ယွန်း (NSS) - ဖေဖော်ဝါရီ ၈

ပြီးခဲ့သည့် ၂၀၂၃ ခုနှစ်၊ ဒီဇင်ဘာလအတွင်း တိုင်းဒေသကြီးနှင့် ပြည်နယ်များ၌ ခန့်မှန်တန်ဖိုးငွေကျပ်သန်း(၇၀၀)ကျော်ရှိသည့် တရားမဝင်စက်သုံးဆီများ ဖမ်းဆီးရမိခဲ့ကြောင်း ကုန်သွယ်မှု နှင့် ကုန်စည်စီးဆင်းမှုများ မှန်ကန်မြန်ဆန်စေရေးဗဟိုကော်မတီဥက္ကဋ္ဌက ပြောသည်။

ကုန်သွယ်မှု နှင့် ကုန်စည်စီးဆင်းမှုများ မှန်ကန်မြန်ဆန်စေရေးဗဟိုကော်မတီဥက္ကဋ္ဌ ဗိုလ်ချုပ်ကြီးမြထွန်းဦးက ဖေဖော်ဝါရီလ(၇)ရက်တွင် နေပြည်တော်ရှိ ရုံးအမှတ် (၁၈) အစည်းအဝေးခန်းမ၌ ကျင်းပခဲ့သည့် လုပ်ငန်းညှိနှိုင်းအစည်းအဝေးတွင် အထက်ပါကဲ့သို့ ပြောကြားခဲ့ခြင်းဖြစ်သည်။

ဗဟိုကော်မတီအနေဖြင့် နိုင်ငံတော်နှင့် ပြည်သူများ၏ ကုန်သွယ်ရေး၊ သယ်ယူပို့ဆောင်ရေး အပါအဝင် စီးပွားရေး နှင့် ဝန်ဆောင်မှုဆိုင်ရာ အထွေထွေလုပ်ငန်းများ ဆောင်ရွက်ရာတွင် မရှိမဖြစ်လိုအပ်သည့် စက်သုံးဆီကဏ္ဍကို ဦးစားပေးသွင်းကုန်အနေဖြင့် ဆောင်ရွက်ခဲ့ကြောင်း သိရသည်။

ထို့ပြင် စက်သုံးဆီတင်သွင်းလိုသည့် ကုမ္ပဏီအသစ်များကိုလည်း စနစ်တကျစိစစ်ခွင့်ပြုသွားမည်ဖြစ်ပြီး စက်သုံးဆီများကို ပြည်သူများ လုံလောက်စွာ အသုံးပြုနိုင်ရေးနှင့် တရားမဝင်စက်သုံးဆီ ရောင်းချမှုမရှိစေရေးကိုလည်း အလေးထားကြပ်မတ်ဆောင်ရွက်နေကြောင်း သိရသည်။

ထိုသို့ ဆောင်ရွက်လျက်ရှိရာ တိုင်းဒေသကြီးနှင့် ပြည်နယ်များတွင် တရားမဝင်စက်သုံးဆီ ဖမ်းဆီးရမိမှုသည် ပြီးခဲ့သည့် ၂၀၂၃ ခုနှစ် ဒီဇင်ဘာလအတွင်း (၆၅)မှုရှိခဲ့ပြီး စက်သုံးဆီ (၂၉၈ ဒသမ ၀၅၇) တန်၊ တန်ဖိုးငွေအားဖြင့် ခန့်မှန်းတန်ဖိုးငွေကျပ်(၇၃၈ ဒသမ ၃၉၂) သန်း ရှိကြောင်း ဗိုလ်ချုပ်ကြီးမြထွန်းဦးက အသိပေးပြောကြားထားသည်။

ထို့ပြင် ၂၀၂၄ ခုနှစ်၊ ဇန်နဝါရီလအတွင်း အမှုပေါင်း(၁၄)မှု စက်သုံးဆီတန်ချိန်(၇၄ ဒသမ ၂၂၅)တန်၊ ခန့်မှန်းတန်ဖိုးငွေကျပ်(၁၇၆ ဒသမ ၃၂၉ )သန်းကို ဖမ်းဆီးရမိခဲ့ကြောင်း သိရသည်။

စက်သုံးဆီကို ပြည်သူများ သက်သာသည့်ဈေးနှုန်းဖြင့်ဝယ်ယူနိုင်‌ရန် အမြဲမပြတ်ကြပ်မတ်ဆောင်ရွက်လျက်ရှိပြီး ပုဂ္ဂလိက စက်မှုကဏ္ဍ၊ စိုက်ပျိုးမွေးမြူရေးကဏ္ဍ၊ ဝန်ဆောင်မှုလုပ် ငန်းများ၊ ဆေးရုံ၊ ဆေးခန်း၊ စာသင်ကျောင်း နှင့် ဟိုတယ်လုပ်ငန်းများ၊ အစိုးရတင်ဒါလုပ်ငန်းများ နှင့် ကျန်လုပ်ငန်းများတွင်လိုအပ်သည့် စက်သုံးဆီများကို လွတ်လပ်စွာတင်သွင်းနိုင်ရေးကိုလည်း စီမံဆောင်ရွက်ပေးထားကြောင်း ဗိုလ်ချုပ်ကြီးမြထွန်းဦးက ပြောသည်။

၂ဝ၁၇ ခုနှစ် ရေနံနှင့်ရေနံထွက်ပစ္စည်းဆိုင်ရာ ဥပဒေပုဒ်မ ၃ဝ အရ “မည်သူမျှ ဤဥပဒေအရ လိုင်စင်ရယူရန်လိုအပ်သည့်လုပ်ငန်း (သို့မဟုတ်) ဆောင်ရွက်မှုတစ်ခုကို သက်ဆိုင်ရာလိုင်စင်ရယူခြင်းမရှိဘဲ လုပ်ကိုင်ဆောင်ရွက်ခြင်းမပြုရ”ဟု ပြဋ္ဌာန်းထားကြောင်း သိရသည်။

အဆိုပါဥပဒေအရ စက်သုံးဆီများကို လိုင်စင်မဲ့သယ်ယူပို့ဆောင်ခြင်း၊ သိုလှောင်ခြင်း၊ ရောင်း ချခြင်းများ စစ်ဆေးတွေ့ရှိပါက အနည်းဆုံးဒဏ် ငွေကျပ် သုံးသိန်းမှ အများဆုံးဒဏ်ငွေကျပ်သိန်း(၅ဝ)အထိ ငွေဒဏ်ဖြစ်စေ၊ တစ်နှစ်ထက်မပိုသော ထောင်ဒဏ်ဖြစ်စေ ပြစ်ဒဏ်အပြင် ပြစ်ဒဏ်နှစ်ရပ်လုံး စီရင်ခံရမည့်အပြင် ပြစ်မှုကျူးလွန်ခြင်း နှင့် သက်ဆိုင်သည့်ပစ္စည်းများကိုလည်း ပြည်သူ့ဘဏ္ဍာအဖြစ် သိမ်းဆည်းခြင်းခံရနိုင်ကြောင်း ၎င်းက ဆက်လက်ပြောသည်။

ထို့ကြောင့် စက်သုံးဆီများကို လိုင်စင်မဲ့ရောင်းချခြင်း၊ နေအိမ်၊ ခြံဝင်းများအပြင် မည်သည့်နေရာတွင်မဆို လိုင်စင်မဲ့ရောင်းချခြင်းများကို စစ်ဆေးကြပ်မတ်ကာ ဥပဒေနှင့်အညီ အရေး ယူဆောင်ရွက်မည်ဖြစ်ကြောင်း သတိပေးထားသည်။