ဂျန်ဇက် (NSS) - အောက်တိုဘာ ၃ဝ 

အစ္စရေးဆက်သွယ်ရေးဝန်ကြီးက အစ္စရေးနိုင်ငံအနေနဲ့ ဘီလျံနာ အီလွန်မတ် ပိုင်ဆိုင်တဲ့ စတာလင့်ဂြိုလ်တုများကို  ဖျက်ဆီးနိုင်ဖို့ အရာရာတိုင်းလုပ်ဆောင်မှာဖြစ်ကြောင်း ထုတ်ဖော်ပြောဆိုလိုက်ပါတယ်။

အစ္စရေးရဲ့တိုက်ခိုက်မှုတွေကြောင့် ဂါဇာဒေသအတွင်းရှိ နိုင်ငံတကာလူသားချင်းဆိုင်ရာစာနာမှုအကူအညီပေးရေး အဖွဲ့အစည်းများ၊ ဖုန်းပြောခြင်း အင်တာနက်အသုံးပြုခြင်း အဆင်မပြေဖြစ်ခဲ့ပြီးနောက် အီလွန်မတ်က ဂါဇာဒေသ မှာ စတာလင့်ဂြိုလ်တုများ အသုံးပြုနိုင်အောင်လုပ်ဆောင်မယ်လို့ ပြောဆိုခဲ့ပါတယ်။ ဒါပေမယ့် အစ္စရေးအစိုးရ အဖွဲ့ကတော့ ဟားမက်စ်အဖွဲ့ဟာ အဲဒီဂြိုလ်တုတွေကို ၎င်းတို့ရဲ့အကြမ်းဖက်လုပ်ငန်းများအတွက် အသုံးပြုဖွယ်ရှိ နေကြောင်း ပြောပါတယ်။ 

အစ္စရေးစစ်တပ်ဟာ ဂါဇာကမ်းမြောင်ဒေသကို မြေပြင်ထိုးစစ်ဆင်မှုတွေ တိုးချဲ့လုပ်ကိုင်နေပြီး ပြီးခဲ့တဲ့ရက်ပိုင်းမှာ ဟားမက်စ်လက်နက်ကိုင်အဖွဲ့နဲ့ပတ်သက်တဲ့ ပစ်မှတ်ပေါင်း ၆ဝဝ ကျော်ကို တိုက်ခိုက်ခဲ့ကြောင်း ပြောပါတယ်။ အစ္စရေးစစ်တပ်က "ကျွန်တော်တို့ဟာ ပြီးခဲ့တဲ့ညပိုင်းက ဂါဇာကမ်းမြောင်ဒေသကို မြေပြင်ထိုးစစ်ဆင်နွှဲခဲ့တယ်။ ဂါဇာကမ်းမြောင်ဒေသမှာဖြစ်ပွားတဲ့တိုက်ပွဲများအတွင်း အဆောက်အဦးများ၊ ဥမင်လိုဏ်ခေါင်းတွေထဲကနေ တိုက်ခိုက်နေတဲ့ဟားမက်စ်အဖွဲ့ဝင် ဒါဇင်ချီကို သုတ်သင်နိုင်ခဲ့တယ်" လို့ ပြောပါတယ်။

လူသားချင်းဆိုင်ရာစာနာမှုအကူအညီပေးရေးပစ္စည်းများတင်ဆောင်လာတဲ့ ကုန်ကားအစီး ၃ဝ ဟာ အောက်တိုဘာ ၂၉ ရက်က ဂါဇာဒေသကို ဖြတ်သန်းဝင်ရောက်ခဲ့ကြောင်း ကုလသမဂ္ဂအဖွဲ့က ပြောပါတယ်။ အစ္စရေးအစိုးရဟာ ဂါဇာဒေသကို လူသားချင်းဆိုင်ရာစာနာမှုအကူအညီပေးရေး ကုန်ကားအစီးရေပေါင်း ၁ဝဝ သွားရောက်ခွင့်ပြုထား ကြောင်း သိရပါတယ်။ 

အစ္စရေးရဲ့ထိုးစစ်ဆင်တိုက်ခိုက်မှုတွေကြောင့် ဂါဇာဒေသမှာ လူပေါင်းသိန်းချီ လူသားချင်းဆိုင်ရာစာနာမှုအကူ အညီတွေ လိုအပ်နေကြောင်း ကုလသမဂ္ဂနဲ့ နိုင်ငံတကာအဖွဲ့အစည်းတွေက ပြောပါတယ်။ 

အစ္စရေး နဲ့ ဟားမက်စ်လက်နက်ကိုင်အဖွဲ့ကြားဖြစ်ပွားနေတဲ့စစ်ပွဲနဲ့ပတ်သက်ပြီး အစ္စရေးနိုင်ငံခြားရေးဝန်ကြီး ဌာနဟာ ရုရှားသံအမတ်ကြီးကို ဆင့်ခေါ်သတိပေးခဲ့ကြောင်း သိရပါတယ်။ ရုရှားနိုင်ငံဟာ အစ္စရေးနိုင်ငံကို ဆန့်ကျင်တိုက်ခိုက်နေတဲ့အကြမ်းဖက်အဖွဲ့အစည်းဖြစ်တဲ့ဟားမက်အုပ်စုကို တရားဝင်မှုအခွင့်အရေးပေးခဲ့ကြောင်း ပြောဆိုခဲ့ပါတယ်။ 

ဟားမက်စ်လက်နက်ကိုင်အဖွဲ့အုပ်စုဟာ ပြီးခဲ့တဲ့ရက်ပိုင်းက ရုရှားနိုင်ငံကို လာရောက်ကာ ရုရှားအစိုးရ တာဝန်ရှိသူများနဲ့တွေ့ဆုံဆွေးနွေးခဲ့ကြောင်း သိရပါတယ်။ ဟားမက်စ်အဖွဲ့နဲ့တွေ့ဆုံဆွေးနွေးခြင်းအတွက် ရုရှား နိုင်ငံကို အစ္စရေးအစိုးရက စိတ်ဆိုးဒေါသဖြစ်နေကြောင်း အစောပိုင်းတည်းက သတင်းများထွက်ပေါ်ခဲ့ပါတယ်။

အစ္စရေးဝန်ကြီးချုပ်နေတန်ရာဟုဟာ အောက်တိုဘာ ၇ ရက်က အစ္စရေးနိုင်ငံကို တိုက်ခိုက်ခဲ့တဲ့ ဟားမက်စ် လက်နက်ကိုင်အဖွဲ့ရဲ့တိုက်ခိုက်မှုတွေကို ကြိုတင်မသိတဲ့အတွက် လုံခြုံရေးအဖွဲ့များကို ဝေဖန်ပြစ်တင်ခဲ့ခြင်းအပေါ် ပြန်လည်တောင်းပန်စကားပြောဆိုလိုက်ကြောင်း သိရပါတယ်။ ဟားမက်စ်အဖွဲ့ဟာ အစ္စရေးနိုင်ငံကို ကြိုတင် သတိပေးချက်မရှိဘဲအောက်တိုဘာ ၇ ရက်က စတင်တိုက်ခိုက်ခဲ့ရာ အစ္စရေးစစ်ထောက်လှမ်းရေးအဖွဲ့ အပါအဝင် လုံခြုံရေးအဖွဲ့အစည်းများဟာ နိုင်ငံတကာရဲ့ဝေဖန်ပြစ်တင်မှုများအောက် ရောက်ရှိခဲ့ပါတယ်။