Htay Oung (NSS) - နိုဝင်ဘာ ၂၃

ဒီဘက်နှစ်များ ကျွန်တော်တို့ဆီမှာ ခေတ်အစားဆုံးဝေါဟာရက အလုံးစုံပျက်သုဉ်းရေး Uttermost Devastation ဖြစ်လိမ့်မယ်။ အဲဒီမှာ ၂ မျိုးရှိတယ်လို့ ကျွန်တော် ဉာဏ်မီပါတယ်။

(၁) လိုချင်တဲ့တောင်းဆိုတာရရှိဖို့ တိုင်းပြည်တစ်ခုလုံး အလုံးစုံပျက်သုဉ်းရေးပါ။

၁၉၉၅ ခုနှစ် အမေရိကန်သမ္မတ ဘီလ်ကလင်တန်ရဲ့ အထူးသံတမန် မယ်ဒဲလ်လင်း အောလ်ဘရိုက် မြန်မာနိုင်ငံကို လာရောက်လည်ပတ်အပြီး ကျွန်တော်တို့ဆီမှာ ကျယ်လောင်လာခဲ့တဲ့ နိုင်ငံရေးလှုပ်ရှားမှုဖြစ်ကြောင်း သတိထားမိကြမှာပါ။

အဲဒီအချိန် မြေပေါ် ဒီမိုကရေစီအရေးထင်ရှားပေါ်လွင်သူပုဂ္ဂိုလ်သာမက မြေအောက်ရောက်သွားတဲ့ ကျောင်းသား လက်နက်ကိုင်တော်လှန်ရေးခေါင်းဆောင်တို့လည်း အလုံးစုံပျက်သုဉ်းရေးမှာ တစ်သံတည်း တူညီနေကြတယ်။

လူ့အဖွဲ့အစည်းကြီးအတွင်း အတွေးအမြင် နဲ့ လုပ်ကိုင်ဆောင်ရွက်ပုံတွေ ပြောင်းလဲစေခြင်းဖြင့် ထိပ်တိုက်တွေကြပြီး တိုင်းပြည်တစ်ခုလုံး အလုံးစုံ ပျက်သုဉ်းရေးပါ။ နောက်မှ ပြန်လည်ထူထောင်တည်ဆောက်ယူမယ်ပေါ့။ 

ဒါပေမယ့် တိုင်းပြည်ကို ဖျက်ဆီးပြီး ပြန်လည်ထူထောင်ရေးဟာ PUBG Game ကစားသလို မလွယ်ကူပါ။ ရုပ်ဝတ္တုပိုင်းကို ပြန်လည်တည်ဆောက်ရေးဟာ ဂိမ်းပွဲထဲကလို မဟုတ်ပါ။ ရှုံးသွားတဲ့ အသက်တွေကိုလည်း အစားပြန် မရနိုင်ပါ။

သူ့ထက် အရင့် အရင် ဗီယက်နမ် နဲ့ အာဖဂန်၊ ဆီးရီးယား၊ လစ်ဗျားတို့မှာ အလုံးစုံပျက်သုဉ်းရေးဟာ ဆယ်စုနှစ်ချီကြာမြင့်လာပေမယ့် ယခုထိ ပြန်လည်ထူထောင်နိုင်ခြင်း မရှိပါ။ ဗီယက်နမ်တစ်နိုင်ငံတည်းသာ လွတ်မြောက်သွားလို့ ကံကောင်းသွားခြင်းဖြစ်ပြီး နောက်တက်လာတဲ့ ဆိုရှယ်လစ်အစိုးရက တိုင်းပြည်ရဲ့ ပျက်စီးသွားတဲ့ ရုပ်ပိုင်းစိတ်ပိုင်းဆိုင်ရာများကို ခက်ခက်ခဲခဲ ပြန်လည်ထူထောင်နေရကြောင်း အများတွေ့မြင်နိုင်ပါတယ်။

(၂) နောက်အဂတိလိုက်စားစေခြင်းဖြင့် အလုံးစုံပျက်သုဉ်းရေးကတော့ ဘယ်သူ ဘယ်အချိန်စတင်လိုက်ပြီး ဘယ်လောက် အောင်မြင်နေမှန်း ကျွန်တော် မသိပါ။ ရှိနေတယ်လို့လည်း စွပ်စွဲခြင်း မပြုလိုပါ။

အစိုးရအာဏာပိုင်အဖွဲ့အစည်းအဆင့်ဆင့်အတွင်း လာဘ်ပေးခြင်းဖြင့် အလုံးစုံပျက်သုဉ်းစေခြင်း ဖြစ်ပါတယ်။ 

တကယ်တော့ အဂတိလိုက်စားမှုဟာ တိုင်းပြည်ပျက်အောင် ဖျက်ဆီးရာမှာ နျူကလီယာဗုံးထက် ဆိုးရွားတဲ့ ဘွဲ့ဖြူလက်နက်ဖြစ်ပါတယ်။ 

ဥပမာ အယ်လ်ကိုင်ဒါအကြမ်းဖက်အဖွဲ့ရဲ့ သေနတ်သံမထွက်ပဲ တိုင်းပြည်ဖျက်ဆီးနည်းက လာဘ်ပေးလာဘ်ယူခြင်း ဖြစ်တယ်လို့ဆိုပါတယ်။ အာဏာပိုင်အဖွဲ့အစည်းအတွင်း တံစိုးလက်ဆောင်ထိုးခြင်းအားဖြင့် တိုင်းပြည်တစ်ပြည် အစိုးရနှစ်ဖွဲ့ အသွင်သဏ္ဍာန်မျိုးကို ဖန်တီးခြင်းဖြစ်ပါတယ်။ ဒီလိုနည်းနဲ့

တိုင်းပြည်တစ်ပြည်ရဲ့ အုပ်ချုပ်သူများဟာ ဒုစရိုက်သမားနဲ့ပုန်ကန်သူများကို နှိမ်နင်းတာလည်း သူတို့ခွင့်ပြုတာလည်း သူတို့ပဲ ဖြစ်သွားပါတယ်။

အယ်လ်ကိုင်ဒါဟာ ဖွဲ့စည်းပုံ၊ အချင်းချင်း ချိတ်ဆက်ပုံနဲ့ ဘဏ္ဍာငွေကိုင်တွယ်စီမံရာမှာ အလွန်ခေတ်မီပြီး အမေရိကန် CIA၊ ဗြိတိန် MI6 တို့လို ကမ္ဘာကျော် ထောက်လှမ်းရေးအဖွဲ့ကြီးများ မွှေနှောက်ခြင်းကို ကောင်းကောင်း ခံနိုင်ရည် ရှိတယ်လို့ “အယ်လ်ကိုင်ဒါ နိုင်ငံတကာ အကြမ်းဖက်ကွန်ရက်” စာအုပ်မှာ ပါမောက္ခရိုဟန်ဂူနာရတ်နာက ရေးပါတယ်။

ဘယ်လိုလုပ် ထိုးဖောက်နိုင်မှာလဲ ထောက်လှမ်းရေးဝင်မယ့်အပေါက်အားလုံး ငွေနဲ့ ပိတ်ဆို့ထားလို့ဖြစ်ပါတယ်။ တစ်တိုင်းပြည်လုံးလူဆိုးဂိုဏ်းကြီးဖြစ်နေပြီး တစ်ဖက်မှာလည်း ဘာသာရေးယုံကြည်မှုနဲ့ ခြောက်လှန့်ပါတယ်။

ဒုတိယနည်းဟာ အသံမထွက်၊ ရုတ်တရုက် မမြင်ရတဲ့အပြင် တိုင်းပြည်ပျက်သွားတောင် ဗြုံးကနဲ တရားခံ ရှာမတွေ့တတ်ပါ။ မျက်မှောက်ခေတ် လစ်ဗျား၊ ဆီးရီးယား ပြည်တွင်းစစ်၊ အာဖရိကနဲ့ လက်တင်အမေရိက တိုင်းပြည်များ၊ အိန္ဒိယ ပါကစ္စတန်တို့ရဲ့ နိုင်ငံရေးနဲ့ လုံခြုံရေး မတည်မငြိမ် ဖြစ်ရခြင်းများမှာ စစ်ဘက် နယ်ဘက် နိုင်ငံဝန်ထမ်းများ အကျင့်ပျက်ခြင်း လာဘ်စားခြင်းတို့ကြောင့် ဖြစ်ပါတယ်။

အကျင့်ပျက် ခြစားခြင်း၊ အဂတိလိုက်စားမှုဟာ ကျွန်တော်တို့ သိကြတဲ့ ငါးပါးသီလထဲက သူရာမေရယ သိက္ခာပုဒ်နဲ့ အတော်တူပါလိမ့်မယ်။

အရက်မူးပြီဆို သတ်၊ ခိုး၊ လိမ်၊ သူတစ်ပါးအိမ်ရာ ပြစ်မှားမှုတွေ ဆက်တိုက်ကျူးလွန်မိတော့တာပါပဲ။ မြေမြို၍ လူမျိုးမပြုတ်၊ ငွေမြိုမှ လူမျိုးပြုတ်ရပါတယ်။

ကျွန်တော်တစ်ဦးတည်း သဘောကတော့ အကျင့်ပျက်ခြစားမှုကြောင့် နှစ်စဉ်တိုင်းပြည်ဘဏ္ဍာငွေမှာ အကြီးအကျယ် ယိုဖိတ်ရမယ့်အတူတူ အဲဒီငွေတွေကို သက်ဆိုင်ရာဝန်ထမ်းအဆင့်အသီးသီးက တရားဝင်ခံစားစေခြင်း၊ အဂတိလိုက်စားမှုဖြစ်လာရင် ထိရောက်ပြင်းထန်စွာ အရေးယူခြင်းစတဲ့ တရုတ်နဲ့ စင်္ကာပူနည်းလမ်းကို ကျင့်သုံးကြည့်စေချင်ပါတယ်။ 

အစဉ်လေးစားစွာဖြင့်

HtayOung