ဂျန်ဇက် (NSS) - အောက်တိုဘာ ၁၉

ပါလက်စတိုင်းလက်နက်ကိုင်အဖွဲ့ ဟားမက်စ်ဟာ အစ္စရေးကိုတိုက်ခိုက်ရာမှာ မြောက်ကိုရီးယားနိုင်ငံက ပေးပို့ထားတဲ့ စစ်လက်နက်ပစ္စည်းများကို အသုံးပြုဖွယ်ရှိနေတယ်လို့ဆိုပါတယ်။ မြောက်ကိုရီးယားနိုင်ငံက ဟားမက်စ်ကို စစ်လက်နက်ပစ္စည်းများရောင်းချပေးတာမျိုးမရှိဘူးလို့ ဆိုထားပေမယ့် မကြာသေးမီကထွက်ပေါ်ခဲ့တဲ့ ရုပ်သံဖိုင်တွေအရ မြောက်ကိုရီးယားဟာ ဟားမက်စ်ကို စစ်လက်နက်ပစ္စည်းများ ကူညီပေးဖွယ်ရှိနေတယ်လို့ တောင်ကိုရီးယား ထောက်လှမ်းရေးတွေက ဆိုပါတယ်။ တင့်ကားတွေကိုဖျက်ဆီးဖို့ဟားမက်စ်အဖွဲ့အသုံးပြုနေတဲ့ F-7 ပုခုံးထမ်းရော့ကတ်ဒုံးကျည်တွေဟာ မြောက်ကိုရီးယားက ပံ့ပိုးပေးထားတဲ့လက်နက်တွေဖြစ်တယ်လို့ ဆိုပါတယ်။

အစ္စရေးနိုင်ငံကို အမေရိကန်သမ္မတ ဂျိုးဘိုင်ဒန်သွားရောက်ခဲ့ပြီးနောက် တစ်ရက်အကြာ အောက်တိုဘာ လ ၁၉ ရက်မှာဗြိတိန်ဝန်ကြီးချုပ်ဟာလည်း အစ္စရေးနိုင်ငံကို ထပ်မံသွားရောက်ခဲ့ပြီး ဝန်ကြီးချုပ်နေတန်ရာဟုအပါအဝင် အစ္စရေးအစိုးရတာဝန်ရှိသူများနဲ့တွေ့ဆုံဆွေးနွေးခဲ့ကြောင်းသိရပါတယ်။ ဗြိတိန်ဝန်ကြီး ချုပ်ဆူနက်က အီဂျစ်ဒေသကနေ ဂါဇာဒေသကိုလူသားချင်းဆိုင်ရာစာနာမှုအကူအညီများပေးမယ့်အစီ အစဉ်ကို ခွင့်ပြုပေးဖို့၊ စစ်ပွဲအတွင်းပိတ်မိနေတဲ့ ဗြိတိန်နိုင်ငံသားတွေအမြန်ဆုံးပြန်ထွက်ခွာနိုင်ဖို့ အပြင်ဒေသအတွင်းတင်းမာမှုတွေ ထပ်မံမဖြစ်အောင်ရှောင်ရှားနိုင်ဖို့ ကြိုးပမ်းပေးသွားမှာဖြစ်ကြောင်း ပြောခဲ့ပါတယ်။ 

အစ္စရေးနဲ့ ဟားမက်စ်လက်နက်ကိုင်အဖွဲ့ကြားဖြစ်ပွားနေတဲ့စစ်ပွဲကြောင့် ထိုင်းနိုင်ငံသားသေဆုံးသူအရေအတွက် ပိုမိုမြင့်တက်လာခဲ့ပြီး သေဆုံးသူအရေအတွက် ၃၀ ဦးအထိမြင့်တက်လာခဲ့ကြောင်း အစ္စရေးအစိုးရက အတည်ပြုလိုက်သည်။ စစ်ပွဲကြောင့်ထိုင်းနိုင်ငံသား ၁၆ ဦး ဒဏ်ရာရထားပြီး ၁၈ ဦး ပြန်ပေးဆွဲခံထားရကြောင်း ထိုင်းအစိုးရကပြောသည်။

ဂါဇာဒေသမှာဖြစ်ပွားနေတဲ့ စစ်ပွဲအဆုံးသတ်စေဖို့ အမေရိကန်နိုင်ငံ လွှတ်တော်နဲ့အစိုးရအဆောက်အဦးရှေ့မှာ ဆန္ဒပြခဲ့သူတွေထဲမှ အနည်းဆုံး ၃၀၀ ကျော်ဖမ်းဆီးခံရကြောင်းသိရပါတယ်။ အဆိုပါဆန္ဒပြပွဲကို ဂျူးလူမျိုးများကိုယ်တိုင်ဦးဆောင်လုပ်ကိုင်ခဲ့ပြီး မျိုးသုန်းသတ်ဖြတ်မှုများဖြစ်လာအောင် လုပ်ဆောင်နေတဲ့အစ္စရေးနိုင်ငံကို ပြစ်တင်ရှုတ်ချကြောင်း ဆိုပါတယ်။

ပါလက်စတိုင်းအစိုးရတာဝန်ရှိသူများက အစ္စရေးက ပါလက်စတိုင်းပြည်သူများကို မျိုးသုန်းသတ်ဖြတ်ရန်ကြိုးပမ်းနေမှုများကို တားဆီးရပ်တန့်စေလိုကြောင်း ကမ္ဘာ့နိုင်ငံများကို တိုက်တွန်းတောင်းဆိုလိုက်ပါတယ်။ ဂါဇာဒေသရှိ ဆေးရုံဗုံးကြဲခံရမှုများဖြစ်လာခဲ့ပြီးနောက် ပါလက်စတိုင်းအစိုးရဟာ အစ္စရေးရဲ့မျိုးသုန်းသတ်ဖြတ်မှုများကို ရပ်တန့်စေလိုကြောင်း တိုက်တွန်းတောင်းဆိုလိုက်ပါတယ်။