Pika (NSS) - ဇန်နဝါရီ ၁ 

တရုတ်နှင့် ထိုင်ဝမ်ဆက်ဆံရေးကို ပြည်သူများ၏ ဆန္ဒဖြင့် ဆုံးဖြတ်ရမည်ဖြစ်ပြီး ငြိမ်းချမ်းရေးသည် ဂုဏ်သိက္ခာ အပေါ် အခြေခံရမည်ဖြစ်ကြောင်း ထိုင်ဝမ်သမ္မတဆိုင်အမ်ဝမ်က ဇန်နဝါရီလ(၁)ရက်တွင် ထုတ်ဖော်ပြောကြားခဲ့သည်။ 

တရုတ်နှင့် ထိုင်ဝမ်ကျွန်းပြန်လည်ပေါင်းစည်းမှုမှာ ရှောင်လွှဲလို့မရသည့်ကိစ္စတစ်ခုဖြစ်ကြောင်း တရုတ်သမ္မတ ရှီကျင့်ဖျင် က ပြောဆိုခဲ့ပြီးနောက် ဆိုင်အမ်ဝမ်၏ ပြောဆိုချက်များထွက်ပေါ်လာခြင်းဖြစ်သည်။ တရုတ်အစိုးရ သည် လာမည့်ဇန်နဝါရီလ(၁၃)ရက်တွင် သမ္မတရွေးကောက်ပွဲ နှင့် လွှတ်တော်ရွေးကောက်ပွဲများကျင်းပမည့် ထိုင်ဝမ်ကျွန်းမှာ ၎င်း၏ ပိုင်နက်နယ်မြေဖြစ်ကြောင်း အခိုင်အမာပြောဆိုထားပြီး စစ်ရေးအရ ဖိအားပေးမှုများကို ပိုမိုအရှိန်မြှင့်လုပ်ဆောင်လျက်ရှိကြောင်း သိရသည်။

ထိုင်ဝမ်ရေလက်ကြား၏ အခြားတစ်ဖက်တွင်ရှိသော ပြည်သူများမှာ တရုတ်ပြည်မကြီး၏ မိသားစုဝင်များ ဖြစ်ကြောင်း ရှီကျင့်ဖျင်ကပြောဆိုခဲ့သည်။ ထို့အပြင် ရှီကျင့်ဖျင်၏ မိန့်ခွန်းများနှင့်ပတ်သက်ပြီး မှတ်ချက်ပေးရန် တောင်းဆိုမှုများကို ဆိုင်အမ်ဝမ်က ပြန်လည်တုံ့ပြန်ဖြေကြားခဲ့ကြောင်းလည်း သိရသည်။

တရုတ် နှင့် ထိုင်ဝမ်ကျွန်းကြားဆက်ဆံရေးတွင် လိုက်နာရမည့်အရေးအကြီးဆုံး အခြေခံသဘောတရားမှာ ဒီမိုကရေစီဖြစ်ကြောင်း ဆိုင်အမ်ဝမ် က ပြောဆိုခဲ့သည်။ ဆိုင်အမ်ဝမ် က "ထိုင်ဝမ်ပြည်သူတွေရဲ့ပူးတွဲဆန္ဒတွေကို ခံယူပြီး ဆုံးဖြတ်ချက်တွေချရမှာပါ။ ကျွန်မတို့နိုင်ငံဟာ ဒီမိုကရေစီနိုင်ငံတစ်နိုင်ငံပါ။ ထိုင်ဝမ်ကျွန်းရဲ့ ရွေးကောက်ပွဲ ရလဒ်တွေကို တရုတ်နိုင်ငံက လေးစားသင့်ပါတယ်။ ပြီးတော့ ရေလက်ကြားအတွင်းမှာ ငြိမ်းချမ်းရေးနဲ့ တည်ငြိမ်ရေးကို ထိန်းသိမ်းဖို့က နှစ်ဖက်လုံးမှာ တာဝန်ရှိပါတယ်" ဟု ပြောခဲ့သည်။

တရုတ်အစိုးရသည် ဆိုင်အမ်ဝမ်ကို ခွဲထွက်ရေးသမားဟု သတ်မှတ်ထားပြီး ၎င်း၏ ပြောဆိုကမ်းလှမ်းချက်အများ အပြားကို ပယ်ချခဲ့သည်။ ထို့အပြင် တရုတ်အစိုးရသည် သတင်းအတုများ၊ စစ်ရေး နှင့် ကုန်သွယ်ရေးဖိအားတို့ဖြင့် ထိုင်ဝမ်ရွေးကောက်ပွဲကို ဝင်ရောက်စွက်ဖက်ရန်ကြိုးပမ်းနေကြောင်း ထိုင်ဝမ်အစိုးရက အကြိမ်ကြိမ် သတိပေးပြော ဆိုခဲ့သည်။

ထိုင်ဝမ်ပြည်သူများအနေဖြင့် အဆိုပါသတိပေးချက်များကို သတိထားနိုင်မည်ဟု မျှော်လင့်ကြောင်း ဆိုင်အမ်ဝမ် က ပြောကြားခဲ့သည်။