Pika (NSS) - ဒီဇင်ဘာ ၁၃ 

အာဖရိကတိုက်တွင် ပဋိပက္ခများဖြစ်ပွားမှုများ မြင့်တက်နေခြင်း၊ ရာသီဥတုဖောက်ပြန်ပြောင်းလဲနေခြင်း နှင့် စားသောက်ကုန်ဈေးနှုန်းများမြင့်မားနေခြင်းတို့ကြောင့် လာမည့်နှစ်တွင် အာဖရိကတိုက်အလယ်ပိုင်း နှင့် အနောက်ပိုင်းဒေသရှိ လူပေါင်း(၄၉ ဒသမ ၅) သန်းခန့်သည် ငတ်မွတ်ခေါင်းပါးမှုများနှင့် ကြုံတွေ့ရမည်ဟု ခန့်မှန်းထားကြောင်း ကုလသမဂ္ဂက ဒီဇင်ဘာလ(၁၂)ရက်တွင် ထုတ်ပြန်ပြောခဲ့သည်။

အဆိုပါ လူဦးရေအရေအတွက်သည် ၂ဝ၂၃ ခုနှစ်က ခန့်မှန်းခဲ့သော အရေအတွက်ထက် (၄)ရာခိုင်နှုန်း ပိုများလာကြောင်း သိရသည်။ ထို့အပြင် အာဖရိကတိုက်ရှိ ကမ်းရိုးတန်းနိုင်ငံများတွင် ပြင်းထန်သော ငတ်မွတ် ခေါင်းပါးမှုများ နှင့် ရင်ဆိုင်နေရသော လူဦးရေအရေအတွက်သည် ၂ဝ၂၄ ခုနှစ်တွင် (၆ ဒသမ ၂) သန်းထိ ရောက်ရှိလာမည်ဟု ခန့်မှန်းထားကြကြောင်းလည်း သိရသည်။ 

အဆိုပါအရေအတွက်သည် ယခုနှစ်အစောပိုင်းတွင် ခန့်မှန်းထားသော လူဦးရေအရေအတွက်ထက် (၁၆)ရာခိုင်နှုန်း ပိုများလာကြောင်း ကုလသမဂ္ဂကမ္ဘာ့စားနပ်ရိက္ခာအစီအစဉ် (WFP) နှင့် အခြားသော လူသားချင်းစာနာ ထောက်ထားမှုဆိုင်ရာအေဂျင်စီများမှ ထုတ်ပြန်သော ဒေသတွင်းစားနပ်ရိက္ခာ ဖူလုံမှုဆန်းစစ်ချက်အသစ်အရ သိရသည်။ 

WFP ၏ အာဖရိကအနောက်ပိုင်းဒေသဆိုင်ရာ ယာယီညွှန်ကြားရေးမှူးမာဂေါ့တ်ဗန်ဒါဗဲလ်ဒန် က "ဒေသတွင်းမှာ ပြင်းထန်တဲ့ ငတ်မွတ်ခေါင်းပါးမှုဟာ စံချိန်တင်အဆင့်မှာရှိနေပေမယ့်လည်း တုံ့ပြန်မှုအတွက် လိုအပ်တဲ့ ရန်ပုံငွေ တွေဟာ လုံလောက်ခြင်းမျိုး မရှိသေးပါဘူး။ ရန်ပုံငွေမလောက်ခြင်းဆိုတာက ဆာလောင်မွတ်သိပ်နေသူတွေဟာ အာဟာရရှိတဲ့အစားအစာတွေထက် အာဟာရနည်းပါးတဲ့အစားအစာတွေကိုပဲ စားသုံးဖို့ တွန်းအားပေးခံရပါလိမ့် မယ်။ ဒါကြောင့် ဆာလောင်မွတ်သိပ်နေသူတွေဟာ ဒီအကျပ်အတည်းထဲမှာပဲ ပိတ်မိနေပြီး ငတ်မွတ်ခေါင်းပါးမှုနဲ့ အာဟာရချို့တဲ့မှု သံသရာက ဆက်လက်တည်ရှိနေပါလိမ့်မယ်" ဟု ပြောခဲ့သည်။

အာဖရိကတိုက်အလယ်ပိုင်းနှင့် အနောက်ပိုင်းရှိ အိမ်ထောင်စုများ၏ သုံးပုံပုံ နှစ်ပုံကျော်သည် ကျန်းမာရေး နှင့် ညီညွတ်သော အစားအသောက်များကို စားသောက်နိုင်ခြင်းမျိုး မရှိကြကြောင်း လေ့လာဆန်းစစ်ချက်များအရ သိရသည်။ 

Sahel ဒေသ အလယ်ပိုင်းရှိ နိုင်ငံများဖြစ်သော ဘာကီနာဖာဆို၊ မာလီ နှင့် နိုင်ဂျာနိုင်ငံတို့တွင် အာဟာရပြည့်ဝသော အစားအစာများအတွက် နေ့စဉ်ကုန်ကျစရိတ်သည် ဒေသတွင်းရှိ နေ့စဉ်အနိမ့်ဆုံးလုပ်အားခထက်(၁၁ဝ) ရာခိုင်နှုန်း ပိုများကြောင်း ၎င်းက ပြောကြားခဲ့သည်။ 

အစ္စလာမ်မစ်လက်နက်ကိုင်အဖွဲ့အစည်းများကြောင့် Sahel ဒေသရှိ နိုင်ငံများရှိ လူပေါင်း(၄)သန်းကျော်သည် ၎င်းတို့၏ နေအိမ်များနှင့် လယ်ယာမြေများကို စွန့်ခွာထွက်ပြေးခဲ့ရကြောင်း ကုလသမဂ္ဂ၏ အဆိုအရ သိရသည်။ ကွန်ဂိုဒီမိုကရက်တစ်သမ္မတနိုင်ငံတွင်လည်း ပဋိပက္ခများစွာဖြစ်ပွားနေပြီး လူပေါင်း(၇)သန်းနီးပါး နေရပ်စွန့်ခွာ ထွက်ပြေးခဲ့ရကြောင်း သိရသည်။

Sahel ဒေသတွင် ဖြစ်ပွားနေသော အကျပ်အတည်းများသည် လူအများကို ကမ်းရိုးတန်းဒေသနိုင်ငံများဖြစ်သော အိုင်ဗရီကို့စ်၊ တိုဂို နှင့် ဂါနာတို့ကဲ့သို့သော နိုင်ငံများတွင် ခိုလှုံရန်တွန်းအားပေးခဲ့ကြောင်း သိရသည်။