Pika (NSS) - နိုဝင်ဘာ ၉ 

အမေရိကန်စစ်လေယာဉ်များသည် နိုဝင်ဘာလ(၈)ရက်တွင် ဆီးရီးယားနိုင်ငံ အရှေ့ပိုင်းရှိ အီရန်နှင့် ဆက်နွယ်နေသော လက်နက်သိုလှောင်ရုံကို တိုက်ခိုက်မှုများ လုပ်ဆောင်ခဲ့ကြောင်း အမေရိကန်ကာကွယ်ရေးဝန်ကြီး လွိုက်အော်စတင်က ပြောကြားခဲ့သည်။

ဆီးရီးယား နှင့် အီရတ်ရှိ အမေရိကန်တပ်ဖွဲ့ဝင်များအား အီရန်ကျောထောက်နောက်ခံပြု လက်နက်ကိုင်အဖွဲ့များက ဒရုန်းများ၊ ဒုံးကျည်များဖြင့် တိုက်ခိုက်မှုကို လက်တုံ့ပြန်သည့်အနေဖြင့် အဆိုပါတိုက်ခိုက်မှုကို လုပ်ဆောင်ခဲ့ခြင်း ဖြစ်ကြောင်း လွိုက်အော်စတင် က ပြောကြားခဲ့သည်။

အဆိုပါ တိုက်ခိုက်မှုမှာ သီတင်းပတ်နှစ်ပတ်အတွင်း ဆီးရီးယားရှိ အီရန် နှင့် ဆက်နွယ်သောနေရာများကို အမေရိကန်က ဒုတိယအကြိမ်မြောက် ပစ်မှတ်ထားတိုက်ခိုက်ခြင်းဖြစ်ကြောင်း သိရသည်။ အစ္စရေး-ဟားမက်စစ်ပွဲ ကို ဒေသတွင်းစစ်ပွဲအဖြစ် ပြောင်းလဲနေသော အီရန် နှင့် ၎င်း၏ ကိုယ်စားလှယ်အဖွဲ့များကို ဟန့်တားရန် ကြိုးပမ်း နေချိန်အတွင်း အမေရိကန်တပ်ဖွဲ့ဝင်များအပေါ် တိုက်ခိုက်မှုများလုပ်ဆောင်နေခြင်းမှာ အမေရိကန် နှင့် အီရန်နိုင်ငံ ကြား ပဋိပက္ခဖြစ်ပွားလာမည့် အန္တရာယ်ကို ပိုမိုတိုးမြင့်လာစေကြောင်း အမေရိကန်အစိုးရ က ပြောထားသည်။

လွိုက်အော်စတင် က "အမေရိကန်တပ်ဖွဲ့ဝင်တွေဟာ ဆီးရီးယားအရှေ့ပိုင်းမှာရှိတဲ့ အီရန်နဲ့ဆက်နွယ်နေတဲ့ လက်နက်ကိုင်အဖွဲ့တွေအသုံးပြုတဲ့ လက်နက်သိုလှောင်ရုံကို လေကြောင်းကနေ တိုက်ခိုက်မှုတွေ ပြုလုပ်ခဲ့ပါ တယ်။ အမေရိကန်ရဲ့  F-15 တိုက်လေယာဉ်နှစ်စင်းဟာ အဲဒီတိုက်ခိုက်မှုတွေကို ပြုလုပ်ခဲ့တာပါ။ အီရန်စစ်တပ်နဲ့ ဆက်နွယ်နေတဲ့အဖွဲ့တွေဟာ ဆီးရီးယားနဲ့ အီရတ်မှာရှိတဲ့ အမေရိကန်တပ်ဖွဲ့ဝင်တွေကို ဒရုန်းတွေ၊ ဒုံးကျည်တွေ နဲ့ တိုက်ခိုက်နေတာကို လက်တုံ့ပြန်တဲ့အနေနဲ့ ဒီတိုက်ခိုက်မှုတွေကို လုပ်ဆောင်ခဲ့တာပါ။ ကျွန်တော်တို့ရဲ့ တပ်ဖွဲ့ဝင်တွေ၊ အဆောက်အဦးတွေကို ကာကွယ်ဖို့အတွက် နောက်ထပ်လိုအပ်တဲ့အစီအစဉ်တွေအားလုံးကို လုပ်ဆောင်ဖို့ ပြင်ဆင်ထားပါတယ်" ဟု ပြောခဲ့သည်။

အဆိုပါတိုက်ခိုက်မှုကြောင့် ဆီးရီးယားရှိ အမေရိကန်ကျောထောက်နောက်ခံပြု လက်နက်ကိုင်အဖွဲ့ဝင် (၉)ဦး သေဆုံးခဲ့ကြောင်း ဆီးရီးယားရှိ လူ့အခွင့်အရေးစောင့်ကြည့်လေ့လာရေးအဖွဲ့က ပြောကြားခဲ့သည်။