ဂျန်ဇက် (NSS) - ဇန်နဝါရီ ၁

မြန်မာနိုင်ငံ ဖွံ့ဖြိုးတိုးတက်ရေး နှင့် အခြေခံအဆောက်အဦး စီမံကိန်းများ ဖွံ့ဖြိုးတိုးတက်စေရန် ကူညီပေးခြင်းများအတွက် အိန္ဒိယအစိုးရကို ကျေးဇူးတင်ကြောင်း အိန္ဒိယနိုင်ငံဆိုင်ရာ မြန်မာသံအမတ်ကြီး ဦးမိုးကျော်အောင်က ချီးကျူးပြောဆိုလိုက်ကြောင်းသိရသည်။

မြန်မာနိုင်ငံတွင်အာဏာရယူမှုဖြစ်ပွားခဲ့ပြီးနောက်ပိုင်း အမေရိကန်အပါအ ဝင် အနောက်အုပ်စုနိုင်ငံများက အိန္ဒိယကို ဖိအားပေးခဲ့သော်လည်း အိန္ဒိယအစိုးရက နစက နှင့် ပုံမှန်ဆက်ဆံရေးများပြုလုပ်ခဲ့ကာ မြန်မာနိုင်ငံအတွင်းပြုလုပ်ရန် စီစဉ်ထားသည့် စီမံကိန်းများကို ဆက်လက်လုပ်ကိုင်ခဲ့ကြောင်းသိရသည်။

ဖွံ့ဖြိုးတိုးတက်ရေး နှင့် နည်းပညာပိုင်း ပူးပေါင်းဆောင်ရွက်မှုများက အိန္ဒိယနှင့် မြန်မာနိုင်ငံကြား အပြန်အလှန်ဆက်ဆံမှုအားလုံးထဲတွင် အဓိကအရေးပါသော အခန်းကဏ္ဍကပါဝင်ခဲ့ကြောင်း မြန်မာသံအမတ်ကြီးကပြောသည်။အိန္ဒိယနိုင်ငံသည် ယခုနှစ်အတွင်း ကုလားတန် ဘက်စုံဖွံ့ဖြိုးတိုးတက်ရေးစီမံကိန်းကိုပြီးစီးအောင် ဆောင်ရွက်နိုင်ခဲ့သလို အိန္ဒိယ-မြန်မာ- ထိုင်းနိုင်ငံတို့ ချိတ်ဆက်မည့် အရှည် ၁၄၀၀ ကီလိုမီတာရှိ အမြန်လမ်းကို ၇၀ ရာခိုင်နှုန်းပြီးစီးအောင် ကူညီပေးခဲ့ကြောင်း သိရသည်။ ကုလားတန်ဘက်စုံဖွံ့ဖြိုးတိုး တက်ရေး စီမံကိန်းသည် မြန်မာနိုင်ငံတွင် အိန္ဒိယနိုင်ငံက ပြုလုပ်သော စီမံကိန်းများထဲတွင် အဓိကအရေးပါသော စီမံကိန်းဖြစ်ခဲ့ကြောင်းသိရသည်။အဆိုပါစီမံကိန်းတွင် ရခိုင်ပြည်နယ် စစ်တွေမြို့မှ ချင်းပြည်နယ်ပလက်ဝမြို့သို့အရှည် ၁၅၈ ကီလိုမီတာရှိသော ရေလမ်းကြောင်း နှင့် ပလက်ဝမြို့မှ အိန္ဒိယနှင့်မြန်မာနယ်စပ်ဒေသဖြစ်သော Zorinpui  သို့ချိတ်ဆက်မည့် အရှည် ၁၀၉ ကီလိုမီတာရှိသော ကုန်းလမ်းကြောင်း ဖောက်လုပ်ခြင်းများ ပါဝင်ခဲ့ကြောင်းသိရသည်။

အိန္ဒိယနိုင်ငံဆိုင်ရာ မြန်မာသံအမတ်ကြီးသည် အိန္ဒိယနှင့် မြန်မာနိုင်ငံကြား သံတမန်ဆက်ဆံရေးတည်ထောင်သည့် ၇၅ နှစ်ပြည့်အခမ်းအနားတွင် မိန့်ခွန်းပြောဆိုချိန်အတွင်း ထိုကဲ့သို့ ထုတ်ဖော်ပြောဆိုခဲ့ခြင်းဖြစ်သည်။အိန္ဒိယနိုင်ငံရှိ မြန်မာသံရုံးတွင်ကျင်းပသော အဆိုပါအခမ်းအနားကို အိန္ဒိယပြည်ပရေးရာ နှင့် ယဉ်ကျေးမှုဝန်ကြီး Meenakshi Lekhi ၊ ရုရှားသံအမတ်ကြီး၊ ထိုင်းသံအမတ်ကြီး ၊ မွန်ဂိုလီယား နှင့် အခြားနိုင်ငံများ၏သံရုံးကိုယ် စားလှယ်များတက်ရောက်ခဲ့ကြောင်းသိရသည်။