်တီးပေးနိုင်တယ်။ ဒေသဖွံ့ဖြိုးရေးအတွက်လည်း အဓိက ဆောင်ရွက်ပေးနေတဲ့နေရာဖြစ်တယ်။ ဒီနေရာကို တိုက်ခိုက်ခဲ့တာက ဆင်ခြင်မှုမဲ့တဲ့ လုပ်ရပ်၊ အကြမ်းဖက်လုပ်ရပ်၊ ဒေသခံတွေနဲ့ ပြည်နယ်ကို ဖွံ့ဖြိုးတိုးတက်ရေး၊ နိုင်ငံဖွံ့ဖြိုးတိုးတက်ရေးကို အနှောက်အယှက် ပေးတဲ့လုပ်ရပ်၊ မိုက်မဲတဲ့လုပ်ရပ်လို့ပဲ ကျွန်တော်ပြောချင်ပါတယ်”ဟု ဗိုလ်ချုပ်ဇော်မင်းထွန်းကပြောသည်။

အဆိုပါနေ့ နံနက် ၆ နာရီကျော်တွင် ကုန်သွယ်ရေးဇုန်၏ အနောက်ဘက် မီတာ ၂ဝဝ ခန့်မှ ပစ်ခတ် တိုက်ခိုက်ခဲ့ရာ ကုန်သွယ်ရေးဇုန်ရှိ လုံခြုံရေးတပ်ဖွဲ့ဝင်များအနေဖြင့် ပြန်လည်ခုခံတိုက်ခိုက်ခဲ့ကြောင်း သိရသည်။ အဆိုပါဖြစ်စဉ်အတွင်း ရဲတပ်ဖွဲ့ဝင် ၃ ဦးကျဆုံးခဲ့ပြီး အကောက်ခွန် ဝန်ထမ်းတစ်ဦး ၊ အပြစ်မဲ့ပြည်သူ တစ်ဦးတို့လည်း သေဆုံးခဲ့ကြောင်း သိရသည်။

“သေဆုံးသူတွေကို အဆောက်အဦးထဲမှာပဲ မီးရှို့းထားတာကိုလည်း ကျွန်တော်တို့ တွေ့ရပါတယ်။ လူသားမဆန်တဲ့လုပ်ရပ်တွေ ၊ စစ်ရာဇဝတ်မှုကို ကျူးလွန်တဲ့လုပ်ရပ် တွေလည်း တွေ့ရပါတယ်”ဟု ၎င်းက ဆက်လက်ပြောသည်။

လက်ရှိတွင် မြဝတီမြို့၌ နယ်ခြားစောင့်တပ်များ ၊ တပ်မတော် နှင့် လုံခြုံရေးတပ်ဖွဲ့များက အခြေအနေကို ထိန်းသိမ်းနိုင်ပြီဖြစ်သည်။ အမှတ်(၁)တံတားကိုလည်း ပြန်လည်ဖွင့်ပေးထားပြီးဖြစ်သော်လည်း အသွားအလာ နည်းနေဆဲဖြစ်ကြောင်း သိရသည်။

မြဝတီကုန်သွယ်ရေးဇုန်သည် ကရင်ပြည်နယ်ဖွံ့ဖြိုးတိုးတက်ရေးအတွက်သာမက တစ်နိုင်ငံလုံးရှိ နယ်စပ်ကုန် သွယ်ရေးဇုန်များထဲတွင် အဓိက စခန်းတစ်ခုဖြစ်သည်။ ၂ဝ၂၂-၂ဝ၂၃ ဘဏ္ဍာရေးနှစ် ဧပြီလမှ စက်တင်ဘာလအထိကို ပို့ကုန်တန်ဖိုး အမေရိကန်ဒေါ်လာ ၁၈၈၆ သန်း၊ သွင်းကုန်တန်ဖိုး အမေရိကန်ဒေါ်လာ ၁၇ဝ၁ သန်းကျော် ကျော်ဖြင့် ကုန်သွယ်မှုပြုလုပ်နိုင်ခဲ့သည့် နေရာဖြစ်သည်။

ထို့ပြင် ပို့ကုန်အားလုံး၏ (၁၂ ဒသမ ၇) ရာခိုင်နှုန်းခန့် တင်ပို့နေသည့်နေရာဖြစ်ပြီး အဓိကပို့ကုန်များသည် စိုက်ပျိုးရေးပို့ကုန်များဖြစ်သည့် မြေပဲ၊ ဆန် ၊ နှမ်း၊ ကြက်သွန်နီ၊ ရော်ဘာ၊ ပြောင်းတို့ဖြစ်ကြောင်း သိရသည်။  

“အကြမ်းဖက်အဖွဲ့တွေအနေနဲ့ တိုက်ခိုက်ခဲ့တာသည် ဒေသဖွံ့ဖြိုးရေးအတွက်တင်မကဘူး တစ်နိုင်ငံလုံး ဥပမာ- ပြည်သူလူထုရဲ့ (၇ဝ)ရာခိုင်နှုန်းကျော်သည် မြို့ပေါ်မှာနေတာမဟုတ်ဘူး။ ရွာတွေမှာနေကြတယ်။ စိုက်ပျိုးမွေးမြူရေးလုပ်ငန်းကို အဓိက ထားလုပ်တဲ့လူတွေ ဖြစ်ပါတယ်။ သူတို့ရဲ့ထွက်ကုန်တွေသည် အခုပြောတဲ့ မြဝတီ ကုန်သွယ်မှုဂိတ်ကနေအများဆုံး ပို့နေတဲ့ ထွက်ကုန်တွေဖြစ်ပါတယ်၊ ဒါလုပ်ဆောင်ခြင်းသည် သာမန်ပြည်သူလူထုရဲ့စားဝတ်နေရေး၊ သာမန်ပြည်သူလူထုရဲ့ ထမင်းအိုးကို ရိုက်ခွဲ တာနဲ့အတူတူပါပဲ”ဟု နစက ပြောခွင့်ရက ပြောသည်။ 

အလားတူ ယနေ့ (မတ်လ ၂၆ ရက်) နံနက် ၅ နာရီခွဲကျော်ကလည်း ကော့ကရိတ်မြို့တွင် PDF အမည်ခံ အကြမ်းဖက်အဖွဲ့နှင့် KKO အဖွဲ့၏ ပစ်ခတ်မှုကြောင့် ဆောက်လုပ်ရေးရုံး၏ နောက်ဘက်သို့ လက်နက်ကြီးကျည်တစ်ခု ကျရောက်ခဲ့ကြောင်း သိရသည်။ အဆိုပါပစ်ခတ်မှုကြောင့် အသက် (၁၄)နှစ်ရှိ အပြစ်မဲ့ပြည်သူ တစ်ယောက် သေဆုံးခဲ့ကြောင်း သိရသည်။