ယွန်း (NSS) - ဒီဇင်ဘာ ၂၃

ကိုဗစ်(၁၉)‌ရောဂါ အပါအဝင် နိုင်ငံရေးအပြောင်းအလဲများကြောင့် ခရီးသွားဝင်ရောက်မှုနည်းပါးလျက်ရှိရာ ခရီးသွားကုမ္ပဏီ(၈၀)ရာခိုင်နှုန်းခန့် ရပ်တန့်နေရပြီး ပြန်လည်လည်ပတ်နိုင်ခြင်းမရှိသေးကြောင်း မြန်မာနိုင်ငံခရီးသွားလုပ်ငန်းအဖွဲ့ချုပ်ထံမှ သိရသည်။

ပြည်တွင်း၌ ကိုဗစ်(၁၉)ရောဂါ စတင်ဖြစ်ပွားခဲ့သည့် ၂၀၁၉ ခုနှစ်မှစ၍ ပြည်ပခရီးသွားဝင်ရောက်မှု အပါအဝင် ပြည်တွင်းခရီးသွားလည်ပတ်မှုများ သိသာစွာ ကျဆင်းခဲ့ပြီး လက်ရှိဖြစ်ပေါ်နေသည့် နိုင်ငံရေးအပြောင်းအလဲများကြောင့်လည်း ခရီးသွားဝင်ရောက်မှုမှာ လျော့နည်းနေဆဲဖြစ်ကြောင်း သိရသည်။

“ပြည်ပကနေဝင်လာတဲ့ နိုင်ငံခြားခရီးသွားတွေကို ပြည်တွင်းမှာလှည့်လည်ပြသပေးတဲ့လုပ်ငန်းတွေကို အဓိကထားပြီးလုပ်တဲ့ ကုမ္ပဏီကြီးတွေရော၊ ကုမ္ပဏီသေးတွေရော အကုန်လုံး(၈၀) ရာခိုင်နှုန်းလောက် ရပ်တန့်နေတုန်းပဲ။ လည်ပတ်နိုင်ခြင်းလုံးဝမရှိသေးပါဘူး။ ကိုဗစ်စဖြစ်ထဲက လုပ်ငန်းတွေ ရပ်တန့်နေရတာပေါ့။ ကိုဗစ်ဖြစ်ပြီးတော့လည်း နိုင်ငံရေး အပြောင်းအလဲတွေဖြစ်လာတဲ့အတွက်ကြောင့် နိုင်ငံတကာ ပိတ်ဆို့မှုတွေလည်းရှိနေသေးတယ်။ ခရီးသွားတွေ မလာသေးတော့ နိုင်ငံတွေရဲ့ ဈေး ကွက်တွေကို အဓိကထား ဆောင်ရွက်နေရတဲ့ ခရီးသွားကုမ္ပဏီတွေအနေနဲ့ လုပ်ငန်းလည်ပတ်နိုင်ခြင်းလည်း မရှိသေးဘူး။ လုံးဝရပ်တန့်ထားရတဲ့ အခြေအနေတွေဖြစ်နေပါတယ်” ဟု မြန်မာ နိုင်ငံခရီးသွားလုပ်ငန်းအဖွဲ့ချုပ် ဥက္ကဋ္ဌ ဦးနောင်းနောင်းဟန်က NP News ကို ပြောသည်။

လက်ရှိတွင် မြန်မာနိုင်ငံ နှင့် အိမ်နီးချင်းနိုင်ငံများဖြစ်သည့် ထိုင်းနိုင်ငံ အပါအဝင် လာအို နှင့် ကမ္ဘောဒီးယားနိုင်ငံတို့၌ ခရီးသွားဝင်ရောက်မှုမြင့်တက်နေသော်လည်း  နိုင်ငံရေးပြဿနာများရှိနေသည့် မြန်မာနိုင်ငံအနေဖြင့် ခရီးသွားဝင်ရောက်မှုနည်းပါးလျက်ရှိကြောင်း ၎င်းက ပြောသည်။

ထိုသို့ ခရီးသွားဝင်ရောက်မှုနည်းပါးခြင်းကြောင့် ခရီးသွားလုပ်ငန်းလုပ်ကိုင်သည့် ကုမ္ပဏီ(၂၀)ရာခိုင်နှုန်းခန့်သာ လုပ်ငန်းလည်ပတ်နေလျက်ရှိကြောင်း သိရသည်။

“(၁၀)ရာခိုင်နှုန်းကနေ (၂၀) ရာခိုင်နှုန်းထိကတော့ ပြည်ပခရီးစဥ်တွေစီစဥ်ပေးတယ်။ ပြည်တွင်းခရီးစဥ်တွေရောင်းတယ်။ ပြီးရင် လေယာဥ်လက်မှတ်ရောင်းတဲ့အပေါ်မှာ ပြန်ပြီးတော့ မှီခိုထားရတာပေါ့။ အဲဒီလိုနဲ့ပဲမှီခိုပြီးတော့ ဆောင်ရွက်နေရတာများပါတယ်။ တချို့ဆိုရင်ဝန်ထမ်းတွေ လျှော့ချရတာတွေ၊ ရပ်နားရတာတွေများပါတယ်။ တချို့ဆိုရင် လက်ရှိခရီးသွားလုပ်ငန်းကို ခတ္တရပ်နားထားပြီးတော့ အာမခံလုပ်ငန်းမျိုးတွေကို ပူးတွဲလုပ်နေရတာတွေရှိပါတယ်”ဟု ဦးနောင်းနောင်းဟန်က ဆက်လက်ပြော သည်။

သို့သော် လက်ရှိခရီးသွားရာသီ၌ ပြည်ပခရီးသွားဝင်ရောက်မှုသည် ယခင်နှစ်(၂၀၂၂)နှင့်နှိုင်းယှဥ်လျှင် အနည်းငယ်ပြန်လည်တိုးတက်လာပြီး မန္တလေး၊ ပုဂံ၊ အင်းလေး၊ ကျိုက်ထီးရိုး အစရှိသောဒေသများကို လည်ပတ်မှုများကြောင်း သိရသည်။

ပြည်တွင်းရှိ စစ်ကိုင်း၊ မကွေး၊ ကချင် နှင့် ကရင်တို့တွင် သွား ရောက်လည်ပတ်စရာနေရာများရှိသော်လည်း နိုင်ငံရေးမတည်ငြိမ်မှုကြောင့် ပြည်ပခရီးသွားအပြင် ပြည်တွင်းခရီးသွားလာရောက်လည်ပတ်မှု နည်းပါးလျက်ရှိကြောင်း သိရသည်။