ALynn (NSS) - ဖေဖော်ဝါရီ ၁၇

အစွန်းရောက်ဝါဒစွဲချက်ဖြင့် အကျဉ်းချခံထားရသော ရုရှား အတိုက်အခံခေါင်းဆောင် Alexey Navalny သည် ဖေဖော်ဝါရီလ ၁၆ ရက်တွင် သေဆုံးသွားပြီဖြစ်ကြောင်း နိုင်ငံပိုင်မီဒီယာမှ ဖော်ပြခဲ့သည်။ 

၎င်းသေဆုံးချိန်၌ အသက် ၄၇ နှစ်ရှိပြီဖြစ်ပြီး နိုင်ငံပိုင်မီဒီယာ၏ ဖော်ပြချက်အရ Navalny သည် လမ်းလျှောက်ပြီးနောက် ရုတ်တရက်သတိလစ်ပြီး အခြေအနေဆိုးရွားသွားခြင်းဖြစ်ကြောင်း သိရသည်။ ပြီးခဲ့သည့် ဒီဇင်ဘာလက Navalny ကို မော်စကိုမြို့ အရှေ့မြောက်ဘက် ကီလိုမီတာ ၁,၉၀၀ ခန့်အကွာ Yamalo-Nenets ဒေသ၊ Kharp မြို့ရှိ အကျဉ်းစခန်းသို့ ရွှေ့ပြောင်း ထားခဲ့သည်။ Navalny သေဆုံးမှုနှင့်ပတ်သက်၍ သမ္မတပူတင်လည်း သိရှိပြီးဖြစ်ကြောင်း ကရင်မလင်နန်းတော်က ဖော်ပြခဲ့သည်။ ၎င်းသေဆုံးကြောင်း သတင်းထုတ်ပြန်ပြီးနောက် ရုရှားအစိုးရရှေ့နေရုံးက မော်စကိုမြို့လယ်ခေါင် လူထုဆန္ဒပြပွဲများတွင် မပါဝင်ရန် ပြည်သူများကို သတိပေးခဲ့သည်။ 

 Navalny ၏ လက်ထောက်က “ရုရှားအာဏာပိုင်များသည် Navalny ကို အကျဉ်းထောင်ထဲမှာ သတ်ပစ်ကြောင်း ဝန်ခံချက်ထုတ်ပြန်ခြင်းသာဖြစ်ပြီး ၎င်းနှင့်ပတ်သက်လို့ ကျွန်ုပ်တို့မှာ အတည်ပြုဖို့ ဒါမှမဟုတ် မမှန်ကြောင်း သက်သေပြဖို့ နည်းလမ်းမရှိပါဘူး”ဟု ဆိုရှယ်မီဒီယာတွင် ရေးသားခဲ့သည်။ 

ကမ္ဘာ့ခေါင်းဆောင်များနှင့် အရာရှိများတက်ရောက်ကျသည့် မြူးနစ်လုံခြုံ ရေးထိပ်သီးအစည်းအဝေးတွင် Navalny ၏ အမျိုးသမီးက သတင်းစာရှင်းလင်းပွဲကျင်းပခဲ့ပြီး “၎င်း၏ ခင်ပွန်း သေဆုံးမှုသတင်း အမှန်ဖြစ်ခဲ့ပါက ပူတင်နှင့် ၎င်း၏ အပေါင်းအပါများကို အရေးမယူဘဲ လွှတ်မထားသင့်ကြောင်း၊ မော်စကိုရှိ ကြောက်မက်ဖွယ်အစိုးရကို နိုင်ငံတကာအသိုင်းအဝိုင်း အနေဖြင့် အတူတကွတွန်းလှန်သင့်ကြောင်း” တောင်းဆိုခဲ့သည်။ 

ကမ္ဘာ့ခေါင်းဆောင်အများစုက Navalny သည် ၎င်း၏ရဲစွမ်းသတ္တိကို ဘဝနှင့်ရင်း၍ ပြသသွားခြင်းဖြစ်ပြီး သမ္မတပူတင်အားဆန့်ကျင်သည့် ပြစ်မှုအတွက် အကျဉ်းချခြင်းနှင့် သေဆုံးမှုကို ရုရှားအစိုး ရအနေဖြင့် တာဝန်ယူရမည်ဖြစ်ကြောင်း သဘောထားမှတ်ချက်ပြုကြသည်။ ရုရှားသမ္မတပူတင်ကို နောက်ထပ် ခြောက်နှစ်ကြာ အာဏာရစေမည့် ရွေးကောက်ပွဲမကျင်းပမီ တစ်လအလိုတွင် ဖြစ်ပွားခဲ့သော ၎င်း၏သေဆုံးမှုသည် ပြည်တွင်းရှိ အတိုက်အခံအားလုံးကို နှိမ်နင်းခဲ့သည့် ခေါင်းဆောင်အပေါ် ဝေဖန်မှုများ ထပ်မံဂယက်ရိုက်စေသည်။ Navalny အဖမ်းမခံရခင်က ၎င်းသည် အကျင့်ပျက်ခြစားမှု ဆန့်ကျင်သည့် လှုပ်ရှားမှုများကို ဦးဆောင်ခဲ့ပြီး အစိုးရဆန့်ကျင်ရေး ဆန္ဒပြပွဲများကို အဓိက ဦးဆောင်လှုံ့ဆောင်ခဲ့ပါသည်။ ၂၀၂၂ ခုနှစ်တွင် ရုရှားက ယူကရိန်းအား အထူးစစ်ဆင်ရေး စတင်ဆင်နွှဲခဲ့ချိန်ကလည်း Navalny သည် ထောင်ထဲမှနေ၍ စစ်ပွဲကို ပြင်းပြင်းထန်ထန် ရှုတ်ချကြောင်း ဆိုရှယ်မီဒီယာများ၌ ရေးသားဖော်ပြခဲ့သည်။