ပြင်ဦးလွင်မြို့နယ်တွင် ဘရိတ်ပေါက်သွားသည့် Light Truck ကားက ရပ်ထားသော အိမ်စီးကားကိုဝင်တိုက်ပြီးနောက် ချောက်ထဲသို့ ပြုတ်ကျမှုကြောင့် (၃)ဦးသေဆုံး
သန့်ဇင် (NSS) - နိုဝင်ဘာ ၂၄
မန္တလေးတိုင်း၊ ပြင်ဦးလွင်မြို့နယ်၊ ပြင်ဦးလွင်-မန္တလေးသွားကားလမ်းတွင် Light Truck ကား ဘရိတ်ပေါက်၍ ရပ်ထားသည့် အိမ်စီးကားကို ဝင်တိုက်မိပြီး ချောက်ထဲသို့ ထိုးကျခဲ့မှုကြောင့် အမျိုးသား(၃)ဦး သေဆုံးသွားခဲ့ကြောင်း စေတနာမွန်လူမှုကူညီရေးအသင်း (အုန်းချော)ထံမှ သိရသည်။
ယာဉ်တိမ်းမှောက်မှုသည် ယနေ့(နိုဝင်ဘာလ ၂၄ ရက်)၊ နံနက် ၈နာရီခန့်တွင် ပြင်ဦးလွင်မြို့နယ်၊ ပြင်ဦးလွင်-မန္တလေးသွားကားလမ်း၏ မိုင်တိုင်အမှတ်(၁၈/၆)အနီးတွင် ဖြစ်ပွားခဲ့ခြင်းဖြစ်ကြောင်း သိရသည်။
“ဖြစ်တာက ပြင်ဦးလွင်ကနေ မန္တလေးဘက်ကိုဆင်းလာတဲ့ Light Truck ကားက ဘရိတ်ပေါက်ပြီး သူ့ရှေ့ကအိမ်စီးကားကို အရင်ဝင်တိုက်မိတာ။ ပြီးတော့ လမ်းဘေးက ဘယ်ရီယာတန်းကိုတိုက်ပြီး ဝါးရုံပင်ပေါ်မှာတင်နေတယ်။ Light Truck ကားပြုတ်ကျသွားတဲ့နေရာရဲ့ ချောက်အနက်က ပေ(၅၀)လောက်ရှိတယ်။ အဲဒီချောက်က အောက်ထိဆိုရင် ပေ(၁၀၀)လောက်ရှိတယ်”ဟု စေတနာမွန်လူမှုကူညီရေး အသင်း(အုန်းချော)မှ တာဝန်ရှိသူတစ်ဦးက NSS ကို ပြောသည်။
အဆိုပါယာဉ်တိမ်းမှောက်မှုကြောင့် Light Truck ကားပေါ်လိုက်ပါလာသည့် အမျိုးသား(၇)ဦးနှင့် အမျိုး သမီးတစ်ဦးတို့အနက် အသက်(၃၀) နှစ်ခန့်စီရှိ အမျိုးသား(၃)ဦးသည် အခင်းဖြစ်နေရာ၌ သေဆုံးသွားခဲ့ပြီး ကျန်အမျိုးသား(၄)ဦးနှင့် အမျိုးသမီး(၁)ဦးတို့တွင်လည်း ထိခိုက်ဒဏ်ရာများရရှိခဲ့ကြောင်း သိရသည်။
“အမျိုးသား (၃)ယောက်က ပွဲချင်းပြီးသေဆုံးတယ်။ Dead Body တွေကို ခက်ခက်ခဲခဲရှာလိုက်ရတယ်။ Light Truck ပေါ်က ထိခိုက်ဒဏ်ရာရတာက အမျိုးသား(၄)ယောက်နဲ့ အမျိုးသမီးတစ်ယောက်ပါ။ အတိုက်ခံရတဲ့ အိမ်စီးကားပေါ်က အမျိုးသမီး(၂)ယောက်လဲ နဖူးကွဲတာတွေရှိတယ်။ အဲဒီနေရာမှာက ယာဉ်မတော်တဆမှုတွေ ခဏခဏဖြစ်တာဆိုတော့ ကားသမားတွေ သတိထားသင့်တယ်” ဟု ၎င်းကဆက်လက်ပြောသည်။
ထို့နောက် သေဆုံးသူ နှင့် ထိခိုက်ဒဏ်ရာရရှိသူများအား စေတနာမွန်လူမှုကူညီရေးအသင်း(အုန်းချော)နှင့် မန္တလေးတိုင်းလူမှုကူညီရေးအသင်းတို့မှ ပြင်ဦးလွင်မြို့နယ်ပြည်သူ့ဆေးရုံ၊ မန္တလေးမြို့ပြည်သူ့ဆေးရုံကြီးတို့သို့ ပို့ဆောင်ပေးခဲ့ကြကြောင်း သိရသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ဘာလင်မြို့နဲ့ နိုင်ငံတစ်ဝှမ်းရှိ ဟားမတ်စ်ထောက်ခံသူတွေရဲ့နေအိမ်များကို ရာနဲ့ချီသော ဂျာမန်ရဲတပ်ဖွဲ့ဝင်တို့ ဝင်ရောက်စီးနင်း
RELATED POSTS
29 Sep 2024 | မှုခင်း,နိုင်ငံတကာ