Pika (NSS) - ဇန်နဝါရီ ၅ 

ယူကရိန်းပဋိပက္ခအတွင်း ရုရှားတပ်ဖွဲ့များ (သို့မဟုတ်) အခြားစစ်တပ်ဆိုင်ရာ တပ်ဖွဲ့များတွင် တာဝန်ထမ်းဆောင် ရန်အတွက် စာရင်းသွင်းထားသော နိုင်ငံခြားသားများကို ရုရှားပတ်စ်ပို့များ ရယူပိုင်ခွင့်ပေးအပ်သည့်အမိန့်စာကို ရုရှားသမ္မတပူတင်က လက်မှတ်ရေးထိုးခဲ့ကြောင်း သိရသည်။

အဆိုပါ အမိန့်စာအရ ယင်းနိုင်ငံခြားသားများ၏ မိသားစုဝင်များသည်လည်း ရုရှားနိုင်ငံသား ခံယူပိုင်ခွင့်ရရှိမည်ဖြစ် ကြောင်း သိရသည်။ ထို့အပြင် နိုင်ငံသားဖြစ်ခွင့်ဆိုင်ရာစည်းမျဉ်းများသည် တိုက်ပွဲဝင်နေစဉ်အချိန်အတွင်း ကျန်းမာရေးအကြောင်းပြချက်များ၊ အသက်ကန့်သတ်ချက်များ (သို့မဟုတ်) စာချုပ်သက်တမ်းကုန်ဆုံးသွားခြင်း ကြောင့် စစ်တပ်မှ ထုတ်ပယ်ခံခဲ့ရသော နိုင်ငံခြားသားများအတွက်လည်း အကျုံးဝင်မည်ဖြစ်ကြောင်း သိရသည်။

ပြည်ထဲရေးဝန်ကြီးဌာနသို့ သက်ဆိုင်ရာစာရွက်စာတမ်းများ တင်ပြပြီးနောက် တစ်လအတွင်း နိုင်ငံခြားသားများ အတွက် ရုရှား မှတ်ပုံတင်ရယူရန် လျှောက်လွှာများကို ထည့်သွင်းစဉ်းစားသွားမည်ဖြစ်ကြောင်း သိရသည်။ အဆိုပါ လှုပ်ရှားမှုသည် ရုရှားနိုင်ငံအတွက် တိုက်ပွဲများတွင် ပါဝင်ခဲ့သည့် နိုင်ငံခြားသားများကို အခြားနိုင်ငံများသို့ လွှဲပြောင်းပေးခြင်းဆိုင်ရာပြဿနာများကိုဖြေရှင်းရာတွင် အထောက်အကူဖြစ်စေမည်ဖြစ်ကြောင်း ရုရှား လွှတ်တော်သတင်းအချက်အလက်မူဝါဒကော်မတီအကြီးအကဲ Aleksandr Khinshtein က ပြောကြားခဲ့သည်။

၎င်းက "စစ်မှုထမ်းဟောင်းတွေကို အခြားနိုင်ငံတွေကို လွှဲပြောင်းပေးချိန်မှာ ကြေးစားစစ်သားတွေအဖြစ် အပြစ်ပေး ခံရတဲ့ပြဿနာကို ဖြေရှင်းနိုင်တော့မှာပါ။ ရုရှားအစိုးရဟာ သူ့ရဲ့နိုင်ငံသားတွေကို ဘယ်တော့မှ လွှဲပြောင်းပေးမှာ မဟုတ်ပါဘူး" ဟု ပြောခဲ့သည်။

ထို့အပြင် နိုင်ငံခြားသားများကို ၂ဝ၂၂ ခုနှစ် နိုဝင်ဘာလကတည်းက ရုရှားစစ်တပ် နှင့် စာချုပ်ချုပ်ဆိုခွင့်ပြုထားခဲ့ ခြင်းဖြစ်ကြောင်း သိရသည်။ ရုရှား၏ စစ်ဘက်ဆိုင်ရာတပ်ဖွဲ့များတွင် ပါဝင်ခဲ့သော နိုင်ငံခြားသားအရေအတွက် သည် ပြီးခဲ့သည့်နှစ်နှင့် နှိုင်းယှဉ်မည်ဆိုပါက (၇)ဆထိ တိုးလာကြောင်း ရုရှားကာကွယ်ရေးဝန်ကြီးဆာဂေးရှိုဂူက ပြီးခဲ့သည့်လတွင် ထုတ်ဖော်ပြောခဲ့ဖူးသည်။

သို့သော်လည်း ရုရှားစစ်တပ်တွင် ပါဝင်ခဲ့သည့် နိုင်ငံခြားသားအရေအတွက်အတိအကျကို ဆာဂေးရှိုဂူက ထုတ်ဖော် ပြောဆိုခဲ့ခြင်းမျိုး မရှိခဲ့ကြောင်း သိရသည်။