စော (NSS)- ဇန်နဝါရီ ၁၀

မြန်မာနိုင်ငံ၏ နယ်စပ်ဒေသဖွံ့ဖြိုးရေး နှင့် လူမှုစီပွားဖွံ့ဖြိုးမှုကို အထောက်အကူဖြစ်စေရန် မြန်မာ-အိန္ဒိယအကြား နားလည်မှုစာချွန်လွှာလက်မှတ်ရေးထိုးခဲ့ကြောင်း နစက၏ထုတ်ပြန်ချက်များအရ သိရသည်။

အဆိုပါ အခမ်းအနားကို ယမန်နေ့(ဇန်နဝါရီလ ၉ ရက်)တွင် နေပြည်တော်ရှိ နယ်စပ်ရေးရာဝန်ကြီးဌာန ဝန်ကြီးရုံး အစည်း အဝေးခန်းမ၌ ကျင်းပခဲ့ကြောင်း သိရသည်။

၎င်း အခမ်းအနားတွင် နယ်စပ်ဒေသနှင့် တိုင်းရင်းသားလူမျိုးများ ဖွံ့ဖြိုးတိုးတက်ရေးဦးစီးဌာန ညွှန်ကြားရေးမှူးချုပ် ဦးစိုးထွန်းညိုနှင့် မြန်မာနိုင်ငံဆိုင်ရာ အန္ဒိယသမ္မတနိုင်ငံသံရုံး ဒုတိယအကြီး အကဲ Mr. Ashish Sharma တို့က နားလည်မှုစာချွန်လွှာများကို လက်မှတ်ရေးထိုးခဲ့ကြသည်။

အဆိုပါစာချွန်လွှာအရ နာဂကိုယ်ပိုင်အုပ်ချုပ်ခွင့်ရ ဒေသလဟယ်မြို့နယ်ရှိ တိုက်ရံကျေးရွာအနီး ကုန်းမြင့်လယ်ယာဘက်စုံသုံးခန်းမ (၆၀x၃၀x၁၂) ပေ Steel Structure တစ်ထပ်တည် ဆောက်ခြင်း၊ လဟယ်-နန်းယွန်း(၃)မိုင် (၆)ဖာလုံ လမ်းခွဲမှ လောင်းကျန်းနောက်ကုန်း-တိုက်ရံ- လန်ထိန်လမ်းခွဲကြား ပေ ၂၀ နှစ်လွှာတစ်ထပ်ဘေလီတံတား တစ်စင်း နှင့် (၅x၅x၂၆)ပေ Box Culvert လေးစင်း တည်ဖောက်ခြင်း စီမံကိန်းများကို ဆောင်ရွက်သွားမည်ဖြစ်ကြောင်း သိရသည်။

ထို့ပြင် မြန်ဆန်စွာ အကျိုးဖြစ်ထွန်းစေမည့် စီမံချက်များ (Quick Impact Projects) သည် စီမံကိန်းတန်ဖိုးအားဖြင့် စီမံချက်တစ်ခုလျှင် အမေရိကန်ဒေါ်လာ (၅၀၀၀၀)ခွင့်ပြုပေးထားပြီး မြန်မာ နိုင်ငံ၏ နယ်စပ်ဒေသဖွံ့ဖြိုးရေးနှင့် လူမှုစီပွားဖွံ့ဖြိုးမှုကို အထောက်အကူဖြစ်စေရန် အန္ဒိယနိုင်ငံအစိုးရမှ ပံ့ပိုးကူညီပေးခြင်းဖြစ်ကြောင်း သိရသည်။

ပြီးခဲ့သည့် နိုဝင်ဘာလ ၆ ရက်တွင် နေပြည်တော်ရှိ ရင်းနှီးမြှုပ် နှံမှုနှင့်နိုင်ငံခြား စီးပွားဆက်သွယ်ရေးဝန်ကြီးဌာန၌ မြန်မာနိုင်ငံ အလယ်ပိုင်း၊ အပူပိုင်းဇုန်ဒေသရှိ မိုးခေါင်ရေရှား ကျေးရွာများတွင် ဆိုလာစွမ်းအင်ဖြင့် ရေပေးဝေရေးစီမံချက်ဆိုင်ရာနားလည် မှုစာချွန်လွှာ အပါအဝင် ဌာနဆိုင်ရာ အီလက်ထရောနစ် စာကြည့်တိုက် စီမံချက်ဆိုင်ရာ နားလည်မှုစာချွန်လွှာ နှင့် ရန်ကုန်တိုင်း၊ ကွမ်းခြံကုန်းမြို့နယ်၌ အသေးစားလေစွမ်းအင်ဖြင့် ကျေးလက်ဒေသများ လျှပ်စစ်မီးပေးရေး စီမံချက်ဆိုင်ရာ နားလည်မှုစာချွန်လွှာတို့ကို လက်မှတ်ရေးထိုးခဲ့ကြကြောင်း သိရသည်။