ကျော် (NSS) - ဒီဇင်ဘာ ၁၈

ကရင်ပြည်နယ်ရှိ မြဝတီ-ကော့ကရိတ်သွား ထော့ကော်ကိုးလမ်းပိုင်းအား ယနေ့(ဒီဇင်ဘာလ ၁၈ ရက်)မှစတင်၍ အတက်အဆင်း ရက်များကို စတင်သတ်မှတ်ခဲ့ကြောင်း ဒေသခံများထံမှသိရသည်။

ကော့ကရိတ်မြို့နယ်အတွင်း၌ တပ်မတော်နှင့် KNU / KNLA / PDF ပူးပေါင်းအဖွဲ့များကြားတွင် ဒီဇင်ဘာလ ၁ ရက်မှစတင်ကာ တိုက်ပွဲများဖြစ်ပွားလျက်ရှိသဖြင့် ထိုင်း-မြန်မာ နှစ်နိုင်ငံနယ်စပ်ကုန်သွယ်ရေးအတွက်အရေးပါသည့် အာရှလမ်းမကြီးအားဖြတ်သန်းသွားလာခွင့်ပိတ်ထားခဲ့သည်။

"အာရှလမ်းကို ဖြတ်သန်းခွင့်ပိတ်ထားတယ်။ ဘယ်သူတွေကပိတ်တာလဲဆိုတာတော့မသိဘူး။ အဲဒီလိုဖြတ်လို့မရတော့ အရင်လမ်းဟောင်းဖြစ်တဲ့ ထော့ကော်ကိုးလမ်းပိုင်းကိုပဲပြန်သုံးနေရတယ်။ လမ်းဟောင်းမှာနေ့တိုင်းကားတွေပြည့်နေတာ"ဟု ဒေသခံတစ်ဦးက NSS ကိုပြောသည်။

ထိုသို့ ထော့ကော်ကိုးလမ်းပိုင်းမှပြန်လည်ဖြတ်သန်းရာတွင် အတက်/အဆင်းပြုလုပ်သောကားများသည် အလွန်များပြားသဖြင့် လမ်းပိတ်ဆို့မှုများဖြစ်ပေါ်လျက်ရှိ၍ တာဝန်ရှိသူများက ယနေ့မှစတင်၍ ယင်းလမ်းပိုင်းမှဖြတ်သန်းသွားလာမည့်ကားများအား အတက်ရက်နှင့်အဆင်းရက်များ သတ်မှတ်ပေးခဲ့ကြကြောင်း သိရသည်။

"နှစ်ဖက်လုံးကနေ ကားတွေလွှတ်လိုက်တဲ့အတွက် လမ်းမှာကားတွေပိတ်ပြီးဆက်ပြီးမောင်းလို့မရဖြစ်သွားတာပေါ့။ ပြီးခဲ့တဲ့ရက်ပိုင်းလေးကတင်ပဲ ကြက်ဥတင်လာတဲ့ကားတစ်စီး ကားလမ်းပေါ်မှာ မှောက်သွားလို့လမ်းတွေထပ်ပိတ်သွားရော"ဟု ဒေသခံတစ်ဦးက ပြောသည်။

အတက်ရက်၊ အဆင်းရက်သတ်မှတ်ရာ၌ ယနေ့တွင် ထော့ကော်ကိုးလမ်းပိုင်းမှတဆင့် မြဝတီမြို့သို့သွားရောက်မည့် ကားများအတက်ရက်ဖြစ်ပြီး မနက်ဖြန်(ဒီဇင်ဘာလ ၁၉ ရက်)သည် မြဝတီမြို့မှပြန်လာမည့် ကားများ၏အဆင်းရက်ဖြစ်ကြောင်း ဒေသခံများထံမှသိရသည်။

"ကျွန်တော်တို့ဘက်မှာ ဟိုးအရင် အာရှလမ်းကြီးမပေါ်ခင်ထဲက မြဝတီတက်ရင် မြဝတီကနေဆင်းလာရင် အတက်ရက်/အဆင်းရက်တွေသတ်မှတ်ထားတယ်။ အတက်/အဆင်းသတ်မှတ်တဲ့ရက်က "စုံရက်"ဆိုရင် အတက်ရက် ၊ "မရက်"ဆိုရင် အဆင်းရက်ဆိုပြီးသတ်မှတ်ထားတာ။ အခုလည်း အဲဒီလိုပြန်ပြီးသတ် မှတ်တယ်။ အတက်/အဆင်းရက်တွေ မသတ်မှတ်ထားရင် လမ်း ခရီးကမကြာသင့်ဘဲအရမ်းကြာနေရော၊ နောက်ပြီး တိုက်ပွဲကလည်းခဏခဏဖြစ်နေတာဆိုတော့ ကိုယ့်အသက်အန္တရာယ်ကစိတ်မချရတာတွေရှိတယ်"ဟု ဒေသခံ ကားသမားတစ်ဦးကပြော သည်။

မြဝတီ-ကော့ကရိတ်သွားအာရှလမ်းမကြီးအား တိုက်ပွဲများစတင်ဖြစ်ပွားသည့်အချိန်မှစ၍ ဖြတ်သန်းသွားလာခွင့်ပိတ်ထားခဲ့သဖြင့် ကုန်စည်ပို့ဆောင်မှုနှင့်ခရီးသည်များ သွားလာမှုအဆင်ပြေစေရန် ထော့ကော်ကိုးလမ်းပိုင်းအား ပြန်လည်အသုံးပြုခဲ့ကြသော်လည်း ကုန်တင်ကားကြီးများအား ဖြတ်သန်းခွင့်မပြုခဲ့ကြောင်း သိရသည်။

"ကုန်ကားကြီးတွေကို ၁၂ ဘီးကားအထိတော့ဖြတ်ခိုင်းတယ်။ အဲဒီထက်ကျော်ရင်မဖြတ်ခိုင်းဘူး။ လမ်းကြေးတွေကလည်း အများကြီးပေးရတယ်လို့ပြောကြတယ်။ နောက်ပြီး ထော့ကော်ကိုးလမ်းပိုင်းက မြေသားလမ်းတွေဖြစ်လိုက် ကွန်ကရစ်လမ်းတွေဖြစ်လိုက်နဲ့ လမ်းအတော်ဆိုးတယ်။ ချိုင့်ခွက်တွေအများကြီးပဲ"ဟု ဒေသခံတစ်ဦးကပြောသည်။

လက်ရှိအချိန်၌ မဖြစ်မနေသွားလာရသော ကုန်တင်ကားကြီးများ၊ ခရီးသည်တင်ကားများ၊ အိမ်စီးကားများသည် ထော့ကော်ကိုးလမ်းပိုင်းအား အသုံးပြုသွားလာရာတွင် အတက်/အဆင်းရက် သတ်မှတ်ခဲ့သဖြင့် လမ်းကြောပိတ်ဆို့မှုလျော့နည်းသွားနိုင်ကြောင်း ၎င်းက သုံးသပ်ပြောဆိုထားသည်။

အဆိုပါ ထော့ကော်ကိုးလမ်းပိုင်းသည် ပြီးခဲ့သည့်လများအတွင်းက အာရှလမ်းမကြီးရေတိုက်စားမှုဖြစ်စဥ်ကြောင့် လမ်းပိုင်းအချို့ပြိုကျခဲ့ချိန်ကလည်း အသုံးပြုခဲ့ရသော လမ်းပိုင်းတစ်ခုဖြစ် ကြောင်း သိရသည်။

KNU / KNLA / PDF ပူးပေါင်းအဖွဲ့ဝင်များသည် ပြီးခဲ့သည့်ရက် ပိုင်းအတွင်းက မြဝတီ-ကော့ကရိတ်သွား အာရှလမ်းမကြီးပေါ်ရှိ ကော့နွဲ့တံတားနှင့်တောနော်တံတားတို့အား မိုင်းခွဲဖျက်ဆီးခဲ့ကြသဖြင့် တံတားများကျိုးကျပျက်စီးခဲ့ကြောင်း သိရသည်။