စော (NSS) - နိုဝင်ဘာ ၈

အသင်းဝင်ကုမ္ပဏီများ၊ ဆန်စက်ပိုင်ရှင်များ၊ ဆန်ကုန်သည်များ ယခု နိုဝင်ဘာလ၌ ဈေးကွက်အတွင်းရောင်းချရမည့် ရည်ညွှန်းဆန်ဈေးနှုန်းများကို မြန်မာနိုင်ငံဆန်စပါးအသင်းချုပ်(MRF)က အသိပေးထုတ်ပြန်ထားသည်။

မြန်မာနိုင်ငံဆန်စပါးအသင်းချုပ်က ယနေ့(နိုဝင်ဘာလ ၈ ရက်)တွင် အထက်ပါကဲ့သို့ အသိပေးထုတ်ပြန်ထားခြင်းဖြစ်သည်။

အသင်းဝင်ထားသည့် ကုမ္ပဏီများ၊ ဆန်စက်ပိုင်/ ဆန်ကုန်သည်များအတွက် ယခုနှစ် မိုးစပါးပေါ်ချိန်တွင် သင့်တင့်မျှတသော စပါးဈေးနှုန်းများဖြင့် ဝယ်ယူနိုင်ရေးဆောင်ရွက်ရန် ရည်ညွှန်းစပါးဈေးနှုန်းများကို ပြီးခဲ့သည့် (စက်တင်ဘာလ ၉ ရက်)တွင် အသိပေးထားကြောင်း သိရသည်။

ထို့ကြောင့် မြန်မာနိုင်ငံဆန်စပါးအသင်းချုပ်တွင် အသင်းဝင်ထားသည့် ကုမ္ပဏီများ၊ ဆန်စက်ပိုင်များ၊ ဆန်ကုန်သည်များအနေဖြင့် ယခုနှစ် နိုဝင်ဘာလအတွက် သင့်တင့်မျှတသော ဈေးကွက်ဈေးနှုန်းအတိုင်း သတ်မှတ်ထားသည့် ဆန်ဈေးနှုန်းများဖြင့် ရောင်း/ဝယ်ခြင်း ဆောင်ရွက်ကြရန် တိုက်တွန်းထားသည်။

ယခု နိုဝင်ဘာလ၌ (၁၀၈)ပေါင်/ (၂၄)ပြည်ဆန်တစ်အိတ်လျှင် ဧည့်မထအုပ်စုဖြစ်သည့် (၂၅)မှတ်ဆန်အတွက် ငွေကျပ် (၅၈၀၀၀)မှ (၆၀၀၀၀)အတွင်း သတ်မှတ်ထားပြီး (၁၅)မှတ်ဆန်အတွက် ငွေကျပ် (၆၀၀၀၀)မှ (၆၂၀၀၀)အတွင်း နှင့် (၁၀-၅)မှတ်ဆန်အတွက် ငွေကျပ် (၆၂၀၀၀)မှ (၆၄၀၀၀)အတွင်း ရောင်းချရန် MRF က သတ်မှတ်ထားသည်။

ထို့ပြင် ဧရာမင်း၊ ဧရာပဒေသာ နှင့် အထူးဧည့်မထအုပ်စုများဖြစ်သည့် (၂၅)မှတ်ဆန်တစ်အိတ်လျှင် ငွေကျပ် (၆၅၀၀၀) မှ (၇၀၀၀၀)အတွင်း၊  (၁၅)မှတ်ဆန်တစ်အိတ်လျှင် ငွေကျပ် (၇၀၀၀၀)မှ (၇၅၀၀၀) အတွင်း၊ (၁၀-၅)မှတ်ဆန်တစ်အိတ်လျှင် ငွေကျပ်  (၇၅၀၀၀)မှ (၈၀၀၀၀)အတွင်း ရောင်းချသွားရန်လည်း သတ်မှတ်ထားသည်။

အလားတူ ဧရာဝတီပေါ်ဆန်းများ (၁၀-၅)မှတ်ဆန်တစ်အိတ်လျှင် ငွေကျပ် (၇၅၀၀၀)မှ (၈၀၀၀၀) အတွင်းသာ ရောင်းချသွားရန်လည်း ထပ်မံသတ်မှတ်ထားသည်။

သို့သော် ရွှေဘိုပေါ်ဆန်းဖြစ်သည့် (၁၀-၅)မှတ်ဆန်တစ်အိတ်အတွက် ရည်ညွှန်းသတ်မှတ်ဈေးနှုန်းကို ရွှေဘိုစပါးပေါ်ချိန်ဖြစ်သည့် ဒီဇင်ဘာလမှစတင်ကာ ထပ်မံထုတ်ပြန်မည်ဖြစ်ကြောင်း MRF က အသိပေးထားသည်။

ထို့ပြင် လက်လီလက်ကားဈေးကွက်အတွင်း ရောင်းချမှုများအတွက် ဈေးနှုန်း (+/- )(၅)ရာခိုင်နှုန်း ကွာခြားနိုင်ကြောင်းနှင့် Super Market များ၊ Mini Mart များတွင် Modern Trade ဖြင့် ရောင်းချမှုများအတွက် (+/- )(၁၂)ရာခိုင်နှုန်း ကွာခြားနိုင်သည်ဟုလည်း ဆန်စပါးအသင်းချုပ်က အသိပေးထုတ်ပြန်ထားသည်။