ရောင်နီ (NP News) - မတ် ၁၁

ကွန်ဂိုဒီမိုကရက်တစ်သမ္မတနိုင်ငံ အရှေ့ပိုင်း (DRC) မှာ အစိုးရတပ်ဖွဲ့များနဲ့ လက်နက်ကိုင်အဖွဲ့များကြား တိုက်ပွဲများ ပိုမိုပြင်းထန်လာခြင်းကြောင့် လူပေါင်း သိန်းနဲ့ချီ ထွက်ပြေးတိမ်းရှောင်နေရကြောင်း ကုလသမဂ္ဂ ဒုက္ခသည်များဆိုင်ရာ အေဂျင်စီ (UNHCR) က သတိပေးထားပါတယ်။ 

UNHCR ပြောရေးဆိုခွင့်ရှိသူ မတ်သောဆော့မာရက်ခ်ျက ဖေဖော်ဝါရီလမှာ DRC၊ အနောက်ကီဗူးပြည်နယ်ရှိ ရက်ရှရူနဲ့ မက်စီစီ နယ်မြေများမှာ တိုက်ပွဲများ ဖြစ်ပွားခဲ့ခြင်းကြောင့် နေထိုင်သူ လူဦးရေ (၃)သိန်းနီးပါး ထွက်ပြေးခဲ့ ရကြောင်း သောကြာနေ့မှာ ပြောကြားခဲ့ပါတယ်။ 

“အကြမ်းဖက်မှုမှ ထွက်ပြေးလာတဲ့  အမျိုးသမီးများနဲ့ ကလေးသူငယ်များမှာ သွေးထွက်သံယို ဖြစ်ခဲ့ရပြီး ယခုစစ်ဘေးရှောင် နေရာများမှာ မောပန်းနွမ်းနယ်နေကြပြီ ဖြစ်တယ်လို့" လို့ ၎င်းက ပြောကြားပါတယ်။ 

UNHCR နဲ့ ၎င်းရဲ့ လုပ်ဖော်ကိုင်ဖက်များဟာ လူသားချင်း စာနာထောက်ထားမှု အကူအညီများ တိုးမြှင့်လုပ် ဆောင်နေသော်လည်း အကြမ်းဖက်မှုကြောင့် မြောက်ကီဗူးရှိ အချို့နေရာများမှ ရွှေ့ပြောင်းနေထိုင်သူများမှာ အခက်အခဲများရှိနေသေးကြောင်း ပြောကြားပါတယ်။ 

လက်နက်ကိုင်အဖွဲ့ အများအပြားဟာ သတ္တုကြွယ်ဝသော အရှေ့ပိုင်း DRC မှာ ကျင်လည်ကျက်စားကြပြီး အဆိုပါ အဖွဲ့အများစုဟာ ၂ဝ ရာစုနှောင်းပိုင်းက ဖြစ်ပွားခဲ့တဲ့ ဒေသတွင်းစစ်ပွဲနှစ်ခုရဲ့ အကြွင်းအကျန်များပဲ ဖြစ်ပါတယ်။ ၂ဝ၂၁  ခုနှစ်မှာ အစိုးရက မြောက်ပိုင်း ကီဗူးနဲ့ အိမ်နီးချင်း အစ်တူရီမှာ လုံခြုံရေးအကျပ်အတည်း ဖြေရှင်းရန် ကြိုးပမ်းမှုအဖြစ် ၎င်းတို့ကို စစ်အုပ်ချုပ်ရေးအောက်မှာ ထားခဲ့ရာမှ အကြမ်းဖက်မှုများ ဆက်လက်ဖြစ်ပွားလာခဲ့ခြင်း ဖြစ်ပါတယ်။

ကြာသပတေးနေ့က မြောက်ကီဗူး ပြည်နယ်၊ ဘီနီမြို့တောင်ဘက် ၃ဝ ကီလိုမီတာ (၁၉ မိုင်) အကွာ မူကွန်ဒီ ရွာမှာ ညတွင်းချင်း တိုက်ခိုက်မှုတစ်ခု ဖြစ်ပွားခဲ့ပြီး အနည်းဆုံးလူ (၃၆) ဦး သေဆုံးခဲ့ပါတယ်။ သောကြာနေ့က လည်း မြောက်ကီဗူ၊ မြို့တော်ဂိုမာအနီးမှာ M23 လက်နက်ကိုင်အဖွဲ့နဲ့ အစိုးရတပ်ဖွဲ့များကြား တိုက်ပွဲများ ထပ်မံဖြစ်ပွားခဲ့ကြောင်း သိရပါတယ်။ တိုက်ပွဲများကြောင့် အကူညီပေးရေး အဖွဲ့များဟာ ကုန်းလမ်းများမှ မသွားနိုင်တော့ဘဲ လေကြောင်းတစ်ခုတည်းကိုသာ အားထားလာရတယ်လို့ သိရပါတယ်။