ဂျန်ဇက် (NSS) - ဇန်နဝါရီ ၆ 

အမေရိကန်အစိုးရဟာ ဟားမက်စ်လက်နက်ကိုင်အဖွဲ့ရဲ့ ဘဏ္ဍာရေးကွန်ရက်လမ်းကြောင်းတွေကို ဖျက်ဆီးနိုင်ဖို့ ရည်ရွယ်ချက်နဲ့ ဟားမက်စ်အဖွဲ့ကို ငွေကြေး အဓိကကူညီထောက်ပံ့ပေးနေသူ ၅ ဦးရဲ့သတင်းကို ပေးနိုင်သူကို ဆုကြေးငွေ အမေရိကန်ဒေါ်လာ ၁ဝ သန်း ချီးမြှင့်သွားမယ်လို့ သတင်းထုတ်ပြန်လိုက်ပါတယ်။

ဟားမက်စ်အဖွဲ့ကို ငွေကြေးကူညီထောက်ပံ့ပေးနေတဲ့ အဓိက ငါးဦးထဲမှာ သုံးဦးက တူရကီနိုင်ငံ အခြေစိုက်ဖြစ်ကြောင်း သိရပါတယ်။ အစ္စရေးနဲ့ ဟားမက်စ်လက်နက်ကိုင်အဖွဲ့ကြား စစ်ပွဲဖြစ်လာခဲ့ပြီးနောက်ပိုင်း အမေရိကန် အစိုးရဟာ ဟားမက်စ်လက်နက်ကိုင်အုပ်စုကိုပစ်မှတ်ထားပြီး ပိတ်ဆို့မှု လေးကြိမ် ချမှတ်ခဲ့ကြောင်း သိရပါတယ်။ 

ဟားမက်စ်အဖွဲ့ကို ငွေကြေးကူညီထောက်ပံ့ပေးနေသူ ငါးဦးထဲမှာ ဆူဒန်နိုင်ငံ အခြေစိုက်စီးပွားရေးလုပ်ငန်းရှင် တစ်ဦး၊ လက်ဘနွန်အခြေစိုက်ဟစ်ဘိုလာလက်နက်ကိုင်အဖွဲ့ခေါင်းဆောင် တစ်ဦးနဲ့ တူရကီနိုင်ငံမှာ အခြေစိုက် နေထိုင်သူ ၃ ဦးတို့ ပါဝင်နေကြောင်း သိရပါတယ်။ 

အမေရိကန်အစိုးရက ဟားမက်စ်အဖွဲ့ ဝင်ငွေရရှိစေမယ့် အရင်းမြစ်၊ အဓိကကူညီထောက်ပံ့ပေးနေသူ၊ ဟားမက်စ် ကို ငွေကြေး လွှဲပြောင်းပေးနေတဲ့လမ်းကြောင်းနဲ့ နည်းပညာကုမ္မဏီများ၊ ဟားမက်စ်အဖွဲ့အကျိုးကျေးဇူးဖြစ်စေ မယ့် ရာဇဝတ်မှုအစီအစဉ်များကို သတင်းပေးနိုင်သူကို ဆုကြေးငွေပေးသွားမှာဖြစ်ကြောင်း သတင်းထုတ်ပြန်ထား ပါတယ်။ 

အမေရိကန်နိုင်ငံခြားရေးဝန်ကြီး အန်တိုနီဘလီကန်ဟာ လက်ရှိအချိန်မှာ အရှေ့အလယ်ပိုင်းဒေသကို သွားရောက် မှာဖြစ်ပြီး တူရကီသမ္မတ အာဒိုဂမ်နဲ့လည်း တွေ့ဆုံဆွေးနွေးမှာဖြစ်ကြောင်း သိရပါတယ်။ အစ္စရေးအစိုးရကလည်း ဟားမက်စ်လက်နက်ကိုင်အဖွဲ့ခေါင်းဆောင်တွေနဲ့ပတ်သက်ပြီး သတင်းပေးနိုင်သူကို အမေရိကန်ဒေါ်လာ ၄ သန်း ပေးမယ်လို့ မကြာသေးမီက ဆုကြေး ထုတ်ပြန်ထားပါတယ်။