မြူနစ် (NSS) - နိုဝင်ဘာ ၂၈

မြန်မာနိုင်ငံ၏ လက်ရှိပဋိပက္ခ၌ အနောက်နိုင်ငံများ နှင့် အပေါင်းအပါများသည် ထဲထဲဝင်ဝင် ဝင်ရောက်ပတ်သက်နေပြီးဖြစ်ကြောင်း နစကပြောခွင့်ရဗိုလ်ချုပ်ဇော်မင်းထွန်းက ပြောသည်။

လက်ရှိတွင် အမေရိကန်အစိုးရက ကျောထောက်နောက်ခံပြုထားသည့် USIP(United State Institute of Peace) အဖွဲ့အစည်း၏ သုတေသနစာတမ်းများကို အမှီပြုကာ အနောက်နိုင်ငံမီဒီယာများမှ ဝါဒဖြန့်လျက်ရှိကြောင်း နစကမှ ဆိုသည်။

“အဓိကအချက်ကတော့ ဒီထဲမှာ ယခုလက်ရှိ မြန်မာနိုင်ငံဖြစ်ပေါ်နေတဲ့ အခြေအနေကြောင့်မလို့ ဒီအခြေအနေများကို ပိုပြီးဆိုးရွားသွားအောင် သုံးသပ်တင်ပြ၊ ဦးတည်တင်ပြတာတွေပဲ လုပ်ဆောင်တာမျိုးဖြစ်ပါတယ်။ အရေးကြီးတဲ့သုံးသပ်ချက်ကတော့ လက်နက်စွဲကိုင်ပြီး ပဋိပက္ခဖြစ်အောင်လုပ်ဆောင်နေတဲ့ အဖွဲ့အစည်းတွေ၊ လူပုဂ္ဂိုလ်တွေ၊ ဒီအဖွဲ့အစည်းတွေ၊ လူပုဂ္ဂိုလ်တွေဟာ စစ်ဘုရင်ဝါဒလိုဟာမျိုး ဖြစ်မှာမဟုတ်ဘူး။ ဓားပြဆန်ဆန်အဖွဲ့အစည်းမျိုးတွေ ဖြစ်မလာနိုင်ဘူး။ တစ်စုတစ်စည်းတည်းရှိတယ်ဆိုတဲ့ဟာမျိုးနဲ့ ပဋိပက္ခကြီးထွားလာအောင် မီးထိုးပေးတဲ့သဘောပဲဖြစ်ပါတယ်”ဟု ဗိုလ်ချုပ်ဇော်မင်းထွန်းက ပြောသည်။

ထိုသို့ မီးမောင်းထိုးပေးနေခြင်းသည် မြန်မာနိုင်ငံအရေးကို ပေါ်ပေါ်ထင်ထင် ဝင်ရောက်စွက်ဖက် နှောင့်ယှက်လာခြင်းသာဖြစ်ကြောင်း နစကမှ ပြန်လည်တုံ့ပြန်ထားသည်။

“ဒါကဘာလဲဆိုတော့ မြန်မာနိုင်ငံအရေးကို ပေါ်ပေါ်ထင်ထင်ဝင်ရောက်စွက်ဖက် နှောင့်ယှက်လာတာဖြစ်ပါတယ်။ လုပ် လည်းလုပ်နေတာဖြစ်ပါတယ်။ ထပ်ပြီးတော့မှ လုပ်လာနိုင်တဲ့ အရိပ်အယောင်မျိုးကိုပြသခြင်းဖြစ်ပါတယ်။ ဒီအနောက်နိုင်ငံ များနဲ့ ဆက်စပ်အဖွဲ့များအနေနဲ့ မြန်မာနိုင်ငံအရေးနဲ့ပတ်သက်လာပြီး ပိုပြီးတော့ ဝင်ရောက်စွက်ဖက်နှောင့်ယှက်မယ့် အရိပ်အယောင်နဲ့ ပြသခြင်းဖြစ်ပါတယ်” ဟု နစကပြောခွင့်ရ ဆိုသည်။

လက်ရှိမြေပြင်အခြေအနေတွင် လက်နက်ကိုင်အဖွဲ့အစည်းများ အတွင်း၌ သွေးကွဲမှု၊ တစ်ဖွဲ့နှင့်တစ်ဖွဲ့ တိုက်ခိုက်မှုများ ရှိနေ သည့်အပြင် NUG၊ CRPH အဖွဲ့များကို တစ်ချို့လက်နက်ကိုင်အဖွဲ့များက လက်မခံသည့်ကြေညာချက်များကို တွေ့ရှိရသည်ဟု နစကဘက်က ဆိုသည်။

ဆက်လက်ပြီး ဗိုလ်ချုပ်ဇော်မင်းထွန်းက “စစ်ကိုင်းဘက်မှာဆိုရင် ဒီPDF အမည်ခံအကြမ်းဖက်အဖွဲ့တစ်ဖွဲ့ရဲ့ အမျိုးသမီး တစ်ယောက်ကို လပေါင်းများစွာ ဖမ်းဆီးချုပ်နှောင်ပြီး အကြိမ်ကြိမ် မုဒိမ်းကျင့်ခဲ့တဲ့လုပ်ရပ် ဟိုးလေးတကြော်ကြော်ဖြစ်လာ မှ အရေးယူမယ်ဆိုတဲ့ ပုံစံမျိုးပြောပြီးကာမှ ဘာမှအရေးမယူတဲ့အပြင် အဲဒီအဖွဲ့တွေကပါ လွတ်မြောက်သွားတဲ့ကိစ္စတွေ၊ တရားမဲ့ဖမ်းဆီးခေါ်ဆောင် သတ်ဖြတ်နေတဲ့ဟာတွေ၊ အမြင်မတူတဲ့ကျေးရွာတွေကို မီးရှို့ဖျက်ဆီးနေတဲ့ဟာတွေ၊ ဒါတွေ ဟာ လက်တွေ့တွေ့ရမှာဖြစ်ပါတယ်” ဟု ပြောသည်။

ထို့ပြင် လက်ရှိတိုက်ပွဲများ ဖော်ဆောင်နေသည့် MNDAA အဖွဲ့၏ စီးပွားရေးလုပ်ငန်းသည် ဘိန်းမှောင်ခိုကူးခြင်းဖြစ်ပြီး ၎င်းရရှိလာသော ငွေကြေးများဖြင့် လက်နက်များဝယ်ယူစုဆောင်းကာ လက်နက်ကိုင်အဖွဲ့အစည်းအဖြစ် ထူထောင်သောအဖွဲ့ဖြစ်ကြောင်း နစကမှ ပြောသည်။

“ဒီလိုသမိုင်းကြောင်းတွေ၊ ဒီလိုထင်ရှားရှိတဲ့ဟာတွေကို မျက်ကွယ်ပြုပြီး အခုလိုသုံးသပ်ပြီး မီးထိုးပေးနေခြင်းသည် ဒီပဋိပက္ခမှာ အနောက်နိုင်ငံတွေ နဲ့ အပေါင်းအပါများ ထဲထဲဝင်ဝင် ဝင်ရောက်ပတ်သက်နေပြီဆိုတာကိုသိနိုင်ကြောင်း အသိပေးပြောကြားလိုပါတယ်။ ဒါတွေကို ကျွန်တော်တို့ပြည်သူလူထုအားလုံး၊ အိမ်နီးချင်းနိုင်ငံများနဲ့အားလုံးက ဂရုစိုက်သတိပြုရမှာဖြစ်ကြောင်း ပြောကြားလိုပါတယ်”ဟု ၎င်းက ထပ်မံပြောသည်။

အမေရိကန်နိုင်ငံအပါအဝင် ၎င်းနှင့်အပေါင်းအပါများသည် လက်နက်ကိုင်အဖွဲ့အစည်းများကို ငွေကြေးထောက်ပံ့ပေးကာ မြန်မာနိုင်ငံအား ရန်သူသဖွယ်သဘောထားနေကြောင်း ဗိုလ်ချုပ်မှူးကြီးမင်းအောင် လှိုင်က ပြီးခဲ့သောလပိုင်းအတွင်း၌ ပြောကြားခဲ့ဖူးသည်။

နိုင်ငံအတွင်းရှိ ရှမ်း၊ ကချင်၊ ကရင်၊ ရခိုင်၊ ချင်း၊ ကယား နှင့် စစ်ကိုင်းတို့၌ တပ်မတော်နှင့် လက်နက်ကိုင်အဖွဲ့အစည်းများကြား တိုက်ပွဲများဖြစ်ပွားလျက်ရှိသည်။