NSS - အောက်တိုဘာ ၃၀

ရန်ကုန်၌ နေ့စဉ် CNG ဂတ်စ်အသုံးပြုနေသည့် ယာဉ်အစီးရေ ၂၈,၀၀၀ နီးပါးရှိပြီး တစ်ရက်လျှင် CNG ကုဗပေ ၁၉ သန်းခန့်ရောင်းချနေရကြောင်း မော်တော်ယာဉ်သုံးသဘာဝဓာတ်ငွေ့ ဌာနမှ သိရသည်။ 

မော်တော်ယာဉ်သုံး CNG ဂတ်စ်များ ဖြည့်တင်းအသုံးပြုနိုင်ရန်အတွက် ရန်ကုန်တိုင်းဒေသကြီးအတွင်း၌ ဂတ်စ်ပိုက်လိုင်းဖြင့် သွယ်တန်းရောင်းချနေသည့် ဆိုင် ၃၅ ဆိုင်နှင့် ဂတ်စ်တွဲကားများဖြင့် လိုက်လံရောင်းချနေသည့် ဆိုင် ၆ ဆိုင် စုစုပေါင်း ၄၁ ဆိုင်ရှိကြောင်း သိရသည်။ 

"အဲဒီ ၄၁ ဆိုင်မှာ နေ့စဉ် နံနက် ၅ နာရီကနေ ည ၁၀ နာရီအချိန်အထိ ပိတ်ရက်မရှိ ပုံမှန်ဖြန့်ဖြူးရောင်းချပေးနေပါတယ်။ သဘာဝဓာတ်ငွေ့အသုံးပြုမှုတွေက တစ်ရက်တစ်ရက်ကို ကုဗပေ ၁၈ သန်း နဲ့ ၁၉ သန်းခန့်မှာ ရှိနေပါတယ်။ နောက်ပြီး တစ်ရက်တစ်ရက်ကို CNG အသုံးပြုတဲ့ YBS ယာဉ်အစီးရေက ၂၉၀၀ ကျော်၊ Taxi ၊ Mini Bus နဲ့ အခြားယာဉ်တွေပေါင်းလိုက်မယ်ဆိုရင် ယာဉ်အစီးရေ ၂၅,၀၀၀ ကျော် စုစုပေါင်း ၂၈,၀၀၀ နီးပါးကို နေ့စဉ် ပုံမှန် ရောင်းချပေးနေရပါတယ်"ဟု မော်တော်ယာဉ်သုံးသဘာဝဓာတ်ငွေ့ဌာနမှ တာဝန်ရှိသူတစ်ဦးက ပြောသည်။

ရန်ကုန်တိုင်းဒေသကြီး၌ရှိသည့် CNG အရောင်းဆိုင်များကို ညောင်တုန်း-မအူပင် ရေနံ နှင့်သဘာဝဓာတ်ငွေ့မြေမှထွက်ရှိသည့် သဘာဝဓာတ်ငွေ့များကို ဖြန့်ဖြူးရောင်းချပေးနေပြီး ယင်းသဘာဝဓာတ်ငွေ့မြေမှ ပို့လွှတ်မှု အားနည်းလာပါက ရခိုင်ကမ်းလွန်၌ရှိသည့် ရွှေသဘာဝဓာတ်ငွေ့မြေဖြင့် ဖြည့်တင်းသုံးစွဲနေကြောင်းသိရသည်။ 

ယခင်နှစ်များက သဘာဝဓာတ်ငွေ့ တစ်ကီလိုဂရမ်လျှင် ငွေကျပ် ၂၇၃ ကျပ် ၂၅ ပြားနှုန်းဖြင့် ဖြန့်ဖြူး ရောင်းချပေးနေသော်လည်း ယခုနှစ်၌ တစ်ကီလိုဂရမ်လျှင် ငွေကျပ် ၃၀၀ အထိ ဈေးနှုန်းမြင့်တက်ခဲ့ကြောင်း သိရသည်။ 

လျှပ်စစ်မီးပုံမှန်မရရှိမှုများကြောင့် CNG ဂတ်စ်ဆိုင်များ၌ ယာဉ်များသည် အချိန်ကြာမြင့်စွာ စောင့်ဆိုင်းနေရခြင်း၊ အချို့ဆိုင်များ၌ ဝယ်ယူသည့်အခါတွင် ကီလိုဂရမ်အပြည့်အဝမရရှိခြင်းတို့ကို ကြုံတွေ့နေရကြောင်း CNG အငှားယာဉ်မောင်းများက ဝေဖန်ပြောကြားလာကြသည်။