Pearl (NSS) - နိုဝင်ဘာ ၂၈

မြန်မာ-တရုတ် ရေကြောင်းလုံခြုံရေးပူးတွဲလေ့ကျင့်ရန် တရုတ်နိုင်ငံ၏ ဖရီးဂိတ်စစ်ရေယာဉ်အပါအဝင် စစ်သင်္ဘော (၃)စင်း ရန်ကုန်မြို့သို့ရောက်ရှိလာကြောင်း နစက က သတင်းထုတ်ပြန်ထားသည်။ 

ယမန်နေ့ (နိုဝင်ဘာလ ၂၇ ရက်)တွင် ရန်ကုန်မြို့ သီလဝါဆိပ်ကမ်းသို့ တရုတ်ပြည်သူ့လွတ်မြောက်ရေးတပ်မတော်(ရေ)၊ 44th PLA Navy Escort Task Group(ETG) မှ စစ်ရေယာဉ်များဖြစ်သည့် ဖျက်သင်္ဘော Zi Bo၊ ဖရီဂိတ်စစ်ရေယာဉ် Jing Zhou နှင့် ထောက်ပံ့ရေးစစ်ရေယာဉ် Qian Dao Hu တို့  ရောက်ရှိလာခဲ့ကြောင်း သိရသည်။

"တရုတ်ပြည်သူ့သမ္မတနိုင်ငံက မြန်မာနိုင်ငံကို ချစ်ကြည်ရေးခရီး အလည်အပတ်ရောက်ရှိနေတဲ့ စစ်သင်္ဘောသုံးစင်းဟာ ဒီနေ့ နေ့လည်ပိုင်းမှာ ရန်ကုန်ကိုရောက်ရှိခဲ့ပါတယ်။ မြန်မာနိုင်ငံအတွင်းမှာချစ်ကြည်ရေးခရီးလည်ပတ်မှု၊ လေ့လာမှု နှစ်နိုင်ငံချစ်ကြည်ရေး အားကစားပြိုင်ပွဲများပြုလုပ်မှုများကို ပြုလုပ်သွားမှာဖြစ်ကြောင်း အသိပေးလိုပါတယ်"ဟု ဗိုလ်ချုပ်ဇော်မင်းထွန်းက အသိပေးပြောကြားထားသည်။ 

အဆိုပါ စစ်ရေယာဉ်များသည် မြန်မာ-တရုတ် ရေကြောင်းလုံခြုံရေးဆိုင်ရာလေ့ကျင့်ခန်းဆောင်ရွက်ရန် နှင့် ချစ်ကြည်ရေးခရီးလည်ပတ်ရန်အတွက် ရောက်ရှိလာခဲ့ခြင်းဖြစ်ကြောင်း သိရသည်။

စစ်ရေယာဉ်များတွင် အရာရှိ၊ စစ်သည် စုစုပေါင်း ၇၀၀ ခန့်လိုက်ပါလာခဲ့ပြီး ရန်ကုန်မြို့ရှိ အထင်ကရနေရာများသို့ လေ့လာလည်ပတ်ခြင်း နှင့် နှစ်နိုင်ငံချစ်ကြည်ရေးအားကစားပြိုင်ပွဲများ ပြုလုပ်သွားမည်ဖြစ်ကြောင်း သိရသည်။ 

ပြီးခဲ့သည့် နိုဝင်ဘာလ (၂၅)ရက်တွင်လည်း တရုတ်နိုင်ငံ၊ တောင်ပိုင်းစစ်ဒေသကြီး၏ ပုံမှန်စစ်ရေးလေ့ကျင့်မှုကို မြန်မာ-တရုတ်နယ်စပ်ဒေသတွင် နှစ်နိုင်ငံနယ်စပ်ဒေသ တည်ငြိမ်အေးချမ်းရေး နှင့် နယ်မြေဒေသလုံခြုံအေးချမ်းရေးအတွက် စစ်ရေးလေ့ကျင့်မှုများ စတင်ပြုလုပ်ခဲ့သည်။

အလားတူ ရုရှားစစ်သင်္ဘော(၃)စင်းသည်လည်း ပထမဆုံးအကြိမ်အဖြစ် မြန်မာ-ရုရှားရေကြောင်းလုံခြုံရေးဆိုင်ရာလေ့ကျင့်ခန်းဆောင်ရွက်ရန်အတွက်  မြန်မာနိုင်ငံသို့ လာရောက်ခဲ့ပြီး အက်ဒမန်ပင်လယ်အတွင်း၌ နိုဝင်ဘာလ ၇ ရက်မှ ၉ ရက်အထိ  ပူးတွဲစစ်ရေးလေ့ကျင့်ခန်းများ ပြုလုပ်ခဲ့သည်။

လက်ရှိတွင် မြန်မာတပ်မတော်သည် အရှေ့တောင်အာရှရှိ တပ်မတော်များထဲ၌ ဖရီးဂိတ်စစ်ရေယာဉ်များကို ကိုယ်ပိုင်သင်္ဘောကျင်းဖြင့် ထုတ်လုပ်နိုင်နေပြီဖြစ်ကာ ဖရီးဂိတ်စစ်ရေယာဉ် သုံးစင်းကို ပိုင်ဆိုင်ထားကြောင်း သိရသည်။