ယွန်း (NP News) - မတ် ၂၃

အကောက်ခွန်သိုလှောင်ရုံ(Bonded Warehouse)သို့ ထည့်သွင်းမည့် ကုန်ပစ္စည်းများအပါအဝင် ပြည်ပမှကုန်ပစ္စည်းတင်သွင်းမှုအားလုံးအတွက် ဆိပ်ကမ်းသို့မရောက်မီ သွင်းကုန်လိုင်စင်ရရှိပြီးမှ တင်သွင်းခွင့်ပြုမည်ဖြစ်ကြောင်းသိရသည်။

စီးပွားရေးနှင့် ကူးသန်းရောင်းဝယ်‌ရေးဌာန၊ ကုန်သွယ်ရေးဦးစီးဌာနမှ မတ်လ (၂၂)ရက်တွင် အထက်ပါကဲ့သို့ ထုတ်ပြန်ထားခြင်းဖြစ်သည်။

အမိန့်ကြော်ငြာစာအမှတ် ၅ဝ/၂ဝ၂ဝ ဖြင့် သွင်းကုန်လိုင်စင်ရယူ တင်သွင်းရမည့် ကုန်ပစ္စည်းများအတွက် အကောက်ခွန်သိုလှောင်ရုံသို့ ထည့်သွင်းရန် တင်သွင်းလာသည့် ကုန်စည်များမှအပ ကုန်စည်များအား ခွင့်ပြုချက်မရမီ ဆိပ်ကမ်းသို့ ကြိုတင်ရောက်ရှိခြင်းမရှိစေရ ဟုထုတ်ပြန်ထားပြီးဖြစ်သည်။

ထို့ကြောင့် ကုန်သွယ်မှုလုပ်ငန်းများကို ထိန်းကျောင်းဆောင်ရွက်နိုင်‌ရေး အပါအဝင် အကောက်ခွန် သိုလှောင်ရုံတွင် ကာလကြာရှည်စွာ ထည့်သွင်းသိုလှောင်ခြင်းဖြင့် ကုန်စည်များ အရည်အသွေးထိခိုက်မှု မရှိစေရေးအတွက် ကုန်ပစ္စည်းများ သိုလှောင်ရန် သွင်းကုန်လိုင်စင် ရရှိပြီးမှ တင်သွင်းခွင့်ပြုမည် ဖြစ်ကြောင်း သိရသည်။             

“၂ဝ၂၃ ဧပြီလ တစ်ရက်နေ့ကစပြီး Bonded Warehouse ထဲ ထည့်မယ့်ကုန်ပစ္စည်းတွေအတွက် သွင်းကုန် လိုင်စင် ကြိုလျှောက်ထားရပါမယ်။ Bonded Warehouse ထဲ ထည့်မယ့်ကုန်ပစ္စည်းတွေအတွက် ၆ လ ဆိုင်းငံ့ထားပါမယ်”ဟု လုပ်ငန်းရှင်တစ်ဦးကသုံးသပ်ပြောသည်။ 

ထို့ကြောင့် Bonded Warehouse ထဲသို့ ပစ္စည်းထည့်သွင်းမှုအပါအဝင် ပြည်ပတင်သွင်းကုန် ပစ္စည်းအားလုံး ဆိပ်ကမ်းမရောက်မီ လိုင်စင်ရရှိပြီးမှ တင်သွင်းခွင့်ရမည်ဖြစ်သည်။