Htay Oung (NSS) - ဇန်နဝါရီ ၂၆ 

၂ဝ၂၄ ခုနှစ် နိုဝင်ဘာ ၅ ရက်မှာ စတင်ကျင်းပမယ့် အမေရိကန်သမ္မတရွေးကောက်ပွဲအကြိုဟောကိန်းအဖြစ် မဲဆန္ဒရှင်များရဲ့သဘောထားကို ရိုက်တာသတင်းအေဂျင်စီနဲ့ အိုင်ပီအက်စ်ပိုအက်စ် နိုင်ငံစုံစျေးကွက် သုတေသန အုပ်စုတို့က စစ်တမ်းကောက်ယူခဲ့ပါတယ်။ မကြာသေးမီက ပြုလုပ်ခဲ့တဲ့ အဲဒီစစ်တမ်းကို အမေရိကန်နိုင်ငံတဝှမ်း အရွယ်ရောက်ပြီးသူ ၁၂၅ဝ တို့နဲ့တွေ့ဆုံမေးမြန်းခဲ့ရာ သမ္မတဟောင်းဒေါ်နယ်ထရမ့်က လက်ရှိသမ္မတ ဂျိုးဘိုင်ဒင် ကို ၆  ရာခိုင်နှုန်းအသာနဲ့ ဦးဆောင်နေကြောင်းတွေ့ရှိရတယ်လို့ ရိုက်တာ ယမန်နေ့ ဇန်နဝါရီလ ၂၅ ရက်က ရေးသားခဲ့ပါတယ်။

စစ်တမ်းဖြေဆိုသူ ၄ဝ ရာခိုင်နှုန်းက ထရမ့်ကို ထောက်ခံကြပြီး ၃၄ ရာခိုင်နှုန်းက ဘိုင်ဒင်ကို ထောက်ခံပါတယ်။ ကျန်သူတွေကတော့ အခြား သမ္မတလောင်း တစ်ယောက်ယောက် (သို့မဟုတ်) ဆန္ဒမဲပေးဖို့ စိတ်ကူးမရှိသူများ ဖြစ်နေပါတယ်။ စစ်တမ်းရလဒ် အပိုအလိုကို ၃ ရာခိုင်နှုန်းလို့ သတ်မှတ်ထားတဲ့အတွက် မျှော်လင့်ထားသလို ပြတ်သားတဲ့အဖြေရရှိတယ်လို့ မပြောနိုင်ပါဘူး။ 

ရလဒ်ဟာ ယခုလစောစောပိုင်း စစ်တမ်းကောက်ယူချက်များမှ အပြောင်းအလဲတစ်ခုဖြစ်ပေမယ့် တစ်နိုင်ငံလုံးကို ခြုံငုံပြီး အလွတ်သဘောခန့်မှန်းချက်သာဖြစ်နေပါတယ်။ အဓိကကျတဲ့ပြည်နယ်အချို့မှာ အီလက်တိုရီယယ် ကောလိပ်ရဲ့ အပြီးသတ် မဲရလဒ်အဖြစ် အပြည့်အဝကိုယ်စားပြုနိုင်ခြင်း မရှိပါဘူး။

ဒါ့အပြင် ထရမ့်နဲ့ ဘိုင်ဒင်တို့ကို သက်ဆိုင်ရာနိုင်ငံရေးပါတီများက အခြားယှဥ်ပြိုင် သမ္မတလောင်းအဖြစ် အပြီးသတ် အမည်စာရင်းတင်သွင်းခြင်း မရှိသေးပါဘူး။ တကယ်လို့သာ ထရမ့် ဝင်ရောက်ယှဉ်ပြိုင်ပြီး အနိုင်ရခဲ့ရင် ဂရိုဗာ_ကလိဖ်လန်းတို့လို တစ်ဆက်တည်းမဟုတ်ပဲ နောက်တစ်ကြိမ်ထပ်မံ ရွေးကောက်ခံရသူ ဒုတိယမြောက် သမ္မတအဖြစ် မျှော်မှန်းနိုင်ပါလိမ့်မယ်။ တစ်ချိန်တည်းမှာပဲ ဘိုင်ဒင်ကလည်း ယှဉ်ပြိုင်ဖြစ်ခဲ့ရင် ပြိုင်ဘက်ဟောင်း နှစ်ဦးတို့အကြား ၁၉၅၆ ခုနှစ်နောက်ပိုင်း ပထမဆုံးအကြိမ် မကျေပွဲဆင်နွှဲခြင်းဖြစ်လာပါလိမ့်မယ်။

စစ်တမ်းအရ အမေရိကန်မဲဆန္ဒရှင် ၆၇ ရာခိုင်နှုန်းတို့ဟာ ယခုရွေးကောက်ပွဲမှာ သမ္မတလောင်းသစ်များကိုသာ တွေ့ မြင်လိုကြပြီး ယခင်လူဟောင်းတွေကို မဲပေးဖို့ စိတ်ကုန်နေကြောင်း တွေ့ရှိရပါတယ်။ ဘိုင်ဒင်နဲ့ထရမ့်တိုရဲ့ စိတ်မကျေပွဲ ယှဉ်ပြိုင်ကြမယ့် ရွေးကောက်ပွဲကြီးသာဖြစ်နေရင် မဲမပေးပဲနေမယ်လို့ ဖြေဆိုသူ ၁၈ ရာခိုင်နှုန်း ရှိပါတယ်။

စိတ်ဝင်စားစရာကောင်းတာကတော့ သူတို့နှစ်ဦးရဲ့အခြားသမ္မတလောင်းနဲ့ပတ်သက်ပြီး လူထုဆန္ဒစစ်တမ်းရလဒ် များဖြစ်ပါတယ်။ အမေရိကန်မှာရော ကမ္ဘာမှာပါ နာမည်ကြီးလှတဲ့ ရောဘတ်_အက်ဖ်-ကနေဒီ_ဂျူနီယာ ဟာ (လုပ်ကြံခံရပြီး ကွယ်လွန်သူ) သမ္မတ ဂျွန်_အက်ဖ်_ကနေဒီရဲ့တူအရင်းဖြစ်ပြီး ဒေါ်နယ်ထရမ့်လို ကာကွယ်ဆေး ဆန့်ကျင်ရေး စောင်းပါးရိပ်ခြေ ဦးဆောင်လှုပ်ရှားသူအဖြစ် လူသိများပါတယ်။ ထရမ့်နဲ့ ကနေဒီတို့အကြား စစ်တမ်း ကောက်ယူတဲ့အခါ ၃၆ ရာခိုင်နှုန်းရရှိသူ ကနေဒီထက် ထရမ့်က ၆ မှတ် အသာရရှိပြီး၊ ဘိုင်ဒင်က ၃ဝ ရာခိုင်နှုန်း နဲ့ ကနေဒီက ၈  ရာခိုင်နှုန်းသာ ရရှိခြင်းပဲဖြစ်ပါတယ်။

အမေရိကန်မဲဆန္ဒရှင်တွေဟာ နှစ်ပါတီစနစ်အပေါ် ကျေနပ်မှုမရှိဘဲဖြစ်နေကြပြီး ဖြေဆိုသူ ထက်ဝက်ကျော် ကျော်လောက်က အားအရကြောင်း မှတ်ချက်ပေးကြပါတယ်။ ဝှိုက်တနေးတယ်လာကိုလို ဝါရှင်တန်မှာ လူသိများ ထင်ရှားသူ အကြံပေးပုဂ္ဂိုလ်ကတော့ ရွေးကောက်ပွဲမှာ တစ်သီးပုဂ္ဂလများအတွက် စေ့ဆော်မှုမပါရှိတဲ့အတွက် ပါတီကြီးနှစ်ခုက မဟုတ်သူ သမ္မတလောင်းကို မဲပေးမယ်လို့ အင်တာဗျူးတစ်ခုမှာ ဖြေဆိုပါတယ်။

သမ္မတလောင်းတွေရဲ့အသက်အရွယ်ကလည်း လူထုအမြင်မှာ ကဏ္ဍတစ်ခုမှ ပါဝင်နေကြောင်း တွေ့ရပါတယ်။ ဒီမိုကရက်တစ်ထက်၀က်ကျော် အပါအဝင် ဖြေဆိုသူ ၇ဝ ရာခိုင်နှုန်းက ဘိုင်ဒင်ရဲ့လက်ရှိအသက်အရွယ် ၈၁ နှစ် ဆိုတာ သမ္မတအလုပ်အတွက် အိုမင်းလွန်းနေပြီး ပြန်လည်အရွေးခံဖို့ မသင့်တော့ဘူးလို့ ယူဆကြပါတယ်။ အလားတူ ရီပတ်ဘလစ်ကင် သုံးပုံတစ်ပုံ အပါအဝင် ဖြေဆိုသူ ၅၆ ရာခိုင်နှုန်းက အသက် ၇၇ နှစ်ရှိနေပြီဖြစ်တဲ့ ထရမ့်အနေနဲ့ နောက်တစ်ကြိမ် ယှဉ်ပြိုင်ဖို့ မသင့်တော့ဘူးလို့ ယူဆကြပါတယ်။

စစ်တမ်းရလဒ်တွေအရ ရီပတ်ဘလစ်ကင်ပါတီအတွင်း နစ်ကီ_ဟယ်လီဟာ ထရမ့်အတွက် အဓိကစိန်ခေါ်သူ ဖြစ်နေကြောင်း မီးမောင်းထိုးပြသလို ရှိနေပါတယ်။ အသက် ၅၂ နှစ်အရွယ် ကုလသမဂ္ဂဆိုင်ရာ အမေရိကန် အမျိုးသမီးသံအမတ်ကြီးဟောင်းရဲ့ထင်ရှားကျော်ကြားမှုဟာ မဲဆန္ဒရှင်အချို့အတွက် စိတ်ဝင်စားစရာဖြစ်နေပါ တယ်။ ဖေဖော်ဝါရီ ၂၄ ရက် တောင်ကာရိုလိုင်းနားပြည်နယ် ရီပတ်ဘလီကန်ပါတီသမ္မတလောင်းအမည် စာရင်းတင်သွင်းမယ့်သူများ ယှဉ်ပြိုင်ရာမှာတော့ ဟယ်လီထက်ထရမ့်က သိသိသာသာဦးဆောင်နေကြောင်း တွေ့ကြရပါတယ်။

နောက်ဆုံးပြောရရင် ထရမ့်နဲ့ ဘိုင်ဒင်ထောက်ခံသူအသီးသီးတို့အကြား မဲပေးရန် လှုံ့ဆော်မှာ မတူကွဲပြားကြောင်း စစ်တမ်းက ပြသနေပါတယ်။ ဘိုင်ဒင်ထောက်ခံသူ ၅၉  ရဲ့ မဲပေးရခြင်းဟာ ထရမ့်အပေါ် ခါးခါးသီး ဆန့်ကျင်ဖို့ဖြစ်ပြီး ထရမ့် မဲဆန္ဒရှင် ၃၉  ရာခိုင်နှုန်းကတော့ သူတို့သမ္မတလောင်း၊ သမ္မတလောင်းရဲ့မူဝါဒများနဲ့ပတ်သက်ပြီး အပြုသဘောဆောင်တဲ့သဘောထားများကို ဖော်ပြခဲ့ကြပါတယ်။

စစ်တမ်းဟာ ထရမ့်အအပေါ်စွဲဆိုထားတဲ့ ဥပဒေရေးရာကိစ္စရပ်များကိုလည်း ထိခိုက်စေကြောင်း အရေးတကြီး မှတ်သားဖွယ်ရှိပါတယ်။ ထရမ့်အနေနဲ့ ဥပဒေချိုးဖောက်ရာရောက်ကြောင်း ပြစ်မှုထင်ရှားလျှင် ထောင်ဒဏ် ချမှတ် သင့်တယ်လို့ ရီပတ်ဘလစ်ကင် ၅၅ ရာခိုင်နှုန်းက ယုံကြည်ကြပါတယ်။ ဒါပေမယ့် ရီပတ်ဘလီကင်အများစုကြီး ကတော့ ရွေးကောက်ပွဲလိမ်လည်ကြောင်း ဆွယ်တရားဟောပြောခြင်းအတွက် ထရမ့်မှာ အပြစ်ရှိတယ်လို့ မယူဆ ကြပါဘူး။

(အမေရိကန်ဟာ ကမ္ဘာ့စစ်ရေး စီးပွားရေး နံပတ်တစ်နိုင်ငံဖြစ်တဲ့အတွက် ဘယ်သူဘယ်ဝါ သမ္မတဖြစ်မယ်ဆိုတာ နိုင်ငံတကာက စိတ်ဝင်စားကြပါတယ်။ 

အမေရိကန်နိုင်ငံထူထောင်ပြီးနောက် ရွေးကောက်ပွဲ အငြင်းပွားမှု ၆ ကြိမ် ဖြစ်ပွားခဲ့ဖူးပြီး ၁၈၂၄၊ ၁၈၇၈၊ ၁၈၁၂၊ ၁၉၆ဝ၊ ၂ဝဝဝ နဲ့ ၂ဝ၂ဝ ပြည့်နှစ်မှာဖြစ်ပါတယ်။ 

အမေရိကန်တရားဥပဒေများ အားလုံးကို ကျွန်တော် မလေ့လာမိပေမယ့် ၂ဝ၂၁ ခုနှစ် ဇန်နဝါရီ ၆ ရက် ဝါရှင်တန်ဒီစီ ကက်ပီတိုဟေးလ် ကွန်ဂရက်အဆောက်အအုံ အကြမ်းဖက်မှုဟာ ထရမ့်ရဲ့လှုံ့ဆော်မှုကြောင့်ဖြစ်ရတယ်လို့ ကျွန်တော် မယုံကြည်ပါ။

ထရမ့် မဲရှုံးရအောင် လျှို့ဝှက်ကြံစည်သူဟာ ကျွန်တော်တို့ မြန်မာများ မေတ္တာတုံး ဂျော့ဆိုးရော့စ်ဖြစ်ကြောင်း ရီပတ်ဘလစ်ကင်တို့ ယုံကြည်ချက်ကို သက်သေမပြနိုင်ပေမယ့် ဟုတ်သလိုလို ရှိခဲ့တာအမှန်ဖြစ်ပါတယ်။ ရွေးကောက်ပွဲမကျင်းပမီ၊ ကျင်းပနေစဉ်နဲ့ ကျင်းပပြီးနောက် အမေရိကန်သတင်းမီဒီယာတို့ရဲ့ရေးသားချက်များဟာ ဘယ်ဟာက အမှန်ဖြစ်ကြောင်း တရားရုံးတော်က ကြားဝင်မဟန့်တားနိုင်မီအထိ ဇဝေဇဝါဖြစ်လောက်အောင် ရှုပ်ထွေးခဲ့ပါတယ်။ ဒီနေ့ သတင်းစားသုံးသူ ရေမီးရှားနေများ ချာလပတ်ရမ်းနေတဲ့ အတိုင်းပါပဲ။

မဲပြားအရေအတွက်ကို ပြန်လည်စစ်ဆေးပြီးနောက် အမှန်ပြောင်းလဲပေးခဲ့ပေမယ့် မဲရလဒ်အပေါ် အကြီးအကျယ် ပြောင်းလဲနိုင်ခြင်းမရှိကြောင်း တွေ့ရပါတယ်။ ဒါပေမယ့် ထရမ့်ကိုယ်စားလှယ်များ ကနဦး ဆင်ခြေပေးတဲ့အတိုင်း သံသယဝင်စရာကောင်းနေပါတယ်။ စာတိုက်မှတဆင့်ပေးပို့တဲ့ ဆန္ဒမဲများကို FBI အနေနဲ့ နောက်ကြောင်းပြန် ခြေရာကောက်ရန် မဖြစ်နိုင်လောက်အောင်ရှိပြီး သူတို့နိုင်ငံ စာတိုက်စနစ်ရဲ့ ဖြောင့်မှန်တာဝန်ကြေပွန်မှုအပေါ်မှာ သာ ပုံချလိုက်ရသလို ရှိပါတယ်။

ဒိုမီနီယံရွေးကောက်ပွဲမဲပေးစနစ်နဲ့ “စမတ်စ်မက် တစ်_အီလက်ထရောနစ်ကုမ္ပဏီ” တို့အပေါ် စွပ်စွဲရေးသားချက် များကြောင့် ထရမ့်ထောက်ခံတဲ့ “ဖောက်စ်_သတင်းဌာန” လည်း အသရေဖျက်မှုနဲ့ တရားစွဲဆိုခံထားရပါတယ်။ သတင်းအေဂျင်စီနဲ့ စမတ်စ်မက်တစ်အီလက်ထရောနစ်ကုမ္ပဏီတို့ရဲ့အမှုဟာ ကြားနာနေဆဲဖြစ်ပြီး၊ ဒိုမီနီယံကုမ္ပဏီ အမှုမှာတော့ ဖောက်စ်က ဒေါ်လာ ၇၈၇.၅ သန်း ပေးလျော်ခဲ့ရပါတယ်။ ။ သတင်းဘာသာပြန်သူ)

#ဒေါ်နယ်ထရမ့် #ဂျိုးဘိုင်ဒင် #၂၀၂၄ခုနှစ်အမေရိကန်သမ္မတရွေးကောက်ပွဲ #ဒိုမီနီယံရွေးကောက်ပွဲမဲပေးစနစ် 

#ရောဘတ်_အက်ဖ်-ကနေဒီ_ဂျူနီယာ #စမတ်စ်မက်တစ်_အီလက်ထရောနစ်ကုမ္ပဏီ ဂျော့ဆိုရော့စ်

(Reuters, 25 January 2024,” Trump opens up lead over Biden in rematch many Americans don't want” ကို #HtayOung, #OungMarine ဆီလျော်အောင် ကောက်နှုတ်ဘာသာပြန်ဆိုသည်။)