ဂျန်ဇက် (NSS) - အောက်တိုဘာ ၂၉

ကာတာနိုင်ငံခြားရေးဝန်ကြီးဌာနက အောက်တိုဘာ ၂၈ ရက်မှာ စတင်လိုက်တဲ့ ဂါဇာဒေသအပေါ်ပြုလုပ်တဲ့ အစ္စရေးတပ်ဖွဲ့တွေရဲ့မြေပြင်ထိုးစစ်ဆင်မှုတွေဟာ ဖမ်းဆီးခံထားရသူတွေ ပြန်လည်လွတ်မြောက်ရေးအတွက် စေ့စပ်ဆွေးနွေးမှုတွေကို ပိုမိုခက်ခဲရှုပ်ထွေးစေကြောင်း သတင်းထုတ်ပြန်လိုက်ပါတယ်။

ကာတာနိုင်ငံဟာ ဟားမက်စ်လက်နက်ကိုင်အဖွဲ့ ဖမ်းဆီးထားသူများ အမြန်ဆုံးပြန်လည်လွတ်မြောက်စေဖို့ ကြားဝင်စေ့စပ်ဆွေးနွေးနေကြောင်း သိရပါတယ်။ 

ကာတာနိုင်ငံခြားရေးဝန်ကြီးဌာနပြောရေးဆိုခွင့်ရှိသူက "အစ္စရေးရဲ့မြေပြင်ထိုးစစ်ဆင်မှုတွေက ပြန်ပေးဆွဲခံထားရ သူတွေ အမြန်ဆုံးပြန်လည်လွှတ်မြောက်ရေးဆွေးနွေးမှုတွေကို အခက်အခဲဖြစ်လာစေတယ်" လို့ ပြောပါတယ်။ 

အစ္စရေးစစ်တပ်အနေနဲ့ ဖမ်းဆီးခံထားရတဲ့ သူတွေအမြန်ဆုံးပြန်လည်လွတ်မြောက်စေဖို့နဲ့ အိမ်ကို ပြန်လည်ခေါ်ယူ နိုင်ဖို့ အရာရာတိုင်းလုပ်ဆောင်သွားမှာဖြစ်ကြောင်း ပြောပါတယ်။ အစ္စရေးစစ်တပ်ဟာ ပြန်ပေးဆွဲခံထားရသူတွေ ပြန်လည်လွတ်မြောက်စေဖို့ ဂါဇာဒေသကိုလည်း မြေပြင်ထိုးစစ်ဆင်နေပြီဖြစ်ကြောင်း၊ ပြန်ပေးဆွဲခံထားရသူတွေ ကို မိခင်အိမ်ကို အမြန်ဆုံးပြန်လာနိုင်ရေးက အဓိကဦးစားပေးဖြစ်ကြောင်း အစ္စရေးစစ်တပ်ပြောရေးဆိုခွင့်ရှိသူ ဗိုလ်ချုပ်ဟာဂါရီက ပြောပါတယ်။

ဥရောပသမဂ္ဂရဲ့နိုင်ငံခြားမူဝါဒရေးရာအဖွဲ့အကြီးအကဲ ဂျိုးဆပ်ဘော်ရယ်လ်က ဂါဇာကမ်းမြောင်ဒေသကို လူသားချင်းဆိုင်ရာစာနာမှုအကူအညီတွေပေးနိုင်ဖို့ ရန်လိုတိုက်ခိုက်မှုတွေကို အဆုံးသတ်ရမှာဖြစ်ကြောင်း တိုက်တွန်းတောင်းဆိုလိုက်ပါတယ်။ ၎င်းက ဂါဇာဒေသဟာ အင်တာနက်ဖြတ်တောက်မှု၊ အထီးကျန်ဖြစ်နေမှု အပြင် ကျည်ဆံတွေ ကျရောက်ပေါက်ကွဲမှုတွေ ဖြစ်ပေါ်လျက်ရှိနေကြောင်း ပြောပါတယ်။ 

ကုလသမဂ္ဂဒုက္ခသည်အေဂျင်စီက ဂါဇာဒေသခံတွေဟာ လျှပ်စစ်မီး၊ ရေ နဲ့ အစားစာတွေ လုံလောက်စွာမရတဲ့ အတွက် အခက်အခဲများစွာ ရင်ဆိုင်နေရတယ်လို့ ဆိုပါတယ်။ 

လစ်ဗျားလွှတ်တော်က ဂါဇာဒေသရှိ ဟားမက်စ်အဖွဲ့များအပေါ် တိုက်ခိုက်မှုတွေလုပ်ဆောင်ခဲ့တဲ့အစ္စရေးကို ကူညီ ထောက်ပံ့ပေးမှုတွေလုပ်ဆောင်ခဲ့တဲ့ အမေရိကန်၊ ဗြိတိန်၊ အီတလီ၊ ပြင်သစ်နိုင်ငံတို့ကသံအမတ်ကြီးတွေကို နိုင်ငံအတွင်းကနေ အမြန်ဆုံးထွက်ခွာဖို့ တိုက်တွန်းတောင်းဆိုလိုက်ကြောင်း သိရပါတယ်။ လစ်ဗျားလွှတ်တော်က ပါလက်စတိုင်းပြည်သူများအပေါ် တိုက်ခိုက်မှုတွေ မရပ်တန့်ဘူးဆိုရင် အစ္စရေးနိုင်ငံကို စွမ်းအင်ဖြတ်တောက်မှုတွေ လုပ်ဆောင်သွားမယ်လို့ခြိမ်းခြောက်လိုက်ပါတယ်။ 

ပါလက်စတိုင်းလူမျိုးတွေ နေထိုင်လျက်ရှိနေတဲ့ ဂါဇာဒေသ မြောက်ပိုင်းဟာ လက်ရှိအချိန်မှာ တိုက်ပွဲဇုန်တစ်ခု ဖြစ်ပွားခဲ့ပြီဖြစ်ကြောင်း၊ ဒေသခံတွေအနေနဲ့ ဂါဇာဒေသတောင်ပိုင်းကို အမြန်ဆုံးပြောင်းရွှေ့ဖို့ လိုအပ်ကြောင်း အစ္စရေးစစ်ဘက် တာဝန်ရှိသူတစ်ဦးက တိုက်တွန်းပြောဆိုလိုက်ပါတယ်။ အစ္စရေးဟာ ဂါဇာကမ်းမြောင်ဒေသ အပေါ် မြေပြင်ထိုးစစ်ဆင်မှုတွေ အောက်တိုဘာ ၂၈ ရက်က စတင်ခဲ့ပြီး ဟားမက်စ်လက်နက်ကိုင်အဖွဲ့တွေကို အဓိကပစ်မှတ်ထား တိုက်ခိုက်နေကြောင်း သိရပါတယ်။

အစ္စရေးဟာ မြေပြင်ထိုးစစ်သာမက လေကြောင်းကနေ ဗုံးကြဲတိုက်ခိုက်မှုတွေ လုပ်ဆောင်နေရာ ဂါဇာဒေသ မြောက်ပိုင်းရှိ ယာယီနေထိုင်ရေးစခန်းတွေက ဘေးကင်းလုံခြုံမှုမရှိကြောင်း အစ္စရေးစစ်တပ်က ပြောရေးဆိုခွင့်ရှိသူ ပြောပါတယ်။