Pika (NSS) - ဇန်နဝါရီ ၁၂ 

အမေရိကန် နှင့် ဗြိတိန်တို့သည်  ယီမင်ရှိဟူသီလက်နက်ကိုင်အဖွဲ့နှင့်ဆက်နွယ်သောပစ်မှတ်များကို ဇန်နဝါရီလ (၁၁) ရက်တွင် တိုက်ခိုက်မှုများလုပ်ဆောင်ခဲ့ကြောင်း သိရသည်။

ပြီးခဲ့သည့်နှစ်တွင် ပင်လယ်နီအတွင်းရှိ နိုင်ငံတကာသင်္ဘောများကို ဟူသီလက်နက်ကိုင်အဖွဲ့က တိုက်ခိုက်မှုများ စတင်လုပ်ဆောင်ခဲ့ပြီးနောက်ပိုင်း ပထမဆုံးအကြိမ်အဖြစ် ယခုကဲ့သို့လက်တုံ့ပြန်မှုများ လုပ်ဆောင်ခဲ့ခြင်း ဖြစ်သည်။ အဆိုပါတိုက်ခိုက်မှုတွင် တိုက်လေယာဉ်များ၊ Tomahawk ဒုံးကျည်များ ပါဝင်ကြောင်း အမေရိကန် မီဒီယာအများအပြားက ဖော်ပြခဲ့သည်။

သို့သော်လည်း အဆိုပါသတင်းများနှင့်ပတ်သက်ပြီး မှတ်ချက်ပေးရန် တောင်းဆိုမှုများကို အမေရိကန်တာဝန်ရှိသူ များက ချက်ချင်းပြန်လည်တုံ့ပြန်ဖြေကြားခြင်းမျိုး မရှိသေးကြောင်း သိရသည်။ ဩစတြေးလျ၊ ဘာရိန်း၊ ကနေဒါ နှင့် နယ်သာလန်နိုင်ငံတို့၏ အကူအညီဖြင့် တိုက်ခိုက်မှုများကို လုပ်ဆောင်ခဲ့ခြင်းဖြစ်ကြောင်း အမေရိကန်သမ္မတ ဂျိုးဘိုင်ဒန်က ဇန်နဝါရီလ(၁၁)ရက်တွင် ပြောကြားခဲ့သည်။ 

ဂျိုးဘိုင်ဒန် က "အဲဒီတိုက်ခိုက်မှုဟာ ပင်လယ်နီအတွင်းမှာရှိတဲ့ကုန်တင်သင်္ဘောတွေကို တိုက်ခိုက်နေတဲ့ ဟူသီ လက်နက်ကိုင်အဖွဲ့ရဲ့တိုက်ခိုက်မှုတွေကို တိုက်ရိုက်တုံ့ပြန်တာမျိုးပဲဖြစ်ပါတယ်၊၊ ဟူသီလက်နက်ကိုင်အဖွဲ့ရဲ့ တိုက်ခိုက်မှုတွေဟာ အမေရိကန်ဝန်ထမ်းတွေေ ရေတပ်သားတွေနဲ့ ကျွန်တော်တို့ရဲ့မိတ်ဖက်တွေ၊ ကုန်သွယ်မှုတွေ ကို အန္တရာယ်ဖြစ်စေတာတွေအပြင် လွတ်လပ်စွာရေကြောင်းသွားလာခွင့်ကို ခြိမ်းခြောက်နေပါတယ်။ ပြည်သူတွေ ကို ကာကွယ်ဖို့၊ လွတ်လပ်စွာ ကုန်စည်စီးဆင်းမှုကို ကာကွယ်ဖို့အတွက် တိုက်ရိုက်အစီအစဉ်တွေကို ညွှန်ကြားသွား ဖို့ ကျွန်တော်တုံ့ဆိုင်းနေမှာ မဟုတ်ပါဘူး" ဟု ပြောခဲ့သည်။

ဗြိတိန်တော်ဝင်လေတပ်သည် အမေရိကန်နှင့်အတူ ဟူသီလက်နက်ကိုင်အဖွဲ့များကို ပစ်မှတ်ထားတိုက်ခိုက်ခဲ့ ကြောင်း ဗြိတိန်ဝန်ကြီးချုပ်ဆူနက်က ပြောကြားခဲ့သည်။ ဟူသီလက်နက်ကိုင်အဖွဲ့၏ တိုက်ခိုက်မှုများကို ဟန့်တား ရန်အတွက် နိုင်ငံစုံရေတပ်ပူးပေါင်းစစ်ဆင်ရေး၏ တစ်စိတ်တစ်ပိုင်းအဖြစ် ဗြိတိန်ရေတပ်သည် ပင်လယ်နီအတွင်း ကင်းလှည့်မှုများကို ဆက်လက်လုပ်ဆောင်သွားမည်ဖြစ်ကြောင်း ဆူနက်က ပြောကြားခဲ့သည်။

ဗြိတိန်အစိုးရသည် လွတ်လပ်စွာရေကြောင်းသွားလာခွင့် နှင့် လွတ်လပ်စွာကုန်စည်စီးဆင်းမှုတို့အတွက် အမြဲတမ်း ရပ်တည်သွားမည်ဖြစ်ကြောင်း ဆူနက်ကပြောကြားခဲ့သည်။ Saada မြို့၊ Dhamar မြို့နှင့် Sanaa မြို့ အပါအဝင် နိုင်ငံတစ်ဝှမ်း ဝင်ရောက်တိုက်ခိုက်မှုများဖြစ်ပွားခဲ့ကြောင်း ဟူသီလက်နက်ကိုင်အဖွဲ့အရာရှိတစ်ဦးက ပြောကြားခဲ့ သည်။ 

ဇန်နဝါရီလ(၁၁)ရက်က ဝင်ရောက်တိုက်ခိုက်မှုများသည် Sanaa လေဆိပ်အနီးရှိ စစ်အခြေစိုက်စခန်း၊ Taiz လေဆိပ်အနီးရှိ စစ်အခြေစိုက်စခန်း၊ Hodeidah မြို့ရှိ ဟူသီလက်နက်ကိုင်အဖွဲ့ရေတပ်စခန်း နှင့် Hajjah မြို့ရှိ စစ်အခြေစိုက်စခန်းများကို ပစ်မှတ်ထားတိုက်ခိုက်ခဲ့ခြင်းဖြစ်ကြောင်း မျက်မြင်သက်သေတစ်ဦးက ရိုက်တာသတင်းဌာနသို့ ပြောကြားခဲ့သည်။ အဆိုပါပြောဆိုချက်များနှင့်ပတ်သက်ပြီး အမေရိကန်စစ်ဌာနချုပ် ပင်တဂွန်က မှတ်ချက်ပေးရန် ငြင်းဆိုခဲ့ကြောင်း သိရသည်။