Htay Oung (NSS) - အောက်တိုဘာ ၂၆

ဂါဇာကမ်းမြောင်ဒေသမှာ သေဆုံးသူအတော်များများဟာ ဘယ်သူဘယ်ဝါမှန်းမသိတဲ့အတွက် အစုပုံလိုက် မြေမြှုပ်သဂြိုဟ်ပစ်နေရတယ်လို့ ဒေသခံများက ပြောပါတယ်။ အဲဒါကြောင့် ကျန်ရစ်သူ မိသားစုတို့အနေနဲ့ မိမိတို့ဘယ်သူဖြစ်ကြောင်း ခြေရာခံနိုင်မယ့် လက်ကောက်/လက်ကြပ်လေးတွေကို မိသားစုအချို့က (မသေခင်) ၀တ်ဆင်နေကြတယ်လို့ ရိုက်တာသတင်းအေဂျင်စီက ယမန်နေ့ (အောက်တိုဘာလ ၂၅ ရက်)မှာ ရေးသားပါတယ်။

ဂါဇာကမ်းမြောင်ဒေသအတွင်း အစ္စရေးရဲ့အပြင်းထန်ဆုံး ဗုံးကြဲတိုက်ခိုက်မှုမှာ အဲဒီလို လက်ပတ်လေးတွေကို အသုံးပြုခြင်းဖြင့် အစုပုံလိုက်မြေမြှုပ်ခံရမယ့်အရေးမှ လျှော့ချဖို့ ကြိုးစားနေကြရပါတယ်။ အောက်တိုဘာလ ၇ ရက် ဟားမတ်စ်စစ်သွေးကြွတို့ရဲ့ အစ္စရေးမြို့များကို တိုက်ခိုက်ရာမှာ လူပေါင်း ၁၄၀၀ ခန့်သေဆုံးပြီး ဓားစာ ခံများကို ဖမ်းဆီးခေါ်ဆောင်သွားပြီးနောက် အစ္စရေးက အဲ့ဒီလို လေကြောင်းတိုက်ခိုက်မှုကို စတင်ခဲ့ခြင်းဖြစ်ပါ တယ်။

တချို့ရုပ်အလောင်းတွေဟာ ဘယ်သူ ဘယ်ဝါမှန်း မသိနိုင်လောက်အောင် အပိုင်းပိုင်း အပြတ်ပြတ်ဖြစ်နေတာကို မြင်ဖူးတယ်လို့ အသက် ၄၀ အရွယ် ပါလက်စတိုင်း အမျိုးသားတစ်ဦးက ပြောပြပါတယ်။ အသက် ၄၂ နှစ်အရွယ် သူ့မိန်းမဟာ သား ၂ ယောက်၊ သမီး ၂ ယောက် မြောက်ဘက် ဂါဇာစီးတီးမှာ ထားရစ်ခဲ့ပြီး အခြား သား သမီး ၃ ဦးနဲ့အတူ တောင်ဘက် ခန်ယူနွတ်မြို့ကို ပြောင်းရွှေ့သွားကြပြီလို့ ဆိုပါတယ်။

ဗုံးကြဲခံရပြီး အားလုံးအတူ သေမကုန်ကြရအောင် အဲဒီလို မိသားစု ခွဲနေခြင်းဖြစ်ကြောင်း အဆိုးဆုံးတွေအတွက် ပြင်ဆင်ထားတယ်လို့ သူက ရှင်းပြပါတယ်။ သူ့မိသားစုဝင်တွေအတွက် အပြာရောင်ကြိုးလက်ကြပ်တွေကို ဝယ် ယူပြီး လက်ကောက်ဝတ်နှစ်ဖက်မှာ ချည်နှောင်ထားကြောင်း တစ်ခုခုဖြစ်သွားရင် ဒီနည်းနဲ့ သူတို့ဘယ်သူ ဆိုတာ မှတ်မိနိုင်ကြလိမ့်မယ်လို့ ပြောပြပါတယ်။

အခြား ပါလက်စတိုင်း မိသားစုတွေကလည်း သူတို့ရဲ့ကလေးများအတွက် လက်ပတ်ကြိုး ဝယ်ယူခြင်း သို့မဟုတ် ပြုလုပ်ခြင်း သို့မဟုတ် လက်မောင်းများမှာ ကိုယ့်နာမည်များကို ရေးသားထားကြပါတယ်။

အစုအပြုံလိုက် မြှုပ်နှံခြင်းများကို ဒေသခံ မွတ်စလင် ဘာသာရေးဆရာများက ခွင့်ပြုလိုက်ပြီဖြစ်ပါတယ်။ သင်္ဂြိုဟ်ခြင်းမပြုမီ ဆေးဘက်ဆိုင်ရာက သေဆုံးသူများရဲ့ ဓါတ်ပုံများ၊ သွေးနမူနာများကို သိမ်းဆည်းကာ နံပါတ်စဉ်များ ပေးထားကြပါတယ်။

ကမ္ဘာ့လူဦးရေ အထူထပ်ဆုံးနေရာတွေထဲက တစ်ခုဖြစ်တဲ့ ဂါဇာကမ်းမြောင်ရဲ့ မြောက်ဘက်နယ်မြေအတွင်းမှ ထွက်ခွာဖို့ အစ္စရေးစစ်တပ်က ဒေသခံတွေကို ပြောထားပြီး ပိုမိုလုံခြုံတယ်လို့ တောင်ဘက်ကို ညွှန်ပြနေပါ တယ်။ ဒါပေမယ့် ဟားမတ်စ်တို့ အုပ်ချုပ်တဲ့ ဂါဇာမြောက်ပိုင်းရော တောင်ပိုင်းနယ်မြေကိုပါ လေကြောင်းတိုက်ခိုက်နေပါတယ်။

ကမ်းမြောင်မြောက်ပိုင်းနေထိုင်သူ အားလုံး ဂါဇာမြို့တော်အတွင်းရှိ ဟားမတ်စ်အကြမ်းဖက်တို့ ပစ်မှတ်များအနီး မှာ မနေကြရန်နဲ့ တောင်ပိုင်းနယ်မြေကို ပြောင်းရွှေ့နေထိုင်ကြဖို့ အစ္စရေးစစ်တပ်က တိုက်တွန်းထားပါတယ်။

ဟားမတ်စ်တို့ဟာ ဂါဇာကမ်းမြောင်တဝှမ်း အရပ်သားတွေကြားထဲ (ကတုတ်ကျင်း- မြေအောက်လှိုဏ်ခေါင်း များနဲ့) အခိုင်အမာ နေရာယူထားပြီးဖြစ်ကြောင်း၊ ဟားမတ်စ်ပစ်မှတ်အဖြစ် ပေါ်ပေါက်လာတိုင်း အကြမ်းဖက် အဖွဲ့ရဲ့ စွမ်းဆောင်နိုင်ရည်တွေကို တားဆီး-အန္တရာယ်လျော့ပါးအောင် IDF အနေနနဲ့ တိုက်ခိုက်သွားမှာဖြစ်ပြီး မသက်ဆိုင်သောအရပ်သားများအပေါ် တတ်နိုင်သမျှ ကြိုတင်ကာကွယ်မှုတွေ လုပ်ဆောင်နေပါတယ်လို့ IDF ပြောရေးဆိုခွင့်ရှိသူက ရှင်းပြပါတယ်။ 

သူတို့ဘက်မှာ အသေအပျောက်အများဆုံးဖြစ်ခဲ့တဲ့ အောက်တိုဘာလ ၇ ရက်ကတည်းက အစ္စရေးစစ်တပ်ဟာ ဂါဇာကမ်းမြောင်တောင်ပိုင်းက တမဟုတ်ချင်း လက်တုံ့ပြန် ဗုံးကြဲတိုက်ခိုက်ခဲ့ပါတယ်။ ရေ၊ စားနပ် ရိက္ခာ၊ လောင်စာဆီနဲ့ ဆေးဝါးတွေ ပြတ်လပ်နေတဲ့ ဝိုင်းပတ်ပိတ်ဆို့ခံ နယ်မြေအတွင်း ထောက်ပံ့ကူညီမှုတွေကို ပေးပို့နိုင်ဖို့ တိုက်ခိုက်မှုများ ရပ်ဆိုင်းပေးကြပါရန် ကမ္ဘာ့ခေါင်းဆောင်တွေက တောင်းဆိုနေပါတယ်။

လွန်ခဲ့တဲ့ ၂၄ နာရီအတွင်း ကလေးငယ် ၃၄၄ ဦး အပါ အဝင် ပါလက်စတိုင်း စုစုပေါင်း ၇၅၆ ဦး သေဆုံးခဲ့တယ် လို့ ဂါဇာကျန်းမာရေးဝန်ကြီးဌာနက ဗုဒ္ဓဟူးနေ့မှာ ပြောပါတယ်။ အောက်တိုဘာလ ၇ ရက်နေ့နဲ့ နောက်ပိုင်း အစ္စ ရေးရဲ့ ဗုံးကြဲတိုက်ခိုက်မှုကြောင့် ပါလက်စတိုင်း ၆၅၄၆ ဦးထက်မနည်း သေဆုံးခဲ့ပြီး အဲဒီအထဲမှာ ကလေးငယ် ၂၇၀၄ ဦး ပါ၀င်တယ်လို့ ဆိုပါတယ်။

(Reuters., 25 October 2023,” Gaza families wear ID bracelets to avoid burial in mass graves” ကို #HtayOung, #OungMarine ဆီလျော်အောင် ကောက်နှုတ်ဘာသာပြန်ဆိုသည်။)