စော (NSS) - နိုဝင်ဘာ ၃၀

အဝါရောင် ဘေးလိုင်း Sticker ကပ်ထားသည့် City Taxi အစီးရေသည် (၄၅၀၀၀)ကျော် ရှိလာပြီဖြစ်ကြောင်း YRTC မှ တွဲဖက်အတွင်းရေးမှူးဦးလျန်ကျင့်မန်က NSS ကို ပြောသည်။

အဆိုပါ အဝါရောင်ဘေးလိုင်း sticker များကို လာမည့် ဇန်နဝါရီလကုန်အထိ မကပ်ပါက ဒဏ်ကြေးအဖြစ် ငွေကျပ် (၃၀၀၀၀)ထက်မပိုသော ‌ငွေဒဏ်ပေးဆောင်ရမည်ဖြစ်ကြောင်း သိရသည်။

လက်ရှိတွင် ဘေး sticker ကပ်ပြီးသည့် City Taxi အစီးရေ (၄၅၀၀၀)ကျော်ရှိပြီဖြစ်ကြောင်း YRTC မှ တွဲဖက်အတွင်းရေးမှူးဦးလျန်ကျင့်မန်က ပြောသည်။

“အပြင်မှာကပ်ပြီးသားကတော့ ခန့်မှန်း ၄၅၀၀၀ လောက်ရှိပြီပေါ့နော်။ ရုံးမှာလာကပ်တာကတော့ ၆၉၇ စီးရှိတယ်”ဟု ၎င်းကပြောသည်။

အဝါရောင်ဘေးလိုင်း sticker များ ကပ်ရာတွင် YRTC ရုံးချုပ်သို့ လာကပ်သည့်  City Taxi များရှိကာ ပြင်ပတွင် အခကြေးငွေပေးချေ၍ အဝါရောင်းဘေးလိုင်း sticker များကပ်သည့် City Taxi များလည်းရှိကြောင်း သိရသည်။

City Taxi ယာဉ်ပိုင်ရှင်များအား နိုဝင်ဘာလ (၁)ရက်မှ ၂၀၂၄ ခုနှစ်၊ ဇန်နဝါရီလကုန်အထိ (၃)လအတွင်း အဝါရောင်ဘေးလိုင်း sticker များလာကပ်ပါက YRTC မှ ဝန်ဆောင်ခမယူဘဲ အခမဲ့ကပ်ပေးလျက်ရှိကြောင်း သိရသည်။

လက်ရှိအချိန်အထိ YRTC ၌ မှတ်ပုံတင်ထားသည့် City Taxi ယာဉ်ပေါင်း (၅၅၁၆၂)စီးရှိကြောင်း သိရသည်။