ဂျန်ဇက် (NSS) - အောက်တိုဘာ ၂၃ 

အစ္စရေးစီးပွားရေးဝန်ကြီး နီဘာကက်က အစ္စရေးတပ်ဖွဲ့များအနေနဲ့ အီရန်ကို ကမ္ဘာမြေပြင်ကနေ အပြီးတိုင် ဖယ်ရှားသွားမယ့်အစီအစဉ်များရှိနေကြောင်း ထုတ်ဖော်ပြောဆိုလိုက်ပါတယ်။

အစ္စရေးနဲ့ ဟားမက်စ်တို့ကြားဖြစ်ပွားနေတဲ့ စစ်ပွဲနဲ့ပတ်သက်ပြီး လက်ဘနွန်လက်နက်ကိုင်အဖွဲ့ ဟစ်ဘိုလာနဲ့ အီရန်တို့ဟာ စစ်ပွဲထဲမှာ တိုက်ရိုက်ပါဝင်လာမယ်ဆိုရင် အစ္စရေးတပ်ဖွဲ့တွေဟာ ဟစ်ဘိုလာအဖွဲ့တွေကို ချေမှုန်းသုတ်သင်သွားမှာဖြစ်သလို အီရန်ကိုလည်း ပစ်မှတ်ထားတိုက်ခိုက်သွားမှာဖြစ်ကြောင်း ၎င်းက ပြောပါတယ်။

အစ္စရေးစီးပွားရေးဝန်ကြီးက "အီရန်ဟာ အစ္စရေးကို စစ်မျက်နှာပေါင်းစုံကနေ တိုက်ခိုက်ဖို့ စီစဉ်နေတယ်။ အီရန်ဟာ အစ္စရေးကို စစ်မျက်နှာစုံကနေ တိုက်ခိုက်ဖို့ စီစဉ်နေတဲ့အချက်ကို တွေ့ရှိမယ်ဆိုရင်တော့ ကျွန်တော်တို့ဟာ အဲဒီစစ်မျက်နှာအားလုံးကို တုံ့ပြန်တိုက်ခိုက်ရုံတင်သာမက နောက်ကွယ်ကရှိနေတဲ့ အီရန်ကိုလည်း တိုက်ခိုက်သွားမယ်။ အီရန်ဟာ အစ္စရေးကိုတိုက်ခိုက်ဖို့ အစီအစဉ်တွေရှိနေမယ်ဆိုရင်တော့ အီရန်နိုင်ငံရဲ့အမြင့်ဆုံး ဘာသာရေးခေါင်းဆောင် အယာတိုလာဟာ ညတိုင်းကို အေးဆေးအိပ်ရတော့မှာ မဟုတ်ဘူး" လို့ ပြောပါတယ်။ 

ဒါ့အပြင် အစ္စရေးစီးပွားရေးဝန်ကြီးက လက်ဘနွန်နိုင်ငံ နဲ့ ဟစ်ဘိုလာလက်နက်ကိုင်အဖွဲ့တို့ဟာ စစ်ပွဲထဲ တိုက်ရိုက် ပါဝင်လာမယ်ဆိုရင်တော့ ဟားမက်စ်အဖွဲ့လိုမျိုး ကြီးမားတဲ့ပေးဆပ်မှုတွေ ပြန်လည်ပေးဆပ်ရမှာဖြစ်ကြောင်း ထပ်မံ သတိပေးထားပါတယ်။

၎င်းက "အစ္စရေးဟာ ရန်သူတွေကို ရှင်းရှင်းလင်းလင်း မက်ဆေ့ပေးလိုတယ်။ လိုအပ်မှုတွေ ရှိလာမယ်ဆိုရင် အီရန် ခေါင်းဆောင်တွေကို တိုက်ခိုက်သွားမယ်။ အီရန်ဟာ ကျွန်တော်တို့ကို ပစ်မှတ်ထားတိုက်ခိုက်လာမယ်ဆိုရင်တော့ အီရန်နိုင်ငံကို ကမ္ဘာမြေပြင်ကနေ အပြီးတိုင်ပျောက်ကွယ်အောင် လုပ်ဆောင်ပစ်မယ်" လို့ ပြောပါတယ်။

အီရန်နိုင်ငံခြားရေးဝန်ကြီး  Hossein Amir-Abdollahian က အစ္စရေးနိုင်ငံအတွက် လုံခြုံရေးအခြေအနေတွေဟာ လျင်မြန်စွာပြောင်းလဲနေကြောင်း၊ ဂါဇာဒေသရှိ ပါလက်စတိုင်းတွေအပေါ် စစ်ရာဇဝတ်မှုတွေ ဆက်လက် ကျူးလွန်နေမယ်ဆိုရင် အစ္စရေးဟာ မျှော်လင့်မထားတဲ့ စစ်မျက်နှာပေါင်းစုံကနေ တိုက်ခိုက်ခံရဖွယ်ရှိနေကြောင်း မကြာသေးမီက ပြောဆိုခဲ့ပါတယ်။ အစ္စရေးဟာ ပါလက်စတိုင်းတွေအပေါ် တိုက်ခိုက်မှုကို ရပ်တန့်မှုမရှိဘူးဆိုရင် ဒေသအတွင်းမှာ ထိန်းချုပ်လို့မရတဲ့ စစ်ပွဲပုံစံမျိုးဖြစ်လာနိုင်ကြောင်း ၎င်းက ထပ်မံသတိပေးထားပါတယ်။