ဂျန်ဇက် (NSS) - ဖေဖော်ဝါရီ ၈

ဗြိတိန်ဘုရင်ကြီးချားလ်  III သည် ကင်ဆာရောဂါခံစားနေရသည့်အတွက် ၎င်း၏ လုပ်ငန်းတာဝန်များကို လက်ရှိအချိန်တွင်တာဝန်ထမ်းဆောင်နိုင်မည်မဟုတ်ကြောင်း ဘက်ကင်ဟမ် နန်းတော်က သတင်း ထုတ်ပြန်လိုက်သည်။

အသက် ၇၅ နှစ်အရွယ်ရှိ ဗြိတိန်ဘုရင်ကြီးသည် ကင်ဆာရောဂါကို လန်ဒန်ဆေးရုံတွင် တက်ရောက် ကုသခဲ့ပြီးနောက် ပြီးခဲ့သောသီတင်းပတ်တွင်ဆေးရုံမှ ပြန်ဆင်းလာခဲ့ပြီး လက်ရှိအချိန်တွင် အများပြည်သူ နှင့်ဆိုင်သော လုပ်ငန်းတာဝန်များကိုဆိုင်းငံ့ထားကြောင်း ဗြိတိန်ဘုရင်နန်းတော်က ပြောသည်။ 

ဗြိတိန်ဘုရင်နန်းတော်က ချားလ်ဘုရင်ကြီးသည် ကင်ဆာရောဂါခံစားနေရသည်ဟု သတင်းထုတ်ပြန်ခဲ့ သော်လည်း မည့်သည့်ကင်ဆာဖြစ်သည်ဆိုသောအချက်ကို အတိအကျ သတင်းထုတ်ပြန်ခြင်းမျိုး မရှိသေးကြောင်း သိရသည်။ 

ဗြိတိန်ဘုရင်နန်းတော်က "ဗြိတိန်ဘုရင်ကြီးဟာ မကြာသေးမီက ဆေးရုံမှာ လုပ်ထုံးလုပ်နည်းတွေအတိုင်း လုပ်ဆောင်ခဲ့တယ်။ အကြိတ်က တဖြည်းဖြည်း ကြီးလာနေတယ်။ နောက်ဆက်တွဲရောဂါရှာဖွေ စမ်းသပ်မှုတွေအရ ကင်ဆာရောဂါပုံစံမျိုးဆိုတာသိခဲ့ရတယ်။ ဘုရင်ကြီးရဲ့ကင်ဆာရောဂါကို လက်ရှိ အချိန်က စတင်ပြီး ပုံမှန်ကုသသွားမယ်။ ဆရာဝန်တွေကလည်း ဘုရင်ကြီးကို အများပြည်သူနဲ့ ဆက်နွယ်တဲ့လုပ်ငန်းတာဝန်တွေ မထမ်းဆောင်သေးဖို့ အကြံပြုထားတယ်။ ဒါကြောင့် ဘုရင်ကြီးဟာ လက်ရှိအချိန်မှာ သူရဲ့တာဝန်တွေကို ထမ်းဆောင်မှာ မဟုတ်သေးဘူး။ ဘုရင်ကြီးဟာ ပြည်သူတွေရဲ့ မြင်ကွင်းရှေ့ကို အမြန်ဆုံးပြန်လည်ရောက်ရှိစေဖို့ မျှော်လင့်နေတယ်" ဟု ပြောသည်။

ဗြိတိန်ဘုရင်မကြီး အဲလီစဘတ် နတ်ရွာစံခဲ့ပြီးနောက် အိမ်ရှေ့စံချားလ်မင်းသားသည် ဗြိတိန်ထီးနန်း အရိုက်အရာကို ဆက်ခံခဲ့ပြီး ၂ဝ၂၃ ခုနှစ် မေလတွင်  ဗြိတိန်ဘုရင်အသစ်အဖြစ် နန်းတက်ပွဲအခမ်းအနား ကို ကျင်းပခဲ့ကြောင်း သိရသည်။ ဗြိတိန်ဘုရင်ကြီးချားလ် III သည် အများပြည်သူနှင့်သက်ဆိုင်သော လုပ်ငန်းများကို လက်ရှိအချိန်တွင် တာဝန်မထမ်းဆောင်နိုင်သော်လည်း နိုင်ငံအကြီးအကဲအဖြစ် ဆက်ရှိ နေမည်ဖြစ်ပြီး သီးသန့်အစည်းအဝေးများနှင့် အရေးကြီးသော စာရွက်စာတမ်းများ လက်မှတ်ရေးထိုးပေး မှုများ လုပ်ဆောင်မည်ဖြစ်ကြောင်း သိရသည်။ 

ဗြိတိန်ဘုရင်ကြီးချားလ်   III တွင်  သားနှစ်ဦးရှိနေပြီး ဘုရင်ကြီးနတ်ရွာစံခဲ့ပါက သားအကြီးဖြစ်သူ တော်ဝင်မင်းသားဝီလျံက ထီးနန်းအရိုက်အရာကို ဆက်ခံမည်ဖြစ်သည်။