ဂျန်ဇက် (NSS) - ဇန်နဝါရီ ၅ 

မြန်မာနိုင်ငံမြောက်ပိုင်းမှာဖြစ်ပွားနေတဲ့တိုက်ပွဲတွေ အပစ်ခတ်ရပ်စဲနိုင်ဖို့ တပ်မတော်ကိုယ်စားလှယ်များနဲ့ မြောက်ပိုင်းမဟာမိတ်လက်နက်ကိုင်အဖွဲ့ Northern Alliance ကိုယ်စားလှယ်တွေဟာ တရုတ်နိုင်ငံ ကူမင်းမြို့မှာ ဇန်နဝါရီ ၇ ရက်ကနေ ၉ ရက်အထိ တတိယအကြိမ်မြောက် တွေ့ဆုံဆွေးနွေးသွားမယ်လို့ သိရပါတယ်။

ရှမ်းပြည်နယ်မြောက်ပိုင်း လောက်ကိုင်မြို့မှာဖြစ်ပွားနေတဲ့တိုက်ပွဲတွေနဲ့ပတ်သက်ပြီး မြန်မာတပ်မတော် နဲ့ မြောက်ပိုင်းမဟာမိတ်လက်နက်ကိုင်အဖွဲ့သုံးဖွဲ့ကြား အပြီးသတ်ဖြေရှင်းနိုင်ခြင်း မရှိသေးတဲ့အတွက် လောက်ကိုင်မြို့မှာ တိုက်ပွဲတွေ ဆက်လက်ဖြစ်ပွားနေဆဲဖြစ်ကြောင်း သိရပါတယ်။ 

ပြီးခဲ့တဲ့ရက်ပိုင်းကလည်း မြန်မာနိုင်ငံဘက်ခြမ်းက ပစ်ခတ်လိုက်တဲ့ကျည်ဆံတွေဟာ တရုတ်ဘက်ခြမ်းကို ကျရောက်ပေါက်ကွဲခဲ့ရာ တရုတ်နိုင်ငံသားတွေ ထိခိုက်မှုတွေရှိခဲ့ပြီး၊ အဲဒီပစ်ခတ်မှုနဲ့ပတ်သက်ပြီး ဝန်ခံထားတဲ့ အဖွဲ့အစည်းမရှိသေးကြောင်း သိရပါတယ်။ 

ရခိုင်လက်နက်ကိုင်အဖွဲ့၊ ကိုးကန့်လက်နက်ကိုင်အဖွဲ့၊ တအောင်းလက်နက်ကိုင်အဖွဲ့သုံးဖွဲ့ပေါင်းထားတဲ့ မြောက်ပိုင်းမဟာမိတ်အဖွဲ့ဟာ အောက်တိုဘာ ၂၇ ရက်မှာ တပ်မတော်စခန်းတွေကို တိုက်ခိုက်ခဲ့ပြီး ရှမ်းပြည်နယ် မြောက်ပိုင်းမှာ တိုက်ပွဲတွေဖြစ်လာခဲ့ကြောင်း သိရပါတယ်။ 

မြန်မာတပ်မတော်ကိုယ်စားလှယ်အဖွဲ့ကို ဒုတိယဗိုလ်ချုပ်ကြီးမင်းနိုင် ဦးဆောင်မှာဖြစ်ပြီး တအောင်းလက်နက် ကိုင်အဖွဲ့၊ ရခိုင်လက်နက်ကိုင်အဖွဲ့နဲ့ ကိုးကန့်လက်နက်ကိုင်အဖွဲ့တာဝန်ရှိသူတွေ တက်ရောက်ဆွေးနွေးခဲ့ကြောင်း သိရပါတယ်။ ၎င်းတို့ဟာ ပြီးခဲ့တဲ့ ဒီဇင်ဘာ ၂၃ ရက် နဲ့ ၂၄ ရက်တို့မှာ အပစ်ခတ်ရပ်စဲရေးဆွေးနွေးခဲ့ပေမယ့် တိကျတဲ့သဘောတူညီချက်တွေမရခဲ့တဲ့အတွက် ရှမ်းပြည်နယ်မြောက်ပိုင်းမှာ တိုက်ပွဲတွေ ဆက်လက်ဖြစ်ပွားနေခဲ့ကြောင်း သိရပါတယ်။

တရုတ်နိုင်ငံ ကူမင်းမြို့မှာ ကျင်းပမယ့် တပ်မတော် နဲ့ မြောက်ပိုင်းမဟာမိတ်သုံးဖွဲ့ကြား တွေ့ဆုံဆွေးနွေးမယ့် တတိယအကြိမ်မြောက် ငြိမ်းချမ်းရေးဆွေးနွေးပွဲကို တရုတ်အထူးကိုယ်စားလှယ် Deng Xijun လည်း တက်ရောက်မှာဖြစ်ကြောင်း သိရပါတယ်။ 

တရုတ်အစိုးရဟာ မြန်မာနိုင်ငံ နဲ့ မြောက်ပိုင်းမဟာမိတ်အဖွဲ့တွေကြားဖြစ်ပွားနေတဲ့ လက်နက်ကိုင်ပဋိပက္ခတွေကို အပစ်ခတ်ရပ်စဲနိုင်ဖို့ ကြားဝင်စေ့စပ်ပေးနေပေမယ့် လက်ရှိအချိန်အထိ အပြည့်အဝသဘောတူညီမှု မရသေးကြောင်း သိရပါတယ်။