ဂျန်ဇက် (NSS) - အောက်တိုဘာ ၂၃

အစ္စရေးနှင့် ပါလက်စတိုင်းလက်နက်ကိုင်အဖွဲ့ ဟားမက်စ်တို့ စစ်ပွဲစတင်ခဲ့ပြီးနောက်ပိုင်း ထိုင်းအစိုးရသည် အစ္စရေးနိုင်ငံအတွင်းရောက်ရှိနေသော ထိုင်းနိုင်ငံသား ၂၂၃၉ ဦးကို မိခင်နိုင်ငံသို့ ပြန်လည်ခေါ်ဆောင်ထားကြောင်း သိရသည်။

အစ္စရေးရောက် ထိုင်းနိုင်ငံသား ၈ဝဝဝ ကျော်သည် မိခင်နိုင်ငံကို ပြန်ရန် အမည်စာရင်းပေးထားကြောင်း သိရသည်။ အဆိုပါစစ်ပွဲအတွင်း အောက်တိုဘာ ၂၃ ရက်အထိ ထိုင်းနိုင်ငံသား ၃၁ ဦးသေဆုံးကာ ၁၈ ဦး ဒဏ်ရာရခဲ့ပြီး ၁၉ ဦး ပြန်ပေးဆွဲခံထားရကြောင်း သိရသည်။ 

ပါလက်စတိုင်းလက်နက်ကိုင်အဖွဲ့ ဟားမက်စ်အုပ်စုသည် ဖမ်းဆီးထားသောသူများကို ပြန်မလွှတ်ပေးခြင်း၊ လက်နက်မချခြင်းများရှိနေမည်ဆိုလျှင် ဂါဇာဒေသကို မြေပြင်ထိုးစစ်ဆင်နွှဲခြင်းက ရှောင်လွှဲလို့ရမည်မဟုတ် ကြောင်း အစ္စရေးစစ်ဘက်ပြောရေးဆိုခွင့်ရှိသူ Jonathan Conricus က ပြောသည်။

ဟားမက်စ်အဖွဲ့သည် အစ္စရေးနိုင်ငံကိုတိုက်ခိုက်ခဲ့ပြီးနောက် အစ္စရေးစစ်သားများ အပါအဝင် လူပေါင်း ၂၂၂ ဦးကို ပြန်ပေးဆွဲထားကြောင်း၊ ပြီးခဲ့သောရက်ပိုင်းတွင် အမေရိကန်အမျိုးသမီး သားအမိနှစ်ဦးကို ပထမဆုံးအကြိမ် ပြန်လွှတ်ပေးခဲ့ကြောင်း သိရသည်။

အစ္စရေးစစ်တပ်က လက်ဘနွန်နိုင်ငံဘက်ခြမ်းမှ ပစ်ခတ်လိုက်သောဒုံးကျည်ကို ကြားဖြတ်ဟန့်တားခဲ့ကြောင်း၊ နယ်စပ်ဒေသတွင် နေထိုင်နေသူများသည် ဟစ်ဘိုလာအဖွဲ့က ပစ်ခတ်လိုက်သောဒုံးကျည် အသံတွေကိုကြားသိခဲ့ရ ကြောင်း ပြောသည်။ ဟစ်ဘိုလာအုပ်စုသည် အစ္စရေးနှင့် ဟားမက်စ်စစ်ပွဲ စတင်ခဲ့ပြီးနောက်ပိုင်းကတည်းက အစ္စရေးနိုင်ငံဘက်ခြမ်းကို ရော့ကက်ဒုံးကျည်များဖြင့် ပစ်ခတ်တိုက်ခိုက်နေကြောင်း သိရသည်။ 

လက်ဘနွန်အခြေစိုက် ဟစ်ဘိုလာအဖွဲ့တွင် အဖွဲ့ဝင်ဦးရေ နှင့် ရော့ကတ်ဒုံးကျည်သိန်းချီ ရှိနေဟု အစ္စရေး (INSS) အဖွဲ့ပြော အီရန်နိုင်ငံ ကျောထောက်နောက်ခံပြုထားသော လက်ဘနွန်အခြေစိုက် ဟစ်ဘိုလာအဖွဲ့တွင် တပ်ဖွဲ့ဝင် ဦးရေ အနည်းဆုံး တစ်သိန်းရှိနေပြီး၊ ရော့ကက် ဒုံးကျည်အစင်းရေ နှစ်သိန်းကျော် ရှိနေကြောင်း အစ္စရေးအခြေစိုက် Institute for National Security Studies (INSS) အဖွဲ့က ပြောသည်။

တရုတ်အထူးကိုယ်စားလှယ်ဖြစ်သူ  Zhai Jun က ဂါဇာဒေသတွင်ဖြစ်ပွားနေသည့် အစ္စရေးနှင့် ဟားမက်စ်အဖွဲ့ကြားဖြစ်ပွားသည့်စစ်ပွဲကို ချက်ချင်းအဆုံးသတ်ရန်တောင်းဆိုခဲ့သလို အကြမ်းဖက်မှုများ ရပ်တန့်ရန် ဘာပဲဖြစ်ဖြစ်လုပ်ကိုင်သွားမည်ဖြစ်ကြောင်း ပြောသည်။ တရုတ်နိုင်ငံအနေဖြင့် ဂါဇာဒေသတွင် ငြိမ်းချမ်းရေးပြန်လည်ရရှိစေရန်၊ အပစ်ခတ်ရပ်စဲရေးရရှိစေရန် နှင့် တွေ့ဆုံဆွေးနွေးမှုများ ပိုမိုဖြစ်လာစေရန်အတွက် ဘာပဲဖြစ်ဖြစ်လုပ်ကိုင်သွားရန် ဆန္ဒရှိနေကြောင်း ပြောသည်။