Pika (NSS) - ဇန်နဝါရီ ၅ 

မကြာသေးမီက ယူကရိန်းတိုက်ခိုက်ရာတွင် ရုရှားတပ်ဖွဲ့များ အသုံးပြုသော ပဲ့ထိန်းဒုံးကျည်များ နှင့် ဒုံးကျည် လောင်ချာများကို မြောက်ကိုရီးယားက ထောက်ပံ့ပေးခဲ့ခြင်းဖြစ်ကြောင်း အမေရိကန်အစိုးရက ဇန်နဝါရီလ (၄) ရက်တွင် ထုတ်ဖော်ပြောခဲ့သည်။

ယူကရိန်းကို ကျူးကျော်တိုက်ခိုက်မှု(၂)နှစ်ပြည့်ခါနီးအချိန်တွင် ရုရှားနိုင်ငံသည် လက်နက်ပြတ်တောက်မှုများနှင့် ကြုံတွေ့နေရသည့်အတွက် ၎င်း၏ မိတ်ဖက်အီရန်နိုင်ငံထံမှ ဒုံးကျည်များရယူနိုင်ရန် ကြိုးပမ်းနေကြောင်း အမေရိကန်အစိုးရက ပြောခဲ့သည်။

ရုရှားတပ်ဖွဲ့များသည် မြောက်ကိုရီးယားက ထောက်ပံ့ပေးခဲ့သော အကွာအဝေးကီလိုမီတာ(၉ဝဝ)အထိ ရောက်ရှိ နိုင်သောဒုံးကျည်များကို ပြီးခဲ့သည့််သီတင်းပတ်အတွင်း လုပ်ဆောင်ခဲ့သော ယူကရိန်းအပေါ် တိုက်ခိုက်မှုနှစ်ကြိမ် တွင် အသုံးပြုခဲ့ကြောင်း အမျိုးသားလုံခြုံရေးကောင်စီပြောရေးဆိုခွင့်ရှိသူ ဂျွန်ကာဘိုင်က ပြောကြားခဲ့သည်။

"ကျွန်တော်တို့ရဲ့သတင်းအချက်အလက်တွေအရ မြောက်ကိုရီးယားဟာ ရုရှားနိုင်ငံကို ပဲ့ထိန်းဒုံးကျည်လောင်ချာ တွေနဲ့ ပဲ့ထိန်းဒုံးကျည်အများအပြားကို မကြာသေးမီက ထောက်ပံ့ပေးခဲ့ပါတယ်။ ဒါဟာ ရုရှားအတွက် မြောက်ကိုရီးယားရဲ့ကူညီထောက်ပံ့မှုတွေ တိုးမြင့်လာမှုနဲ့ပတ်သက်ပြီး သိသာထင်ရှားတဲ့အချက်တစ်ခုပါ" ဟု ဂျွန်ကာဘိုင် က  ပြောခဲ့သည်။

အဆိုပါဖွံ့ဖြိုးတိုးတက်မှုက အမေရိကန်လွှတ်တော်သည် ယူကရိန်းကို နောက်ထပ်စစ်ရေးအကူအညီများ ပေးဆောင်ရန် လိုအပ်သည်ဆိုသည့်အချက်ကို ဖော်ပြခဲ့ကြောင်း ဂျွန်ကာဘိုင်က ပြောခဲ့သည်။ ပြီးခဲ့သည့်ရက်များ အတွင်း ရုရှား၏ လေကြောင်းတိုက်ခိုက်မှုများကို ဆက်တိုက်ကြုံတွေ့နေရသည့် ယူကရိန်းအတွက် လေကြောင်းရန်ကာကွယ်ရေးစနစ်များမှာ အဓိကဦးစားပေးဖြစ်ကြောင်း ဂျွန်ကာဘိုင်က ပြောခဲ့သည်။ 

ဂျွန်ကာဘိုင် က "ဒီအချိန်မှာ အမေရိကန်လွှတ်တော်ဟာ ယူကရိန်းနိုင်ငံသားတွေ ကိုယ့်ကိုယ်ကိုယ် ခုခံကာကွယ်ဖို့ အတွက် လိုအပ်တာတွေကို ကူညီထောက်ပံ့ပေးဖို့ အရေးကြီးပါတယ်။ ဒီအချိန်ဟာ အမေရိကန်လွှတ်တော်အတွက် တုံ့ပြန်မှုတွေလုပ်ဆောင်ဖို့ အချိန်ရောက်နေပါပြီ" ဟု ပြောခဲ့သည်။

ပြီးခဲ့သည့် ဒီဇင်ဘာလ(၃ဝ)ရက်တွင် ရုရှားတပ်ဖွဲ့များသည် မြောက်ကိုရီးယားက ထောက်ပံ့ပေးခဲ့သော ဒုံးကျည်များ ထဲမှ အနည်းဆုံးတစ်စင်းကို ပစ်လွှတ်ခဲ့ပြီး ဇာပိုရိုဇီရာဒေသရှိ ကွင်းပြင်တစ်ခုအတွင်း ကျရောက်သွားခဲ့ကြောင်း ဂျွန်ကာဘိုင်က ပြောကြားခဲ့သည်။ ထို့နောက် ဇန်နဝါရီလ(၂ဝ)ရက်တွင် ရုရှားတပ်ဖွဲ့များသည် ကြီးမားသော လေကြောင်းတိုက်ခိုက်မှု တစ်စိတ်တစ်ပိုင်းအဖြစ် ပဲ့ထိန်းဒုံးကျည်အများအပြားဖြင့် ယူကရိန်းကို ပစ်ခတ်တိုက်ခိုက်ခဲ့ကြောင်း ၎င်းက ထပ်မံပြောခဲ့သည်။