ကျော် (NSS) - ဇန်နဝါရီ ၈

ရန်ကုန်တိုင်းအတွင်း ပြေးဆွဲလျက်ရှိသည့် YBS ကားများ ညအိပ်ရပ်နားရာ၌လုံခြုံမှုရှိစေရန် ရန်ကုန်တိုင်းဒေသကြီး ပုဂ္ဂလိက သယ်ယူပို့ဆောင်ရေးကြီးကြပ်မှုကော်မတီ(YRTC) မှ YBS ယာဥ်ရပ်နားဝင်းများအား ၂ဝ၂၃ ခုနှစ်မှစတင်၍ မြို့နယ်အချို့၌ တည်ဆောက်လျက်ရှိသည်။

ထိုသို့တည်ဆောက်လျက်ရှိရာ ၂ဝ၂၃ ခုနှစ်အတွင်း၌ ပြီးစီးခြင်းမရှိသေးဘဲ အပြီးသတ်ဆောက်လုပ်ရန်ကျန်ရှိသည့် YBS ယာဥ်ရပ်နားဝင်းများကို ယခုနှစ်(၂ဝ၂၄ ခုနှစ်) အတွင်း ပြီးစီးအောင်ဆောင်ရွက်သွားမည်ဟု YRTC ၏ တွဲဖက် အတွင်းရေးမှူးဦးလျန်ကျင့်မန်က NP News ကို ပြောသည်။

"YBS ကားတွေရပ်ဖို့ ယာဥ်ရပ်ဝင်းတွေက ရန်ကုန်တိုင်းအတွင်းမှာ ၁၅ ဝင်းလောက်ရှိတယ်။ လိုအပ်တာတွေ ဆောက်လုပ်နေဆဲပါ။ လက်ရှိမှာဆိုရင် လှိုင်သာယာမြို့နယ်ထဲက (၃)ဧကလောက်ရှိတဲ့မြေပေါ်မှာ ယာဥ်ရပ်နားဝင်း ဆောက်လုပ်တာကတော့ပြီးသွားပြီ။ အခုဆက်လုပ်နေတာက ဒဂုံတောင်ဘက်မှာ အိုးအိမ် ဦးစီးဌာနက ခွင့်ပြုပေးထားတဲ့ (၅)ဧကအကျယ်ရှိတဲ့မြေပေါ်မှာ ယာဥ်ရပ်နားဝင်းကို ဖော်ဆောင်နေပါတယ်" ဟု YRTC ၏ တွဲဖက်အတွင်းရေးမှူးဦးလျန်ကျင့်မန်က NP News ကိုပြောသည်။

ယာဥ်ရပ်နားဝင်းများ တည်ဆောက်ခြင်းဖြင့် YBS ကားများ ညပိုင်းအချိန်ရပ်နားရာ၌ လမ်းများပေါ်တွင် ရပ်နားရ ခြင်းကြောင့် ယာဥ်ကြောပိတ်ဆို့မှုများ၊ လမ်းပိတ်ခြင်းများ၊ YBS ကားများ၏ ကားပစ္စည်းများကို ဖြုတ်ခိုးမှုများ ရန်မှ ကာကွယ်သွားနိုင်မည်ဖြစ်ကြောင်းလည်း သိရသည်။

"YBS ကားတွေလမ်းပေါ်မှာရပ်ပြီး ညအိပ်ထားရတဲ့အတွက် လုံခြုံရေးအခြေအနေအရလည်း မကောင်းဘူး။ ဒါ့ကြောင့် ယာဥ်ရပ်နားဝင်းတွေကို ဒီနှစ်ထဲမှာ ပြီးစီးအောင်လုပ်ဆောင်နေတာပါ။ အဓိကကတော့ တစ်ချို့ ယာဥ်လိုင်းကုမ္ပဏီကြီးတွေက သူတို့ရဲ့ယာဥ်ရပ်နားဝင်းတွေရှိပြီးသား ယာဥ်လိုင်းကုမ္ပဏီလေးတွေက ယာဥ်ရပ်နား ဝင်း မရှိသေးဘူး။ ဒါ့ကြောင့် ယာဥ်လိုင်းကုမ္ပဏီငယ်လေးတွေအတွက် ဆောင်ရွက်ပေးတာပါ" ဟု YRTC ၏ တွဲဖက် အတွင်းရေးမှူးဦးလျန်ကျင့်မန်က NP News ကို ပြောသည်။

ယာဥ်ရပ်နားဝင်းများအတွင်း၌ သက်ဆိုင်ရာမြို့နယ်အလိုက်တွင် အခြေပြုပြေးဆွဲလျက်ရှိသည့် YBS ယာဥ်လိုင်းများ အားလုံးကို ရပ်နားခွင့်ပြုသွားမည်ဖြစ်ပြီး ယာဥ်ရပ်နားဝင်းများအားလုံးပြီးစီးပါက ယင်း ယာဥ်ရပ်နားဝင်းများ အားလုံးကို YBS ယာဥ်လိုင်းများအားလုံး၏ ဂိတ်စအဖြစ် ပြောင်းလဲပေးသွားမည်ဖြစ်ကြောင်း သိရသည်။

"ယာဥ်ရပ်နားဝင်းတွေ လုပ်နေတယ်ဆိုတော့ ကောင်းတာပေါ့ဗျာ။ ကျွန်တော်တို့ကားတွေ ညပိုင်းရပ်ရတဲ့အခါ စိတ်ချလက်ချရပ်ထားလို့ရပြီပေါ့။ အခုဆိုရင် ဂိတ်မှာ ရပ်ထားရတဲ့ကားတွေရှိတယ်။ တစ်ချို့ အိမ်ရှေ့တွေမှာ ရပ်ထားရတာတွေရှိတယ်။ ကားမီးလုံးတွေ နောက်ကြည့်မှန်တွေဆိုရင် ခဏခဏခိုးခံရတယ်။ အဲဒီလို ယာဥ်ရပ်နား ဝင်းလုပ်နေတယ်ဆိုတော့ ကားပစ္စည်းတွေ ခိုးခံရမှာ စိတ်ပူစရာမလိုတော့ပါဘူး" ဟု သင်္ဃန်းကျွန်း-ရွာသာကြီး (လေးထောင့်ကန်) ပြေးဆွဲပေးနေသည့် YBS ၇၁ ယာဥ်မောင်း ကိုကျော်စွာက NP News ကို ပြောသည်။

ယာဥ်ရပ်နားဝင်းများအား ဒဂုံမြို့သစ်(ဆိပ်ကမ်း) မြို့နယ်၊ သာကေတမြို့နယ်၊ ဒဂုံမြို့သစ်(တောင်ပိုင်း)မြို့နယ်၊ မြောက်ဥက္ကလာပမြို့နယ်၊ ရွှေပေါက်ကံမြို့သစ်၊ မင်္ဂလာဒုံမြို့နယ်၊ ထောက်ကြန့်မြို့နှင့် လှိုင်သာယာမြို့နယ်တို့တွင် ဖော်ဆောင်လျက်ရှိပြီး ယာဥ်ရပ်နားဝင်းပေါင်း (၁၅)ဝင်းရှိသည်ဟု  YRTC တွဲဖက်အတွင်းရေးမှူးဦးလျန်ကျင့်မန်၏ ပြောကြားချက်အရ သိရသည်။