မျိုးကြီး (NP News) - မတ် ၁၇

မြန်မာအမျိုးသားလေကြောင်းလိုင်း(MNA) ကုမ္ပဏီ အပါအဝင် ကုမ္ပဏီ(၂ဝ)၏ နိုင်ငံခြားငွေ ဝယ်ယူရောင်းချလဲလှယ်ပေးခွင့်လိုင်စင်များကို ဗဟိုဘဏ်မှ ရုပ်သိမ်းလိုက်ကြောင်း သတင်းရရှိသည်။

မြန်မာနိုင်ငံတော်ဗဟိုဘဏ်က ယခုရက်ပိုင်းအတွင်း အထက်ပါကဲ့သို့ ထုတ်ပြန်ကြေညာခဲ့ခြင်းဖြစ်သည်။

ဗဟိုဘဏ်မှ ခွင့်ပြုထုတ်ပေးထားသည့် နိုင်ငံခြားငွေများ ဝယ်ယူရောင်းချလဲလှယ်ပေးခွင့်လိုင်စင်ရကုမ္ပဏီ (၂ဝ) သည် မြန်မာနိုင်ငံတော်ဗဟိုဘဏ်က ထုတ်ပြန်ထားသော အမိန့်နှင့်ညွှန်ကြားချက်များကို လိုက်နာမှုမရှိကြောင်း သိရသည်။

ထို့ကြောင့် ၎င်းကုမ္ပဏီ(၂ဝ) ၏ နိုင်ငံခြားငွေများ ဝယ်ယူရောင်းချလဲလှယ်ပေးခွင့်လိုင်စင် (Money Changer License) အား ဒါရိုက်တာအဖွဲ့အစည်းအဝေးဆုံးဖြတ်ချက်အရ ရုပ်သိမ်းလိုက်ကြောင်း ဗဟိုဘဏ်က သတင်းထုတ်ပြန်ထားသည်။

၎င်းကဲ့သို့ လိုင်စင်ရုပ်သိမ်းခံရသည့် ကုမ္ပဏီ(၂ဝ)မှာ Myanmar National Airlines Co., Ltd၊ Oake Khaung Travels & Tours Co., Ltd၊ Senjo Royal Myanmar Co., Ltd၊ Dawei Popular Co., Ltd၊ Zam Myo Co., Ltd၊ Phyo Thet (PT) Co., Ltd၊ Sky Bound Co., Ltd၊ Myanmar MCG Corporation Ltd၊ Htwe and Htwe Family Co., Ltd၊ Won Won Co., Ltd၊ United Eleven Co., Ltd၊ Tun Yama Co., Ltd၊ Myanmar Alinkar Hotel Group Co., Ltd၊ Cartel Co., Ltd၊ Super Phoneix Co., Ltd၊ Golden Falcon Shipping Co., Ltd၊ Fairness Travels & Tours Co., Ltd၊     Yadanar Bon Travels & Tours Co., Ltd၊ Dewant Financial Loan Microfinance Co., Ltd နှင့် Treasure Su Co., Ltd တို့ဖြစ်ကြောင်း ဗဟိုဘဏ်က အသိပေးထုတ်ပြန်ထားသည်။

အလားတူ ပြီးခဲ့သော ဇန်နဝါရီ ၂၃ ရက်တွင်လည်း Imperial Myanmar Finance ကုမ္ပဏီ၏ Money Changer လိုင်စင်အား ရုပ်သိမ်းကြောင်း မြန်မာနိုင်ငံတော်ဗဟိုဘဏ်က အသိပေးကြေညာထားဖူးသည်။

ဗဟိုဘဏ်အနေဖြင့် နိုင်ငံခြားငွေ အမေရိကန်တစ်ဒေါ်လာ လဲလှယ်နှုန်းအား မြန်မာကျပ်ငွေ ၂၁ဝဝ နှုန်း သတ်မှတ် ထားပြီး ပြင်ပဈေးကွက်၌ အမေရိကန်တစ်ဒေါ်လာလျှင် ငွေကျပ် ၂၈ဝဝ နှင့်အထက်တွင် အရောင်းအဝယ်ပြုလုပ်လျက်ရှိကြောင်း သိရသည်။