မျိုးကြီး (NSS) - ဇန်နဝါရီ ၁၀

အာဆီယံအထူးကိုယ်စားလှယ်နှင့် EAOs (၇)ဖွဲ့တို့ တွေ့ဆုံဆွေး နွေးခဲ့ပြီး မြန်မာပြည်အတွက် ပိုမိုကောင်းမွန်သော ငြိမ်းချမ်းရေးရရှိရန် အထူးကိုယ်စားလှယ်အနေဖြင့် မျှော်လင့်ထားသည်။

လာအိုနိုင်ငံ၏ မြန်မာနိုင်ငံဆိုင်ရာအထူးကိုယ်စားလှယ်ဖြစ်သော မစ္စတာ Alounkeo Kittikhoun နှင့် NCA လက်မှတ်ရေးထိုးထားသည့် EAOs (၇)ဖွဲ့တို့သည် ယနေ့(ဇန်နဝါရီလ ၁၀ ရက်)တွင် ညနေ ၃ နာရီမှ ၅ နာရီအထိ နေပြည်တော်၌ တွေ့ဆုံဆွေးနွေးခဲ့ကြသည်။

အထူးကိုယ်စားလှယ်သည် မြန်မာနိုင်ငံ၏ နိုင်ငံရေးပြဿနာမှာ အင်မတန်ရှုပ်ထွေးသည့်ပြဿနာတစ်ရပ်အဖြစ် ရှုမြင်သုံးသပ်ထားပုံရကြောင်း အဆိုပါတွေ့ဆုံပွဲသို့ တက်ရောက်ခဲ့သော တိုင်းရင်းသားလက်နက်ကိုင်အဖွဲ့၏ ကိုယ်စားလှယ်တစ်ဦးက NSS ကို ပြောသည်။

“မြန်မာနိုင်ငံ အရေးနဲ့ပတ်သက်ပြီးတော့ ချဉ်းကပ်မှုပုံစံတွေကို ရှင်းပြသွားတာပေါ့။ အချုပ်ပြောရရင် သူ့ရဲ့ချဉ်းကပ်မှုပုံစံနဲ့ သူ့ရဲ့ ပေါ်လစီကို လာပြီးတော့ ရှင်းလင်းပြသွားတာပါ။ တခြားတော့ ထွေထွေထူးထူးဆွေးနွေးတာတော့ မရှိပါဘူး။ အဖွဲ့အစည်းအသီးသီးကလည်းဖြစ်နေတဲ့ မြန်မာနိုင်ငံရဲ့သူ့အမြင်ကိုယ့်အမြင်ကို ဆွေးနွေးတာတော့ရှိပါတယ်။ မြန်မာနိုင်ငံရေးပြဿနာဟာ အင်မတန်ရှုပ်ထွေးနေတဲ့ ပြဿနာတစ်ရပ်လို့တော့ ပြောဆိုသွားတာရှိပါတယ်” ဟု အထက်ပါကိုယ်စားလှယ်က ပြောသည်။

သို့သော် လာအိုနိုင်ငံအနေဖြင့် မြန်မာနိုင်ငံ၏ ငြိမ်းချမ်းရေးလုပ် ငန်းစဉ်များတွင် အင်တိုက်အားတိုက်ပါဝင်ဆောင်ရွက်ပေးမည်ဟု အထူးကိုယ်စားလှယ်က ပြောကြားခဲ့ကြောင်း သိရသည်။

“မြန်မာနိုင်ငံရဲ့ ပြဿနာကို အင်တိုက်အားတိုက်လေ့လာချင်တဲ့ စိတ်ရှိတယ်။ ကူညီချင်တဲ့ စိတ်ရှိတယ်ဆိုတော့ မြန်မာနိုင်ငံအတွက် ကောင်းတဲ့ လက္ခဏာလို့ ပြောလို့ရပါတယ်။ အဓိကတော့ ထူးထူးခြားခြားပြောတာက မြန်မာပြည်အတွက် ငြိမ်းချမ်းရေးကို ပိုမိုကောင်းမွန်တဲ့ ငြိမ်းချမ်းရေးရရှိဖို့အတွက် သူ့အနေနဲ့ မျှော်လင့်တယ်ဆိုတဲ့အကြောင်းတော့ ဆန္ဒပြုသွားတာရှိပါတယ်” ဟု အထက်ပါကိုယ်စားလှယ်က ထပ်မံပြောသည်။

ထို့ပြင် အာဆီယံအထူးကိုယ်စားလှယ်အနေဖြင့် မြန်မာနိုင်ငံနှင့်ပတ်သက်၍ သက်ဆိုင်ရာ stakeholder အားလုံး၏ အသံများကို နားထောင်ကာ အဖြေထုတ်လိုသည့်သဘောဆန္ဒရှိကြောင်း သိရသည်။

“သူတို့အနေနဲ့ကတော့ အကောင်းဆုံးဖြစ်အောင် လေ့လာပြီးတော့ stakeholder အားလုံးဆီက အသံကို နားထောင်ပြီး တော့ အဖြေထုတ်သွားမယ်ဆိုတဲ့ ပုံစံကိုတော့ ကြားရတာပေါ့လေ။ stakeholder အားလုံးပေါ့။ လက်နက်ကိုင်အဖွဲ့အစည်းမှ မဟုတ်ဘူး နိုင်ငံရေးပါတီတွေ၊ ပြည်ပရောက်နေတဲ့ အင်အားစုတွေ စသဖြင့်ပေါ့။ အဲဒီအသံတွေကို အကုန်လုံးနားထောင်ပြီးမှ မြန်မာပြည်က ဘယ်လိုဆက်သွားသင့်လဲ၊ တစ်ပြိုင်နက်တည်း အာဆီယံသဘောတူညီချက်(၅)ချက်ကို သွားမယ်ဆိုတဲ့ အနေ အထားမျိုးတော့ ဖြစ်တာပေါ့” ဟု ၎င်းက ဆက်လက်ပြောသည်။

မြန်မာနိုင်ငံသို့ ရောက်ရှိနေသည့် အာဆီယံအထူးကိုယ်စားလှယ်သည် လာမည့် ဇန်နဝါရီလ ၁၂ ရက်တွင်လည်း ရန်ကုန်မြို့၌ နိုင်ငံရေးပါတီများနှင့် တွေ့ဆုံဆွေးနွေးသွားမည်ဖြစ်သည်။